《香港傭兵》: [Day 24－三合成立] PART 07
眼定定咁望住手上支散發住刺眼紅色光芒嘅精神液...有啲迷惘...
Owner帶住微笑打量住我：「唔使諗咁多嘅～到時就會知㗎喇～袋好佢啦～」
吓？吓？到時就會知？
我唔知Owner係唔係真係知我心裡面諗緊乜...定係故弄玄虛...
其實我都唔知自己迷惘啲乜...就只係...一直被散發住刺眼紅色光芒嘅精神液吸引住...
我都袋返好支散發住刺眼紅色光芒嘅精神液...
「至於你哋要點過去呢...」呢把係...Owner把聲...
『係咯...我哋可以點出去？深井已經俾解放軍封咗...』我哋要去科學園...唯一嘅出口就係深井...
但深井已經被解放軍封咗...
陸路行唔通...水路？
尋日殺戮特區...今日屯門都搞到立立亂...
黃金海岸嗰邊而家係點...真係唔知...
一陣走到過去冇船搭...白行一趟就無謂...
咁我哋仲可以點出去？
「出去方面呢...」Owner諗一諗，點點頭，「而家呢個時候...你哋SPIRIT...喺出面嘅人都殺緊入嚟集合...應該都差唔多...差唔多殺到去深井～」
你哋SPIRIT...Owner講得出“你哋SPIRIT”...即係話...佢唔係我哋SPIRIT嘅人...
之但係...點解Owner會知道咁多嘢...
又有極鮮艷...神秘嘅精神液...
而家仲...知道我哋SPIRIT喺出面殺緊入嚟...
我哋自己都唔知...唔知道出面嘅行者...殺入嚟...集合...
我哋只係知道...自己要留喺原處...待機...等待下一步指示...
原來...原來出面嘅行者...入緊嚟集合...
Owner點會知...唔係我哋SPIRIT...點會知身為SPIRIT嘅我哋都唔知嘅事...
「你哋可以趁亂衝出去嘅...」Owner合埋對眼諗一諗，擰擰頭，「不過就有啲危險...」
趁亂衝出去...唔單止有啲危險...
應該係...一個唔好彩...捲入戰事當中...唔使出去啦...
「或者...」Owner又合埋對眼諗一諗，「你哋可以...經天門...」
經...天門？
「天門...哈～」Owner合埋對眼笑一笑，「只要你用我張通行證...天門嘅人一見到...一定會俾你哋過...通行無阻～」
用Owner張通行證...一定通行無阻？
都係嘅...上次用過Owner張通行證...的確係過到去...
之但係...而家呢啲非常時期...又會唔會俾佢哋察覺到...我哋係SPIRIT？
我哋SPIRIT同天門...即係逆行者...對立㗎喎...
萬一俾佢哋察覺到...仲會唔會通行無阻？
Owner係唔係真係知㗎？
唔會係老點吖化？
Owner冷眼咁望住我：「唔好咁望住我...都話咗我知道嘅比起你知道嘅更多咯～你只要跟住做就得㗎喇～」
又係咁吖？
點解又要我跟住做吖？
點解又要我牽住鼻子走？
「唉～」Owner帶住微笑擰擰頭，「反正俾你知咁多...你都改變唔到㗎啦～」
俾我知得多...都改變唔到...
「而家...」Owner又合埋對眼諗一諗，「天門嘅出入口...已經交由國安局去守...解放軍準備動員全軍力去深井...你哋SPIRIT同國安局仲有關係...佢哋見到你哋都會俾你哋過...之但係...再過多陣就話唔埋喇～」
解放軍全軍力去深井...
就算唔係大戰緊...大戰都一觸即發...
而天門嘅出入口就交由國安局把守...
的確...事態冇變嘅話...我哋SPIRIT的確仲有同國安局有合作關係（雖然仲係唔知有乜合作）...
咁Owner又點解會話再過多陣就話唔埋呢？
久久冇出過聲嘅日倫突然開口：「唔怪之得...原來係想搵國安局去牽制逆行者...之但係...點解過多陣就話唔埋？」
Owner帶住微笑打量住日倫：「諗住拋少少磚就想引舊玉？你估我係飛揚咩～」
做...做咩姐...講講吓又講落我度...
Owner帶住微笑擰擰頭：「你知嘅嘢...我比你知得更清楚...而你唔知嘅...我又冇必要話俾你聽～反正到時你哋就會知～所有嘢都係一樣～冇改變～」
咁...咁深嘅...
講到好深...好玄...唔理解...
究竟...究竟Owner係...
『究竟你係咩人？』我忍唔住要再問一句...
點會...點會好似...深不可測...
「哈哈～」Owner帶住微笑擰擰，「好啦好啦～我話過應該要親口講你聽...雖然...已經係過咗去嘅事...但事實上...我始終都係...十二預行者之一...白晝～」
十...十二預行者之...白晝？！
日倫同羅羅睜到對眼大一大...眼都凸埋...對眼珠差啲跌埋出嚟...
十二預行者...唔係得返恐怖一個...其餘十一個都失蹤...
Owner...稱號白晝...係失蹤嘅十一個預行者...其中之一...
Owner帶住微笑擰擰頭：「我都估到會嚇親你哋㗎喇～至於我所知嘅...全部都係因為...死海文書～」
日倫同羅羅聽到“死海文書”呢四隻字，就更加驚訝...口震震咁：「死...死海...」
死海文書...係乜嘢嚟？
點解...點解日倫同羅羅一聽到...會咁大反應？
Owner諗一諗：「恐怖所知嘅...未必知...」
恐怖所知...未必知...係咩意思？
「好喇～」Owner望一望我同綽姿，「時間都差唔多...你兩個都係時候要出發～」
要...要出發...
「至於你兩個...」Owner望一望日倫同羅羅，「有另一個地方...要你哋兩個去...」
有另一個地方...要日倫同羅羅去？
日倫同羅羅互相對望一眼...
Owner帶住微笑打量住日倫同羅羅：「有關三原核嘅情報...你冇理由唔想知～仲要係預行者親口講...你冇理由唔聽～」
日倫同羅羅吞咗一大啖口水...點一點頭...
Owner呢句說話...點解總係令我感覺到...利誘之餘...又帶少少...脅迫？
Owner又喺個櫃桶摷兩摷...就摷咗張...白色卡片...放喺檯面...
我望清楚...呢張殘舊...黃黃地色...仲有唔少摺痕...咖啡跡...上面仲印有QR Code嘅白色卡片...就係上次嗰張通行證...
冇錯...我認得...就係呢張...上次都係用呢張...幫Owner送咖啡豆俾宋伯伯...
『一張...淨係得...一張...』得一張通行證...
「一張就夠～」Owner帶住微笑點點頭，「正如我頭先所講...就係一張...就足以令你哋兩個暢通無阻～」
真係...一張就足以我哋兩個暢通無阻？
「好喇～」Owner點點頭，「飲埋杯咖啡就好行喇～」
飲...飲埋杯咖啡就...好行...
我同綽姿拎起杯咖啡...望多一眼...一啖飲埋杯Espresso...
我拎埋放喺檯面上嘅通行證...同綽姿一齊起身...
Owner同我哋揮揮手：「好行喇～」
『哦...哦...』我都同Owner揮揮手...
羅羅一面擔心：「要小心啲...」
『嗯...放心...你哋都係...』小心...小心...大家都要小心...
羅羅同日倫都點點頭後...
雨姐同輝哥都帶住微笑，向我同綽姿揮揮手～
我都向雨姐同輝哥點點頭...揮揮手後...就同綽姿一齊步出Today Coffee...
“叮 叮”
同綽姿肩並肩咁行...行多幾步...
『究竟發生咩事？我以為你會大開殺戒...』有好多嘢都搞唔清楚...而呢樣或者係唯一一樣...可以得到答案...
「我都唔知...」綽姿擰擰頭，「我睇到任務更新...本來就打算立即過嚟執行...之但係...當我拎住支精神液喺手...唔知點解...捏唔落...」
『捏唔落？』綽姿佢..都係...同我一樣？！
「嗯...」綽姿點點頭，「唔知點解...總係有總感覺...唔好捏...唔好精神化...隻手就好似唔受控制...郁唔到...捏唔落...然後...我就同日倫行咗過嚟...」
真係一樣...綽姿所講...我都有同樣嘅感覺...
係完全一模一樣...綽姿所講嘅...同我感覺到嘅...一模一樣...
綽姿望住前面行：「入到去...嗰個Owner就話嚟咗喇？仲沖緊咖啡...坐低等陣先...等埋飛揚佢哋先...」
『等埋我哋...』我同羅羅...
「嗯...」綽姿點點頭，「佢係咁講...我同日倫就坐低...等咗冇幾耐...你哋就嚟到...」
『咁樣...』Owner佢...真係早就知道...
好似一切都...掌握喺佢手上咁...
「十二預行者之一...」綽姿諗一諗，「除咗恐怖之外...其餘十一個都無故失蹤...估唔到...估唔到其中一個...就係Today Coffee嘅Owner...」
『既然...Owner係失蹤嘅十一預行者之一...點解我哋嘅任務係要殲滅佢哋？』講起上嚟...又好似講唔通...
「白晝佢講得出...係恐怖...一定係佢...係佢派你哋嚟...終於都搵我喇...」綽姿諗一諗，「即係話恐怖終於知道白晝嘅藏身地...搵到佢...要殺佢...」
『恐怖要殺白晝？佢哋都係...預行者...』預行者...同預行者...
「嗯...」綽姿點點頭，「照咁睇...十一個預行者失蹤...都係同恐怖有關...」
『你係指...除咗Owner之外...其餘嗰十個都係為咗避開恐怖嘅追殺而躲藏起嚟？點會吖...佢哋都係預行者...十一個預行者...會唔夠一個恐怖打？』唔好講笑啦...
假如話同級嘅行者，能力上都有出入嘅話係可以理解...
之但係...十一個對一個喎...就算出入大...都唔會大得咁離譜吖...
要知道...先行者Number 2嘅片翼已經係勁到痴線...
Number 1嘅一尾雖然只係見過一面...但勁過片翼就真係勁得更痴線...
然後而家講緊嘅係佢哋之上嘅預行者...
假如十一個加埋都唔夠一個恐怖揪嘅話...唔止唔止...
講到要躲藏嚟避開恐怖...即係話恐怖有壓倒性嘅優勢...
咁講法...一個恐怖都足以滅世啦！
「唔係咁...」綽姿擰擰頭，「應該唔係咁...背後更加複雜...」
『吓？』更加複雜？
我而家諗諗都覺得好複雜㗎喇喎...
「雖然我都唔清楚...」綽姿擰擰頭，「之但係十一預行者失蹤之後...仲有內鬥...背後總會有一個更複雜嘅原因...」
內鬥...我都聽過日倫提過一兩句...
「我...印象中...」綽姿皺住眉...
『嗯？你印象中？』我打量住綽姿...
綽姿嘅眉頭越皺越埋...越皺越埋...
「唔知...唔知...係印...象...定...定係...」綽姿眉頭緊皺咁擰擰頭...
見綽姿好似諗到好用力...又好辛苦咁...
『唔知都唔緊要...或者...而家唔知...好快就會知...』好多嘢都係...唔需要知...就點都唔會知...
但到咗需要知嘅時候...自自然然就會知...
一直都係...咁多日嘅未來生活...一直都係...
不知不覺又好...明知都好...總係咁樣...
只需要知道自己需要知道嘅事...仲要係...既定嘅時間...
時間一到...就會知道...
「嗯...」綽姿點一點頭，「而家都係過咗去元朗先...」
『嗯...由元朗出去...去科學園...』呢一步...就係而家我哋要行嘅一步...
我同綽姿繼續行...好快就行返過嚟千瘡百孔嘅Vcity...
望住滿目瘡痍嘅瓏門一直行...望住玻璃幕牆已經盡碎嘅商場入口一直行...
我仲有冇機會...再有冇機會...見返有完整玻璃幕牆嘅Vcity...正正常常嘅瓏門...我同阿月嘅家...