十六歲但非處子身嘅女孩: 4.3 共同朋友圈
平凡冇趣嘅返學日子過得真係快，話咁快就到咗聖誕假，今年冬天一d 都唔凍，都唔知點解香港嘅天氣咁反常，明明已經12月但朝早都仲有20度
「大家聖誕得唔得閒？約出黎打邊爐好冇？」Ceci 喺我地個「狗男女」wts group 到問
「我唔得閒，約咗人」我喺wts group 到回應Ceci
「夠啦，你唔好再出聲啦，曬死我d 單身狗，我聖誕節就唔出街㗎啦，費時俾閃光彈曬親」Ivan 喺到講，令外再加個喊喊同掩面嘅emoji
「Anki 重色輕友！」Reese 上水覆wts再加個鄙視emoji
今年聖誕節當然會同呀Rick 一齊過啦，怪我重色輕友都冇辦法㗎啦，咁重要嘅節日當然想同重要嘅人一齊過
其他人就已讀不回，睇怕聖誕節正日都係約唔齊人，唯有睇下其他日子有冇人得閒啦，其實約出黎都係想一班人一齊傾下計敘下舊，除咗傾功課嘅野之外，都可以講下其他八掛野
「咁一係23號啦，約早咁多應該可以啦掛？」Ceci 再問多次
「sorry 呀，我20號唔喺香港」智儀回覆
「唉，咁你幾時返到呀？」Kenneth 問
「22號，不如我地約23號好冇？」智儀問返其他人
「OK」Mika 答，「＋1 」，「＋2」，「＋3」，「好」，「ho ah 」
「咁好啦，就23 號大家到時唔好放飛機呀」Ceci 補多句
我地約齊喺邊爐鋪出面等，最早到嘅係智儀，跟住就係Mika 同Ceci 一齊黎，然後其他人陸陸續續咁到齊
「難得今次呀豪你準時喎」Cyrus 拍一拍呀豪嘅膊頭
「今次係難得嘅一次，我諗都冇下一次會準時」呀豪笑笑口咁回應
「靚仔靚女，想食d 咩？」呀姐用獨特嘅口音黎同我地落單
Ceci 點完野之後就交俾呀姐，我地呢班人真係一齊玩得太耐，唔知係咪因為咁，就連我地每次打邊爐都已經唔洗再拗食邊樣食嗰樣，已經清楚曬大家想要d 乜，或者可能我地成日一齊玩一齊放lunch 食飯，我地嘅口味已經變得好相似
「喂Anki，你聖誕節正日又約咗男朋友仔呀？你呢d 咪就係聖誕放閃嗰d 仆街囉，每逢節日都要避開你先得」Ivan係唔會放過任何一個寸我嘅機會，冇計啦，在座咁多位我識得最耐嘅就係呢條友，而佢亦都係我最fd 嘅異性朋友
Ivan 講完呢句之後令到場面有d 尷尬，因為Cyrus都在場，但係奈可我地同一個圈子，有好多說話同場合都在所難免
我望一望Cyrus同佢四目雙投，佢對我露出一個微笑，就算我地九個人出黎敘舊同食飯，其實我都盡量避免同佢有接觸或者對話，始於大家曾經都咁親密，有好多野都好難放低
「講呢d，你呢種溝唔到女嘅可憐蟲注定A0 畢業啦」我笑住答佢
再望一望Cyrus，佢已經夾緊野食
「咁智儀呢？你聖誕節係咪都係同男朋友過？」Ceci 諗住幫我地呢場尷尬嘅飯局解圍
「我諗未必係啦.....」智儀有d 口痓痓
「點解呀？」Kenneth 追問，個口仲成口肥牛
「佢話佢想25 號同佢學校d 同學一齊過，所以佢24 號會同我一齊慶祝聖誕」智儀一路夾野一路答
「吓，唔係掛，我睇IG d 語錄話如果男朋友唔留聖誕正日俾女朋友，好大機會係有第二個，所以分時間俾另一個女人喎」Mika 搶答
「唓，你咁講法，如果24 號平安夜唔一齊過，25號先陪你，咁佢都係有一日唔陪你過啦，唔通陪少一日都叫出軌咩」Cyrus 反問Mika 轉頭，個眼神好不爽
「咁重要嘅日子就緊係想同重要嘅人過㗎啦，留正日俾女朋友，平安夜同fd 過都唔得咩？又或者遲d 先同fd 過唔得咩？」我又插多一句
呢句話都擺喺我心裡面耐，我好記得之前Cyrus 都唔係正日同我一齊過生日，佢仲要衰到係28 號先同我過，不過我都忍，因為我包容佢，我接受佢貪玩嘅性格，但係佢咁做係完全冇理過我嘅感受，佢係冇第二個，不過我覺得佢係唔重視我，將我擺到最後，同所有朋友、小學同學、平時一齊操水嘅fd、屋企人過完聖誕，去到最後先記起我
「你地唔好再咁講啦，嚇親智儀啦」Reese 摸一摸智儀個頭，見到智儀個樣都好擔心
「大家食野啦」最有作為都係呀豪嘅呢句
由邊爐鋪行出黎，雖然呢個聖誕一d 都唔凍，但係街上面已經好有聖誕氣氛，有掛住五顏六色閃燈嘅天橋，亦都有大大個聖誕老人吹氣公仔
「咁多位，一唔一齊食埋糖水？」Ivan 問我地班女仔
「好呀，冇所謂」Mika 帶頭話好，之後我地成班人一齊去上次我同Rick 食過果間糖水鋪
「你地有冇諗過2017 年咁就過啦，一年真係過得好快，我地好快就升中六，之後好快畢業，好快過18歲，又要出黎做野」Reese 突然之間好感慨咁講
我地成枱人都靜曬，因為現實就係咁殘酷，時光總係不留人，冇可能成世人都好似讀書時期咁開心，青春永遠都係最刺激、最熱血，過多年亦都好難再約一大班朋友一齊出黎食飯
「咁所以我地咪要好好咁把握而家16 歲嘅呢年囉！之後嘅中六果年又要溫書又要考DSE，18歲之後又要投入社會，咁點解唔喺16 歲呢年玩盡佢？有咩試好今年試，有咩玩好今年玩」我有感而發
「我喺呢剩餘讀中學嘅時光有一個目標，就係畢業之前脫離A0 ！」Ivan 好憤恨咁講
「你呢個目標應該永遠到達成唔到㗎啦」我寸返Ivan
嘻嘻哈哈，咁又一晚。我想我十六歲有d 特別d 嘅經歷，試一d 我從來未試過嘅野，究竟呢樣十六歲就可以做嘅事會係點呢？