十六歲但非處子身嘅女孩: 8.2 自責、內疚、悔意

距離Rick DSE 開考仲有一個月，不過佢都百忙之中抽時間出黎陪我慶祝情人節

Rick 做嘅每一件事都非常之細心，每次大時大節我地出街嘅行程都係由佢一手包辦，從來都唔需要我操心，當然今次嘅情人節都唔例外
但係佢對我愈好我嘅內疚心同罪惡感就愈來愈重，望住佢真誠嘅眼神，就會令到我充滿住悔意
我知道冇論我同呀Rick 講我有幾妒忌佢18 歲就唔係處，同佢解釋我係為咗報復先咁做都好，總之我做出對佢唔住嘅事就係我唔啱
我而家只可以做嘅事就係花更多時間同心機喺Rick 到，一心一意咁為佢去彌補我之前所犯嘅過錯

Rick 佢大概12點半就黎到我屋企留下接我，佢著住一件韓仔風嘅長外套，gel 咗個頭，裡面著深藍色嘅冷衫同一條黑色牛仔褲，加上Rick 佢高挑嘅身材，成個oppa 咁
手上仲有攞住一紮花，唔係玫瑰，而係我最鐘意嘅淡粉紅色繡球花
「你仲記得我鐘意繡球花？我只係同你講過一次咋喎」我好興奮咁攞起紮花，欣賞下佢用咗咩花去做配花同睇下d 顏色嘅搭配


「你講過嘅每一句說話我都有記入心裡面，你係我最掛心嗰個呀嘛，情人節快樂」佢真係好識講野氹我開心，每次都會俾驚喜我

我一隻手攞住紮花，一隻手十指緊扣住Rick
喺佢一路拖住我嘅同時，我覺得自己好賤格，拖住自己深愛嘅男朋友但係又一腳搭兩船，我分得清楚我係掛住Cyrus 不過鐘意Rick，但係我始終係一個出軌嘅女人，一切都係我嘅錯
既然我有錯，我就更加要補償返俾佢，當我受良心責備又好，盡女朋友嘅責任又好，我會比之前更疼錫佢，更愛佢，亦都唔會再同Cyrus 有任何關連

「Anki，你今日係咪有樣野要同我講？」我地停低等過馬路嗰陣，Rick 佢問我
死火啦，唔通佢知道咗我同Cyrus 嘅事？佢想我開口同佢坦白先？佢想我親口解釋好過佢開口鬧我？
但係點解佢會知道？呢件事係得我同Cyrus 兩個人知，唔通Cyrus背叛我？



「吓？我有咩要同你講呀？」係呢個關頭我唯有扮冇知，等佢開口問我先，就算佢要係鬧我，我都唔會否應或者反抗，因為我的確係做錯
「你未同我講情人節快樂呀！」Rick 佢面上依然掛住佢嘅招牌微笑，而我只係露出一個尷尬笑
我初初仲喺到擔心佢要同我攤牌，又喺到諗唔同藉口同方法去應對，好彩全部都只係虛驚一場

「我頭先送花嗰陣同你講咗啦，你都好似好冇咩反應咁嘅？」Rick 佢又問一d 好刁鑽嘅問題
「因為你送花嗰陣太驚喜啦，我都未俾得切反應，同埋我真係好鐘意紮花呀，掛住望都唔記得咗講添」
喺呢種情境我只可以扮低能去掩飾我頭先嘅緊張同心虛，只可以求其作一個藉口去扮若無其事
好彩我頭先冇自作聰明咁自首，如果唔係後果真係不堪設想，我唔想喺情人節先黎鬧大交然後分手收場

我地搭車去到觀塘海濱花園，呢到由成條沿海嘅路組成，面對住出面嘅海境，好寫意、好舒適



我地手拖手一路散步，暖暖嘅陽光照落黎驅走冬天嘅寒氣，就算係2 月嘅冬日裡面，我都有呀Rick 為我帶來溫暖
沿途一路直行都見到唔少對情侶喺到拖手慢步，而每個女仔手上都揸住一紮花，睇黎係情人節嘅象徵，而我呢束花就比較特別，唔係平時基本用黎氹女仔開心嘅紅玫瑰，而係Rick 佢精心挑選嘅繡球花

雖然喺海邊漫步係一見好普通嘅事，不過對於我同Rick 黎講，最平凡嘅事就係最幸福，然而，我係冇資格去講咩幸唔幸福
漫步嘅同時我都好少直望Rick 佢雙眼，因為自己做過虧心事，連眼神嘅交流都要迴避，我驚我自己望得佢太耐會忍唔住喊

「Anki，你做咩近排好似好靜咁嘅？」佢開口問我，打破咗呢刻我地牽手慢步嘅寧靜
「冇野，我呢排把聲沙沙地，我唔想講野，費時傷聲啫」我唯有諗個藉口hea 住呀Rick，我唔想表露到任何我心虛嘅表情，我冇辦法再好似之前咁同Rick 暢所欲言
其實情侶之間咁樣互相隱瞞、互相欺騙，係一件好辛苦嘅事，總要有一個時機去解釋清楚所有事

我地由離開海濱花園，去到apm 到行街睇戲
我地去咗最高戲院嗰層，腑瞰落去見到成個商場都佈置成粉紅色，被整個粉紅嘅環境渲染，好有情人節嘅氣氛
「你等我一陣先，我而家去買爆谷」Rick 佢行咗過去小食部嗰度排隊買爆谷同野飲，而我就乖乖地喺門口到等佢，因為戲院今日都比較多人，我都留喺原地，避免又同Rick 走失




我望住大屏幕，睇緊下半年將會有咩戲上映，突然之間有個好熟口面嘅人喺我面前經過
我回頭追望，點解呢個人咁面善但係我又講唔出佢個名呢？
我追前兩步，發現佢身後仲有拖住個女仔，而個女仔仲攞起電話同佢自拍，究竟呢個男仔係？
冇錯，我記得呢個男仔就係智儀之前po 過佢上IG 嘅男朋友