《香港傭兵》: [Day 24－三合成立] PART 46
搵交打...呢樣基本上我都預咗...
我哋身上個個都有晒架生咁...唔係上嚟搵交打...唔通上嚟山頭BBQ咩...
之但係...就咁睇...對方六個人...六個人身上都唔見有武器...
留心啲...再睇清楚啲...除咗話有啲似我哋SPIRIT嘅行者長袍之外...都唔覺有精神刀柄咁嘅物體插喺佢哋腰間...
咁點打吖？定係佢哋有更強勁嘅武器...唔知收埋喺身體邊個部位？
長黑髮男人行前多一步...摸住腰間嘅日本刀...左右來回行兩步：「嗰個李軍呢？唔見佢嘅？死咗喇？」
李...軍？又係咩人？
耶穌伯伯摸摸頭：「李軍個小子...咁多年佢每個月都上嚟挑戰～話唔憤氣俾我一拳收皮喎～不過咁多年佢都係俾我一拳收皮～就喺早幾日咋嘛～聲大大咁阻住我嘆茶...咪一拳收佢皮囉～而家又返咗去苦練喇～你可以喺度等佢下個月再嚟嘅～再唔係你返入去搵佢囉～」
阿月嘅爸爸接住講：「係咯～李軍一定好期待同你交手～佢話呢生人必定要打低你同外父～」
長黑髮男人冷眼打量住耶穌伯伯同阿月爸爸：「車...連一個死老鬼都打唔贏...有乜資格同我交手？」
耶穌伯伯帶住慈祥嘅微笑打量住長黑髮男人：「嘩...你睇少我吖？定係你太高估你自己吖？」
長黑髮男人冷眼打量住耶穌伯伯：「你都仲係當我小朋友咁睇...」
耶穌伯伯繼續Keep住慈祥嘅微笑打量住長黑髮男人：「你喺我心目中...幾時都係一個小朋友呢～」
唔知點解...喺佢哋嘅對話當中...總係充滿住...溫馨...
雖然聽起上嚟好似互串緊咁...但個感覺總係...總係充滿住...暖暖嘅親情...
阿月爸爸行前兩步：「咁不如就等我做你嘅對手...」
「你？」長黑髮男人冷眼打量住阿月爸爸...指指我同綽姿，「莫講話我個囡...我徒弟你都打唔贏...」
等等先...綽姿係長黑髮男人個囡...我係佢徒弟？！
我幾時有個咁型嘅師父？！
阿月爸爸充滿自信咁打量住師父：「我勸你就唔好低估我...話晒我都成功將三個領域統一...」
三個領域...統一？
邊三個領域？
師父冷眼打量住阿月爸爸：「哦？原來已經統一？都啱嘅...都咁多年...仲未統一嘅話...無法再次實現無限能源演算...能量一早就已經耗盡...一早玩完...不過搞清楚一點...元朗領域係由我打返嚟！」
元朗...領域？！
先唔好理咩統一...咩無限能源演算...咩能量一早就已經耗盡...咩一早玩完...
元朗...點會係領域？
元朗就元朗啦...做乜要加個領域喺後面呢？係都應該叫元朗國啦！
阿月爸爸點點頭：「係係...元朗領域的確係你嘅功勞～我唔單止冇份參與...嗰時...我直頭仲未入去...仲係蒙在鼓裡...不過就算係收回天水圍領域...都唔係我嘅功勞...係你班兄弟姊妹～」
天水圍...又係加個領域喺後面...
究竟...而家係...咩情況吖？
師父皺一皺眉：「阿風...阿賢...天欣佢哋...哼...都係背叛我嘅人...」
背叛？
世人...都係信唔過...
阿月爸爸帶住微笑擰擰頭：「你又唔好咁話佢哋...咁多年佢哋都好掛住你㗎～仲成日話我冇用～如果係由你帶領會好好多～佢哋都等緊你返去㗎～」
師父冷眼打量住阿月爸爸...嘴角卻帶住點點笑意：「咁係你弱姐...」
係開心咪笑出嚟囉～做乜收收埋埋扮晒Cool咁姐～
「最重要嘅係...所有嘢都係由...」阿月爸爸指指佢面前嘅耶穌伯伯，「搞出嚟...唔關我哋事㗎...」
所有嘢都係由...耶穌伯伯搞出嚟？
「咳...咳！」耶穌伯伯咳兩聲。
阿月爸爸立即收返埋隻手...行前多兩步：「咁就由我呢個妹夫做你嘅對手啦～」
師父亦打量住阿月爸爸...行前多兩步：「閘住...我仲未認同你係我妹夫...打過先講...」
真係...真係要打...
師父同阿月爸爸互相對望...
成個氣氛...好緊張...令人窒息...
「等等...望住呢個曾經屬於自己嘅面容...身軀...總係好奇怪...」師父皺一皺眉...再望一望阿月媽咪，「你係點樣同佢相處㗎？」
阿月媽咪搭住阿月...莞爾一笑咁望住師父：「其實我都花咗好長嘅時間先接受到～始終都係哥哥嘅面容～哥哥嘅身軀～」
師父冷眼打量住阿月媽咪：「你咩意思...我好失禮你咩？」
阿月媽咪擰擰頭：「唔係唔係～哥哥又點會失禮我呢～之但係呢...即係呢...總之就...奇奇怪怪咁啦～」
「真係想交換返身體...」師父冷眼打量住耶穌伯伯，「你一定有辦法㗎啦...即使唔係換腦...」
阿月媽咪立即揮晒手...擰晒頭：「嘩嘩嘩唔好咁搞喇...難得已經接受到...又習慣咗咁多年...唔好而家先嚟要我再去接受另一個面容身軀啦...」
綽姿媽咪都面紅紅冷冷放下一句：「我都唔想...」
師父無奈咁擰擰頭：「我都係講吓姐...」
阿月爸爸攤開雙手：「咁就...準備...」
突然...喺阿月爸爸身邊...周邊...開始有...一點點...一點點黑色...黑色...黑色一點點...粒子？！
黑色一點點...黑色一點點...越嚟越多...越嚟越多...
喺阿月爸爸身邊...周邊...越嚟越多黑色一點點...黑色粒子...突然出現...
一點點...一粒粒...越嚟越多...越嚟越大粒...
大大小小...大細不一嘅黑色粒子...並無任何光澤...
而且...唔似係固體...比較似係...液體...似係...石油...
越嚟越多...越嚟越密...大細不一...有如石油一樣嘅黑色粒子...黑色圓球體...就喺阿月爸爸身邊...周邊出現...
然後...突然...有如石油一樣嘅黑色粒子...黑色圓球體...向住阿月爸爸身上黐埋去...
一路快速咁黐埋去...同時喺阿月爸爸身邊...周邊...繼續有大細不一...有如石油一樣嘅黑色粒子...黑色圓球體出現...黐向阿月爸爸身上...
好快...就喺一瞬間...阿月爸爸身上...上上下下...前前後後...全身...全身都好似著上咗一件...一套...裝甲？
望清楚...一個黑色倒三角金屬面罩...
面罩嘅表面仲發出一層薄薄嘅...淡淡嘅綠光...
喺阿月爸爸全個身上...外表黑黑...金金...胸口中間有一個拳頭咁上下大嘅圓形物體...發出綠黑嘅光向四肢同頭部流動...閃爍...閃爍...好似流水...好似心跳...
全身就好似...以金屬...塑膠質料製造...
背後仲設有...刀鞘？
雖然睇唔得清楚背後...就隱約見到...有把黑色刀柄...仲有...刀鞘...
喺呢個位置真係睇得唔清楚...不過就隱約睇得出...刀鞘嘅外觀...相當複雜...
黑色嘅刀鞘外層...似金屬...似鋼材...同身體上嘅黑色金屬物料相似...
當我仲仔細咁打量住眼前...阿月爸爸身上呢套裝甲之時...
「Sacred-Armor...」師父冷冷放下一句...
Sacred...Armor？
“吱...”黑色倒三角金屬面罩由中間工整咁向左右兩邊分開...
阿月爸爸嘅面孔就由倒三角金屬面罩中間出現：「冇錯...正正就係Sacred-Armor～」
咁即係咩？
就咁睇...再加上字面分析...應該就係穿著式裝甲...
之但係...唔係就咁穿著...
頭先...頭先係有好多...好多...無數咁多黑色嘅...
師父打量住阿月爸爸：「竟然可以誘導到隱藏喺空間之中嘅ADAM粒子...唔係...喺空間之中嘅ADAM粒子含量並唔多...你係將一定數量嘅ADAM粒子帶喺身邊周圍...當有需要嘅時候再誘導去自己身上...結合出Sacred-Armor...」
嘩...好深...一句都聽唔明...
之但係...提到ADAM...可以穿越時空...返翻去過去嘅ADAM...
阿月爸爸都知道...知道ADAM收埋咗喺邊？
咁講法...我係唔係可以問阿月爸爸？
但...我仲係開唔到口...郁唔到...唔受控...
阿月爸爸點點頭：「可以咁講...不過又唔可以話帶喺身邊...應該係...收喺另一個空間...」
收喺...另一個空間？
師父皺一皺眉：「嗯？」
阿月爸爸諗一諗：「將Sacred-Armor嘅ADAM粒子收藏喺另一個空間之中...到有需要嘅時候，就喺嗰個空間之中Call返出嚟...誘導去自己身上...結合出Sacred-Armor...」
越講就...越複雜...
師父冷眼打量住阿月爸爸身上套Sacred-Armor：「竟然...研究到呢種技術...呢十幾年...裡面真係改變唔少...我喺呢個能量被瓦解嘅地獄生存太耐...」
十幾年...能量被瓦解嘅...地獄...
師父點一點頭：「不過...竟然可以喺被LILITH粒子包圍之下...使用以EVE能量驅動嘅Sacred-Armor...真係唔簡單...」
LILITH粒子包圍之下？EVE能量？
阿月爸爸點點頭：「正正就係因為收埋喺另一個空間之中...所以受影響唔算太大...不過都係有影響...唔喺裡面之餘...仲要被咁高濃度嘅LILITH粒子包圍之下...唔可以去得太遠...亦唔可以用太耐...始終唔喺裡面...冇辦法借助無限能源...而儲存喺Sacred-Armor內嘅EVE能量都會消耗...同時會被周圍嘅LILITH粒子瓦解...」
好深...超深...
科技嘅嘢我真係識條鐵...
阿月爸爸帶住尷尬嘅微笑摸摸頭：「其實呢啲都係你嘅好兄弟阿風講嘅...佢都係一輪嘴咁講咗一次...但科技呢啲嘢我真係唔清楚...你都係返去問佢啦～」
「哈...」師父冷笑一下，「阿風呢個衰仔...我一定會教訓佢一餐...」
阿月爸爸點點頭：「佢話已經有晒心理準備～就等你返去～」
師父摸住腰間嘅日本刀：「等我同你打完先再講...」
阿月爸爸攤開雙手：「咁你唔介意我著住Sacred-Armor同你對戰吖嘛？」
師父冷眼打量住阿月爸爸：「我介咩意？你睇少我？定係你太高估你自己？我喺LILITH粒子含量最高...濃度最高嘅地方...生存咗十幾年...你以為你身上件垃圾...可以同我身體嘅變化相提並論咩？」
喺LILITH粒子含量最高...濃度最高嘅地方...身體嘅變化...
阿月爸爸帶住微笑點點頭：「咁就最好...你都唔好忘記...我同你都係差呢場決鬥...我都等咗呢一日...好多年...」
師父上半身向前傾...右腳向後踏...左手放喺刀柄上...擺出準備姿勢：「我當然冇忘記...就欠你一場決鬥...」
要打喇...要打喇...真係要打喇...