十六歲但非處子身嘅女孩: 5.1 有了你，我的世界更加甜

2017年12月25日

大概朝早十點，我俾電話響嘈醒，對眼朦朦朧朧，從床頭攞起電話再望一望來電，「Rick Rick 豬」

「BB，早晨呀，聖誕快樂」Rick 對住部電話放輕聲線，好溫柔咁同我講
「早晨呀，你咁早打黎嘅，而家先十點咋喎......」我啱啱俾人嘈醒，個心情都燥燥地
「我 plan 好咗今日同你過聖誕嘅行程啦，你而家起身扮下靚先，我11：30 黎你屋企留下接你啦」我之後追問呀Rick 今日有咩特別地方去，但佢又唔肯講，扮神祕

我即刻由床到彈起身，準備沖涼洗頭，之後仲要揀衫、化個淡妝、set 頭，加加埋埋都要搞一個鐘左右，做女人真係麻煩，不過今日係聖誕節，又要見男朋友，點都要執返正個人，執返曬d 眼耳口鼻，唔可以好似平時返學個樣咁頹
一打開房門，就發現呀哥喺到霸住個廁所



我敲敲門然後大叫「喂呀何安信，你搞掂未呀？到我用廁所啦！」
「收聲啦，我要洗頭gel 頭呀，你要用就下次早d 起身啦」廁所裡面傳出我哥哥低沉嘅聲音
「快d 啦，我約咗人呀！」本身已經俾電話嘈醒，而家仲要俾哥哥塞住個廁所
「睇死你又係約咗條仔啦，咩.....咩..... 叫呀Rick 呀嘛，我一睇就覺得嗰個呀Rick 唔係一個好人啦，我問過我d 舊同學啦，聽我講啦，佢之前好鐘意溝女㗎，我識d 其校籃球隊d 人話佢係狗公黎㗎，快d 同佢分手啦呀妹」

我哥哥大我三年，之前同我讀同一間中學，而家讀大學住緊Hall，佢唔鐘意呀Rick，又成日叫我同佢分手又話佢唔好又點點點
「得啦，唔關你事呀，好唔好人我自己識分」我嬲爆爆咁答佢
「呀哥都係為你好咋，你都唔知佢之前.....」哥哥打開門行出黎，我一手推佢出去，閂埋門唔聽佢講野



我行事迅速，喇喇聲洗頭吹頭，輕輕咁搽咗少少遮瑕膏遮住個黑眼圈同暗瘡印，同係咁二畫咗條眼線，揀咗件冷衫同半節A字裙，今次隻腳真係凍死，愛靚唔愛命，再加返條頸巾

「Sorry 呀Rick 我遲咗少少，因為我哥哥塞住個廁所」我扮出一個可憐樣向Rick 撒嬌
「都唔係遲好多啫，我地而家去食個lunch 先，跟住再帶你去其他地方」Rick 錫一錫我額頭，之後拖住我行，佢隻手好暖

我地行到商場，簡簡單單食個午餐
「今日成日就會由我帶住你，包你過一個甜蜜又幸福嘅聖誕」我同呀Rick 手拖手一齊離開餐廳
「係咩？咁我地而家去邊呀？」我甜笑回望
「我地第一站就去旺角，我地一齊咗都有四個月啦，我地去影街相留念好冇？」



每一個紀念日Rick 都比我記得仲要上心，有時仲要佢提返我轉頭，第一個月佢有送一隻毛公仔俾我，仲話每個月都俾我一個驚喜，不過我覺得真係太嘥錢同太麻煩，每個月都要花心思真係會好頭痕，只要我知道Rick 佢對我真心真意，其實跟本就唔介意乜野驚喜同小禮物

去到人來人往嘅旺角，公眾假期特別多人，Rick 佢將我隻手拖得更緊，好似驚我會走失咁。見到影相檔都有幾對情侶喺到排隊影相，女嘅翹住男嘅手，由於天氣都涼涼地，所以小情人都會互相依偎，場面浪漫又溫馨

「喺聖誕節見到嘅情侶都好似特別幸福咁」我雙手牽住呀Rick，面對面同佢講
「我覺得你會係成條街裡面最幸福嗰個喎」Rick 佢拉近我成個人，直接攬住我
「係咩？點解你咁覺得呀？」我依靠喺佢心口，面貼住佢嘅大長外套
「因為你有我囉，有我陪住你過嘅每一分每一秒都會係最幸福」Rick 伸手摸一摸我嘅頭髮，一絲一絲咁用佢嘅五指梳，幫我梳順

放閃彈嘅情侶又點會淨係得我地，成個旺角行緊街嘅人都係一對對，唔怪得知Ivan 話聖誕節忌出街啦，到到都光污染

有時我會喺到諗，點解呀Rick 一個咁好嘅男仔佢會揀同我一齊？佢又高又靚仔仲要係籃球隊，好多師妹都當佢男神咁拜，點解佢偏偏會揀我一個咁普通又咁低能嘅女仔？樣又唔靚，身材又唔係出眾，讀書唔算尖子，運動又唔叻，簡直可以話一冇是處，點解佢仲對我咁好？佢究竟鐘意我d 咩？

「靚女靚仔，到你地啦，過黎啦！」影相嘅呀叔喝住我地，佢把聲好大聲，因為要覆蓋旺角街頭嘅聲浪，而佢又好心急，想我地快d 影唔好阻住佢做生意
不過呀叔都係專業嘅，佢教咗我地擺幾個post 仲有普通嘅錫同攬下咁，呢d 相就係我地美好回憶嘅證據，總共曬咗兩份，我地每人一份



影完相之後我地再行咗陣街，我陪佢睇下波鞋，佢又陪我睇下衫，不經不覺原來都已經四點

「我地要走啦，去下一站啦」Rick 拉住我，唔俾我行去間賣韓國衫嘅鋪頭
「我地仲有下一站㗎？去邊？」我俾佢扯住，左腳戟右腳，失平衝，好彩呀Rick 及時扶住我手脾，唔係又差d 仆街
「你陣間就知㗎啦，你今日只需要做嘅事就係跟住我」

我地行落地鐵站，搭地鐵過海，原來我地嘅下一站係中環？