《香港傭兵》: [Day 24－三合成立] PART 06
點解...點會係...Today Coffee...
仲要係...係...殲滅？！
殲滅Today Coffee...意思係要...成間Today Coffee鏟平？！
羅羅八八卦卦咁望望我手上部電話：「做咩做咩？」
『有任務更新...更新...』點會咁...Today Coffee有乜問題...點解要向佢哋下毒手？！
係邊個委託？
Today Coffee得罪咗咩人呀？
有冇咁大仇口呀？！
「有咩有咩？」羅羅拎部電話出嚟睇睇，「冇喎...我冇喎...」
『吓？你冇？』點會...我有...羅羅冇...
「冇吖冇吖...」羅羅遞部電話俾我睇睇，「我冇任務更新吖～」
我望住羅羅部電話個Mon...任務都係空白...等待通知...
真係喎...點解羅羅冇...
「更新咗啲咩吖？」羅羅又八八卦卦咁望望我手上部電話～
『呃...係要...殲滅Today Coffee...』我都望住自己手上部電話...仲係唔多相信...
「係Today Coffee...果然...」羅羅咬住下唇諗一諗...點點頭...
『吓？』果然？果然係乜吖？係茶吖？
「嗯？唔...」羅羅咬住下唇一諗再諗，「上次你帶我去...我就覺得好唔自在...好有危機感...覺得嗰度啲人...怪怪地...」
『怪怪地？』有乜咁怪？
「嗯...」羅羅咬住下唇點點頭，「佢哋三個...唔係普通人...唔係咁簡單...尤其係嗰個Owner...仲有...仲有坐喺窗邊嘅...白髮女仔...」
『唔係普通人？我又唔覺佢哋有乜嘢咋喎...都係好似普通老闆...普通員工...普通一間咖啡店...』只係...只係特別溫暖...
「你真係咁諗？」羅羅疑惑咁打量住我...
『係...係有啲特別嘅...不過...不過唔係...唔係...唔係嗰種...我都有帶過日倫去㗎！佢都冇話啲乜㗎！』係囉...日倫都冇乜點吖...
「日倫都有去過...」羅羅又咬住下唇諗一諗，「我都感覺得到...日倫係調查型行者...佢嘅觸覺應該比我敏銳得多...佢冇理由察覺唔到...係唔係佢有咩暗示...你Get唔到？」
有...有咩暗示...我Get唔到...
真係有暗示過咩？
真係只係因為我Get唔到咋咩？
「先唔好理呢樣...撳咗入去睇咗先啦～」羅羅指指我部電話～
『哦哦...』撳...撳入去睇睇...
我撳入去一睇...我嘅任務...
『殺死目標人物...杜王土...姜文雨...顧銘輝...徹底炸毀整間Today Coffee...』殲滅...呢啲就係殲滅...
「咁成員呢？得你一個？」羅羅又疑惑咁打量住我...
『成...成員...』我就撳一撳...成員...
我見到...除咗我之外...仲有...
『瓦...解...』係綽姿...綽姿仲要係做隊長...
「得你哋...兩個...」羅羅諗一諗...
我...同綽姿...綽姿...
『今次弊喇！綽姿一定...一定唔會留手！』綽姿殺人如麻...一定會...一定會殺死Owner...殺死雨姐...殺死輝哥...
會死...佢哋...佢哋全部...都會死㗎！
『唔得喇！要去阻止佢！』唔可以...唔可以俾Owner佢哋...
「吓？」羅羅一頭問號...
『要阻止綽姿...唔可以俾佢大開殺戒！』一定要...一定要保護Today coffee...保護Owner佢哋！
點過去...假如我同綽姿...都係同一時間收到任務更新...
綽姿佢...會唔會已經用上精神液...已經過到去...
精神液...用精神液...
我喺褸袋拎咗支精神液出嚟...
拎住支精神液...望住支紅色嘅精神液...
「做...做咩？做咩唔用？」羅羅都望住我手上支精神液。
『唔知...唔知點解...我唔想捏...』捏...捏唔落...
唔係捏唔到...
係...係我隻手...係我...我自己...總係好似...唔想捏...抗拒捏落去...抗拒精神化...
『唔得喇...時間無多喇...要趕過去喇！』我袋返好支精神液！
「之但係...唔精神化...」我冇等羅羅講落去...
『唔理得咁多喇...跑咗過去先啦！』我立即拖住羅羅隻手仔跑！
「喂喂...」
拖住羅羅隻手仔...向住市中心方向...Today Coffee方向跑！
跑得好快...出盡全力跑得超快！
一定要趕得切...一定要趕喺綽姿去到之前...去到Today Coffee大開殺戒之前...
一直跑...全力咁跑！
點解會...會係我同綽姿...
係好彩...定係唔好彩？
假如唔係我同綽姿...假如係其他行者...係羅羅...係日倫...
我諗...除咗我之外...冇一個行者會猶豫...
除咗我之外...個個都毫不猶豫...完成呢個任務...
對付一間咖啡店...對住三個普通人...
點解...係邊個嘅委託...係邊個要委託我哋SPIRIT...
好快就同羅羅跑到嚟新墟...
街上明顯多咗唔少黑色衣著嘅男男女女...
都係我哋SPIRIT...SPIRIT嘅行者...
成條街都只有我同羅羅係跑緊...其他人都仲係慢慢行...
佢哋...佢哋冇任務更新...冇其他任務要執行...
都係同羅羅一樣...等待通知...出嚟視察？
唔好理...唔好理咁多...而家要...要跑快啲...出盡全力再跑得快啲...
我同羅羅再跑得快啲...再快啲！
差唔多...差唔多見到Vcity...仲有一大段路...
要再快啲...要快過綽姿...一定要係綽姿之前趕到去Today Coffee！
我要...我要保護佢哋...以我嘅能力...保護我要保護嘅人！
我同羅羅極速咁跑過Vcity...羅羅明顯有啲唔係好跟得上...
我就唔理得咁多...要再跑快啲...出盡全力再超出全力跑...跑過三條馬路行...
喺條大直路...離遠就見到...Today Coffee...
仲喺度...Today Coffee...仲喺度！
應該...快過綽姿...比綽姿早嚟到...
我就望住Today Coffee門口跑...跑...跑！
當我差唔多跑到去Today Coffee門前...我望到...望到門前...塊牌...仲係“Closed”...
唔理喇...唔理係唔係Closed喇...入咗去先啦！
我一跑到去木門前...一手拉開木門！
“叮 叮！”
『Own...』當我想大叫Owner之時...
我見到Owner企喺櫃位入面...
雨姐同輝哥都坐喺落地大玻璃窗邊...飲緊咖啡...
而最驚訝...驚訝到我講唔到落去嘅係...係因為...我見到...
綽姿已經...坐咗喺...Bar檯前？！
綽姿...同日倫...都坐咗喺bar檯前...
點會...點...點會...
羅羅都企喺我身後...同我一樣...對面前所見...無法理解...
Owner喺部咖啡機前沖住咖啡，回頭望我一眼，帶住微笑點點頭：「嚟咗喇？終於都人齊喇～坐陣先～」
『哦...哦...』我就同羅羅行...行去Bar檯...坐喺綽姿身邊...
我哋四個...都坐喺Bar檯...唔出聲...唔出聲...
真係冇問題？
就咁坐喺度？
望一眼綽姿...木無表情咁坐定定...
再望一望日倫...皺住眉...雙手合十咁坐定定...
而羅羅都有啲坐立不安咁...
而家究竟係咩情況？
點解綽姿嚟到...又冇出到手...
“吱！吱～” Owner仲氣定神閒咁沖咖啡...
雨姐同輝哥又從容不迫咁嘆咖啡...
究竟佢哋知唔知道...我哋係嚟攞佢哋命㗎？
真係話唔埋...話唔埋綽姿會突然拔刀一閃...將佢哋三個...分屍！
Owner沖好四杯咖啡後，就將四杯咖啡放到嚟我哋面：「嚟～飲杯咖啡先～」
『唔...唔該...』我望住面前杯...深淵一樣黑嘅咖啡...
係...係Espresso...
我望住杯裡面...Espresso嘅表面...倒照得唔多清楚嘅...自己...
綽姿拎起杯Espresso...飲一啖...再飲一啖...
日倫同羅羅都拎起杯Espresso...飲一啖...
我都跟住拎起杯Espresso...細細飲一啖...再飲一啖...
呢種味道...呢種苦而不澀...甘而不酸...令我諗返起...宋伯伯...勾返起...飲過宋伯伯沖嗰杯Espresso...
唔係唔係...味道唔係一樣...而家我飲緊呢一杯...比起宋伯伯嘅...更加好飲...
點形容呢...
總係有種暖意...有種親切...有種...窩心...
Owner用塊乾布抹抹對手：「係恐怖...一定係佢...係佢派你哋嚟...終於都搵到我喇～」
『唔！』我差啲就噴咖啡...
Owner...Owner佢點會...點會噏得出恐怖...呢個稱號...
恐怖...我哋SPIRIT唯一決策人...唯一預行者...
咪住先...除咗話點解Owner會知...仲有...
係喎...個任務...個委託...
個委託一直都冇變...係強迫委託...只係更新咗任務...
仲要只係得我...同綽姿...
咁即係話呢個任務...都係強迫委託嘅任務...
而個強迫委託應該就係我哋SPIRIT...係恐怖指派...
而家連Owner都咁講...
咁點解Owner...好似知咁多嘢咁...
『你究竟係咩人？』我忍唔住衝口而出...單刀直入咁問Owner...
「我？」Owner帶住微笑指住自己個鼻，「我應該親口講俾你哋聽...但又覺得...應該要由你哋自己親自去搵答案～」
我哋...自己親自去搵...答案？
Owner帶住微笑望住綽姿：「你...應該已經見過過去嘅事～」
過...過去嘅事？
綽姿點一點頭...
綽姿...見過過去啲咩事吖？
「唔...」Owner諗一諗，點點頭，「應該太少...所以你都仲未清楚...假如想再清楚啲...想知道真相嘅話...就要去一個地方～」
想知道真相...要去...去一個地方？
Owner再點一點頭：「科學園...入唔到嘅黑門...」
科學園...黑門？！
科學園...講起科學園...我就諗返起...科學園嘅地下研究所...
上一次...滅絕異常生命體...最後...最後我哋去到...黑色嘅大閘門...
我哋都入唔到去...而且...咁啱就完成委託...撤離...
點解會...Owner點解會知道？！
Owner冷眼咁望住我：「你唔好咁望住我～我比你知道嘅...知得更多～只係...喺適當嘅時候...做應做嘅事就足夠～」
喺適當嘅時候...做應做嘅事就足夠...
「而家...係我所知道...」Owner喺個櫃裡面摷兩摷，又摷兩摷，「而我又應該要做嘅事...」
Owner喺個櫃裡面...摷咗兩支...精神液？！
「活在當下...」Owner將兩支散發出鮮艷紅光嘅精神液...放喺我同綽姿面前...
好鮮...好紅...我哋四個...都望住檯面上兩支...散發住光芒嘅精神液...
第一次見...呢種精神液...比起Level 3...鮮艷好多...好多...極多...仲會散發刺眼光芒...
係咩Level？點解Owner又會有...有精神液？！
Owner帶住微笑點點頭：「好似驚訝咁喎～未見過啲咁鮮艷㗎呢？唔出奇～唔出奇～呢啲都係我嘅得意之作～哈哈～」
係...係Owner嘅...得意之作？
『究竟...』我拎起支散發住刺眼紅色光芒嘅精神液，『精神液係點製造出嚟？』
支精神液...帶住點點溫暖...
就好似...暖包咁...
Owner諗一諗：「我只可以講...我嘅製造方法，同其他嘅唔同～」
Owner嘅製造方法...同其他嘅唔同？
其他嘅...係指我哋SPIRIT？
綽姿都拎住支散發住刺眼紅色光芒嘅精神液喺手...疑惑咁望住...望住...
Owner帶住微笑望住綽姿，點一點頭：「總之就唔同啦～」
綽姿皺一皺眉...然後將支散發住刺眼紅色光芒嘅精神液袋落褸袋...
總之唔同...
我就連我哋SPIRIT係點去製造精神液都唔知...又點會知要點唔同法...先製造到咁鮮艷...咁刺眼嘅精神液？
不過講開又講...單睇外表就夠晒唔簡單...但用落又會唔會真係可以幫我嘅精神化維持得耐啲？