十六歲但非處子身嘅女孩: 6.2 天旋地轉

「做咩今日咁好死約我食lunch 呀？唔洗陪你條仔咩？」Mika 抽我水
「有件事搞到我好亂，我想搵你傾下」我滿面憂愁
「都知你係有事先黎搵我傾㗎啦，做咩呀？同條仔鬧交？」Mika 咬住佢杯凍檸茶嘅飲管，望住我
今日放lunch 我冇同Rick 一齊食野，淨係同Mika 兩個人去食，我呢幾日都冇點理呀Rick，我唔知可以點樣面對佢好

「之前考試我每日都同Rick 食飯跟住去自修室溫書，有一次我見到佢襯我買野嘅時候偷睇我同Cyrus 嘅對話紀錄，我都知道我仲有同Cyrus 講野係我唔啱，跟住佢仲用我部電話寫咗一段野俾Cyrus，不過之後又扮若冇其事，你覺得我應唔應該同呀Rick 講之前Cyrus 問過我係咪當佢係水泡嘅事？」我一輪嘴咁講而Mika 就淨係喺到食
「你有冇聽我講野㗎？」我再追問多次Mika

「乜你到最後都冇同到Rick 講水泡嗰樣野咩？你又話你同佢之間要坦誠相對嘅」Mika 一路拮檸檬一路同我講
「你而家係有心穩瞞佢，仲要件事過咗幾個月啦喎」佢繼續講


「我驚我講完之後，呀Rick 會同我講分手唔要我...... 所以我冇同佢講到」我低頭望住我碟豬扒飯
「你呢個女人真係口不對心，叫人咩都同你講但你自己又有野瞞住人」Mika 瞪大對眼望住我
「咁你仲覺得我應唔應該同Rick 講水泡件事？」我滿面愁容

「咪講啦，件事都過咗幾個月啦，你而家先同佢坦白，咁佢咪會更加怪你點解唔當初就同佢講真話，既然你都瞞咗咁耐，咁點解唔一直都瞞住佢？佢唔知咪冇事囉，老實講句呀，你將Cyrus 嘅一句說話都諗咁耐，其實如果你問心冇愧，又點會驚咁多野，諗咁多野」

Mika 講得好啱，我本身就已經有心瞞騙，咁索性唔俾Rick 知咪得囉，我都已經錯咗，唔俾佢知我犯過錯咪得囉

「咁點解佢又會冇啦啦睇你電話嘅？」Mika 繼續問我
「佢一直都有check 我電話嘅習慣嘅，我估佢以為我淡忘咗件事先攞我部話黎睇，費時我懷疑」


「咁你都check 返佢電話啦，公平d , 佢睇得你電話，咁你都可以睇佢電話啦」Mika 露出個奸險嘅笑容

冇錯，我要以其人之道還治其人之身

過幾日，呀Rick 約我出黎食晚飯，我地都有兩星期冇一齊出過街

我面上嘅笑容少咗，對住Rick 我覺得好有罪惡感，我鐘意呀Rick 但同時又當佢係水泡，我唔捨得同一個對我咁好嘅男朋友分手，所以我成日都心不在焉
「做咩又愁眉苦面？係咪有咩想講？」Rick 打斷咗我同我內心世界嘅對話
「冇野，我諗緊前嗰排考試d 野啫，食飯啦」其實我係諗緊你
「嘩....... 點解突然之間咁肚痛嘅........ 」Rick 好似食錯野，成個人抽埋一舊


「你去廁所先啦，不過喺餐廳出面」我講完呢句之後，呀Rick 即刻乜都唔理就衝去廁所到，佢應該係食得太多壽司或者d 野唔乾淨

佢部電話赤裸裸咁擺咗喺枱面，分明係引誘我睇，我即刻東張西望，睇下Rick 會唔會扮肚痛黎引我check 佢電話，不過又唔見佢人影
我攞起佢部電話睇佢WhatsApp，最頂最常傾計嘅當然係我啦，而第二個就係佢老死呀源
佢同呀源乜都傾，我就即管睇下佢會同呀源講咩
裡面嘅內容都係好普通，問下佢今日練唔練波，對波鞋幾錢或者講下打機d 野，所以我再碌上d 睇

「我發現Anki 同佢ex 仲有聯絡，好似有d 野唔想我知咁」Rick 同呀源講我d 野
「係咩事呀？咁你夠有d 野冇話俾Anki 知啦」呀源話，究竟有d 咩我唔知？
「你唔好再講嗰樣野，我唔想俾佢知，佢咁純又咁蠢，唔可以咁對佢，更何況我係真心鐘意Anki」做咩事？我好想知，我繼續睇落去
「我仲以為你初初溝Anki 係因為想搞佢添，你諗下人地16 歲喎，16歲妹妹仔嘅第一次呀，你唔係為咗呢樣咩？」
「唔係呀屌你，我冇同過佢講我已經唔係處嘅事，佢乜都唔知㗎，有時我同佢講d 咸濕笑話佢都唔明㗎」

Rick 佢而家18 歲但就已經唔係處？即係話佢之前已經同人扑過？佢ex 係中五排球隊嗰個師姐，我唔係話有咩處男情意結或者好在意佢係唔係處，不過佢連呢件咁大件事都唔同我坦白，仲以為我真係好蠢真係乜都唔知，你估我真係唔知咩？我只係扮蠢扮冇知，掩飾我同Cyrus 之前都做過嘅事



「咁Anki 的確係個好女仔黎嘅，你千其唔好趙完鬆」呀源提醒佢
「我唔會搞Anki 嘅，佢仲咁細個，或者等佢大d 先啦，我地一齊又唔係耐」
睇完佢地呢段對話之後，我仲比頭先更冇心機、更冇精神，我托住個頭，望住餐廳門口

冇幾耐之後，呀Rick 就返黎「你係咪等咗好耐呀？等到成個人都呆曬」
「冇野，食完我地走啦」我近排對Rick 講得最多野一句係冇野，係所有野都唔想佢知