[恐怖/探險] 達德詭校: 4
兩天後……
樹木林立，昆蟲隨處可見，作為一個城市人，還真不習慣。
我和大哥陳成並肩而行，我四周張望，大哥則淡定自若，形成鮮明對比。
「今次再返嚟，真係驚左好多……」後方的Sing說。
「你咪驚啦，以前嘅膽量去曬邊……」他的女友阿怡回應。
是的，Sing最後還是來了，原來拍攝當日有合共三個人，North、Sing和阿怡。North上鏡，其餘兩人則負責攝錄、背裝備和尋路。
我們四人跟著楊導遊，前往達德學校。
害怕，是一定有的，畢竟目的地是所詭校。
「細佬，你究竟驚乜嘢。」大哥問我。
「有鬼囉。」我乾脆回答。
「呢個世界冇鬼架。」大哥說。
「點解你咁肯定？」我反問。
大哥眺望遠方，沉靜一會，彷彿在思考著什麼。
「或者用例子講會比較好。」大哥終於開口：「喺起青馬大橋之前，青衣岸邊一帶有幾間廢屋，一直都有鬧鬼傳聞。」
「例如呢？」我問。
「例如有奇怪嘅腳步聲、血紅嘅字句、突如其來嘅喊聲。」大哥繼續說：「唔少坊間嘅人都避之則吉，更有啲探險人士嚇到暈低入醫院。」
「之後發生咩事？」
「因為起橋關係，政府安排左食環署嘅人入去調查，發現原來係個露宿者搞鬼，嚇走啲人，等自己可以霸住間屋住。」
「呢個世界冇鬼，鬼呢個概念係由人創造，係由我哋賦予意義。」大哥總括。
我們來到一處斜波，便停止對話，專心看路。
鬼這回事，我還不能判別真假。
「阿怡，小心。」Sing一手抓著樹幹，一手攙扶自己的女友。
「我冇問題，你行啦。」阿怡回應。
「小心割到手，啲樹唔係平滑架。」楊導遊提醒。
他與大哥年紀相若，身穿白色長衫和米色長褲，一看就知道是行山專家，知道淺色衣服能夠防蟲。
「楊導遊，我哋幾時到。」我問楊導遊。
「大概重有十五分鐘路程，始終我哋係繞山路。」他回答：「同埋叫我譯哥得啦，『翻譯』個『譯』。」
楊導遊是大哥請來的，負責帶路。
其實Sing和阿怡都知道方向，可是多一份照應總是好事。
這天風和日麗，卻沒有風和日麗的心情。
我的內心無比沉重……
「趁呢段時間，我想預先講定注意事項。」楊導遊忽然開口：「入左邪僻嘅地方，記住唔好無啦啦搭人哋膊頭，呢個係第一。第二，唔好喺人哋後面叫人，要講就走去人側
邊講。第三，唔好擰轉頭。嚴格嚟講，第一同第二都係為左避免第三嘅問題，所以請大家千萬小心，唔好轉頭。」
「唔？」大哥好奇：「譯哥你都信呢啲嘢？」
「寧可信其有呀，阿成。」楊導遊回答。
聽說，靈魂由三把火支撐，分別位於頭頂、左肩和右肩。倘若無故轉頭，就會失去雙肩火焰，容易被鬼魂支配……
「呢個我都聽過……」Sing嘆氣。
「小心啲就好……」阿怡說。
今次探索詭校，總有著奇怪的不安。
危險的事情，即將到來。
然而，我卻要堅守下去。
「叮鈴鈴叮鈴鈴叮鈴鈴！！！」驀然，手機傳來響亮的聲音。
「嘩，嚇死我。」Sing幾乎直接跳起。
「唔好意思。」我看看電話號碼，瞥見三字頭的數字，便立馬掛線，並轉回震機。
「唔好再響啦。」Sing苦笑，摸著胸口。
就在此時，大哥按著自己的褲袋，知道有電話來。
幸好，他一早轉了震機，沒有嚇倒任何人。
大哥抽出電話，走到一邊，看來是緊急事項。
「乜咁啱一齊有電話嘅？」阿怡奇怪。
「係囉？我都唔知。」應該是剛好而已。
樹葉隨風飄逸，一塊黃葉落在腳邊，彷彿在暗示些什麼……
「而家重有五分鐘路程，差唔多到。」楊導遊從不轉頭，以身作則。
「唉，我開始有少少後悔嚟……」Sing說。
「咁不如返去啦。」阿怡拉著Sing。
他們似乎不願堅持……
然而，我的確需要他們。
「Sing，你記住自己點解嚟。」我步至Sing旁邊：「唔通，你真係唔想知道？你真係可以俾嗰條刺跟你一世？」
「我哋……」阿怡不滿。
「你講得啱，我唔可以乜都唔知，就咁算數……」Sing下定決心，繼續旅途。
「Sing呀……我係怕出事……」
「得啦，唔好講。」Sing不願爭論。
縱然前路茫茫，我都要探索到底。所有答案，就在達德小學裡。
「話說，你哋對達德學校有幾多了解？」楊導遊打斷我們。
「傳聞有個紅衣女校長喺廁所吊頸自殺。」阿怡回答。
「重有呢？」
「呢度附近據聞有亂葬崗，係六日戰爭嘅後果。」出發前，我做了不少資料搜集。
「哦？呢個你都識？」楊導遊訝異。
「唔好意思，乜Q嘢係六日戰爭？」大哥回來，加入話題。
「英國接手管制香港，當時屏山鄧氏家族不滿反抗，同英國打左六日戰事，死左六百個村民，而只有一個英國士兵受傷。據聞個亂葬崗就喺達德小學附近。」楊導遊解釋：
「不過冇聽過好正常，英國政府處理得好低調，重實施左唔少懷柔政策，塞住唔少人個口。」
難怪，達德小學會如此猛鬼……
說完，我們已經來到達德小學正門。
「好啦，我哋到啦，記住我啱啱講嘅嘢。」楊導遊鄭重提醒。
「唔好驚，唔好驚……」Sing深呼一口氣。
「後生仔咁驚做乜，明明日光日白。」大哥諷刺道。
來到大門前，我也不自覺地嘆氣。
既是恐懼，又是無奈。