十六歲但非處子身嘅女孩: 9.1 自相矛盾
一返到屋企，我就即刻打咗個電話俾智儀
「喂？智儀你點樣呀？」電話大概打通咗十幾秒，智儀先聽電話
「Anki........我好辛苦.....點解會咁？」智儀佢一路講野，一路啜泣「我喊到就黎透唔到氣」
「你冷靜d 先，我明白，嗰個賤男跟本就唔值得為佢喊」我盡我所能去安慰智儀
「唔係.....唔係......我真係好鐘意Eason，雖然我地見面少，又唔係同一間學校，不過我都好信任佢，起初我都有懷疑過佢點解聖誕節都唔陪我過，我有懷疑過佢係味出面有第二個..........係我自欺欺人，我不停咁說服自己冇事發生......我俾機會佢，我相信佢.........我對佢咁好，就算他朝有一日佢有第二個，佢都一定會返黎我身邊.....」
智儀不停咁喊，佢把聲都已經沙曬
「但係而家事實就擺喺我眼前，我冇得唔相信.........我都好想扮唔知，我都好想扮冇事發生過.....但係我做唔到，我睇完你send 俾我張相之後，我有諗過當唔知，再俾機會佢........唔得，我真係接受唔到.......」
「對唔住，我知我唔應該咁多事」我今次真係做多咗，你以為你咁做係為人好，其實你可能太多事，人地跟本就唔願意知道佢嘅真面目，寧願瞞騙自己
「Anki，我應該多謝你先真.........係你咁做先可以令我清醒....我唔可以再自己呃自己，我要認清楚呢個人嘅真面目」佢啜泣嘅聲音已經減退，睇黎應該回復理智
「但係我個心真係好痛，我對佢咁好，點解佢要咁對我 ？」佢把聲由悲衰嘅哭泣化為憤怒同怨恨
「我做任何事都以佢為先，做乜野都為佢著想，我對佢咁好......佢點解可以同第二個女仔一齊？點解咁唔公平？我一心一意咁對佢，但佢竟然咁花心」
「世事冇野係對等，你對人好，唔代表佢會對返你好」我好明白呢點，因為Rick 對我嘅好，我都冇好好珍惜，我剩下嘅只有歉意同內疚
「係佢唔識珍惜，你更加唔可以為佢再流眼淚，要忘記佢，一定有更加好嘅喺前面等緊你」忘記一個人，唔係口講就可以做得出，我都而家心裡面都仲有一個人係忘記唔到
「你嗰陣時同Cyrus 分開，你係點重新振作？」今次係智儀第一次失戀，難免係會好唔開心，之不過，我從來都冇重新振作過
表面上我安然無恙，實際上我每日都喊到不似人形，直到而家，去到夜半深宵，我依然到去諗返起我同Cyrus 嘅事，什至會諗到喊，第二日對眼又會腫曬
都已經過咗耐，我又同Rick 一齊咗咁耐，但而家都未可以放低Cyrus
「我......當時咪搵野做發洩，麻醉自己，唔再諗佢，我當時一個禮拜去跳幾日舞，又去跑步同睇書，花時間落其他野上面，令自己唔再諗起佢」
就算我每日都有咁多野做，我去到呢個地步都仲未可以徹底忘記佢，都已經過咗一年，不得不承認我係當呀Rick 係水泡
我都冇辦法解釋點解我到而家都仲對Cyrus 有掛念嘅感覺，因為我仲鐘意佢？因為佢係我初戀？因為我嘅第一次俾咗佢？定因為佢hurt 得我太深？
時間一日一日咁流逝，如果有得俾我揀多次，我諗我唔會選擇同Rick 一齊，我會想同Cyrus 重新開始
我每日返學都會見到Cyrus，我地同一個朋友圈仲要同班添，撞口撞面嘅機會率可以話係100%，避冇可避，而每次當我同佢四眼相投嘅時候，我都可以喺餝眼中見到一絲絲嘅傷感
唔單只係佢，我相信喺我眼中都有流露同一種悲傷
一句到尾，真正出軌嗰個係我，冇論無心靈定係肉體上都係
自從Rick 偷睇我同Cyrus 嘅對話之後，我同佢都冇再會wts 或者send 短訊俾對方，只係間唔中會打電話俾對方，保持聯絡
我唔會好似同Rick 咁日日都send 好多短訊講好多野，什至有時我同Rick 之間悶到已經唔知再wts 對話傾咩好
可能同Rick 相處耐咗，大家嘅事日日都傾就會覺得有種厭倦
而我可能一個禮拜先同Cyrus 傾一次電話，就會變得更加珍惜我地會晚傾計嘅時間，始終物而罕為貴
「之前Eason 真係對我好好，因為我地見面少，所以我地晚晚都會傾電話，雖然佢聖誕節冇陪我，但係佢都有同我補祝，仲好錫我，不過原來一切都係假，係佢為掩飾同第二個一齊先對我特別好，一切都好假」
智儀都洞悉到，一個人為咗掩飾自己，同埋為咗自己嘅良心好過d，都會去對人作出補償，希望可以得到原諒
但紙係包唔住火，冇人可以預知大話同謊言會幾時被人識穿
而我同Eason 就係同一類人，都係為咗補償而對自己嘅伴侶更加好，有幾多成出於真心？又有幾多成係出於內疚？
「不過只少睇得出Eason 對你都未至於差，佢一腳搭兩船係唔啱，但係佢起碼都仲叫愛你先會唔捨得放開你而繼續同你一齊呀」對我呢個花心同出軌嘅女人黎講，我覺得Eason 都叫好
佢雖然賤在鐘意第二個，不過佢係仲鐘意智儀先冇同佢即時講分手啫
「唔係....佢係賤.......佢明知一腳搭兩船係冇結果，但佢都要拖住我，仲要貪新鮮同令一個一齊，如果佢真心愛我，就唔會同第二個一齊！」智儀哭訴
可能我嘅價值觀已經扭曲咗，因為我都係個賤人