《香港傭兵》: [Day 23－殺戮特區] PART 07
「片...翼？」日倫打量住我...
『嗯...綠色嘅粒子...除咗逆行者之外...片翼都有...』又係片翼...又關片翼事...
日倫點點頭：「我都有聽講過...喺片翼身上...曾經都出現過綠色粒子...」
『我直頭親眼見過...』已經唔止一次...我係指...又關片翼事...
羅羅同日倫都打量住我，然後日倫繼續問：「你...你有親眼見過...片翼...綠色精神化？我仲以為...係神化佢嘅傳聞...」
『正確嚟講...我係見住片翼紅色精神化期間...突然爆出綠光...背後出現一隻綠色天使翼...就好似尋日嗰個短白髮男人咁...不過片翼就...只有一閃...即逝...』片翼...點解咁多嘢都好似同佢有關咁...
「一閃...」日倫諗一諗，「即逝...」
『嗯...只有一閃...然後佢身上冇晒紅色粒子...亦冇綠色粒子...乜能量都冇晒咁...好似進入咗深層睡眠咁...』一連串...一連串同解放軍有關...同西貢有關...同ADAM有關...都好似同片翼有關...
日倫眉頭一皺：「突然進入深層睡眠？」
『嗯...之後一尾出現...帶咗片翼走...嗰陣時綽姿都喺度...』究竟片翼喺當中係飾演咩角色？
日倫同羅羅都望住綽姿...
綽姿冇出到聲...只係點點頭...
羅羅就谷起塊面豬登：「到咗而家你就咪收收埋埋啦！」
綽姿冷眼望一望羅羅：「你收埋得少咩？」
羅羅眼仔碌碌...眈天望地...
果然...大家都仲係收收埋埋...有所保留...
不過唔緊要...唔好話收收埋埋...就算係各懷鬼胎都唔緊要...
我都會遇神殺神...遇佛殺佛...
日倫諗一諗：「連一尾都...」
『咁講法...其實係唔係所有嘢都係由片翼搞出嚟？』咁多嘢都關片翼事...呢個大膽假設到唔到位？
日倫再諗一諗，擰擰頭：「應該就唔係...應該...係...」
『嗯？」竟然...
我唔係好奇日倫會有其他想法...或者再驚人啲嘅想法都唔出奇...
奇就奇在...佢會提出...
唔通...最唔收收埋埋嗰個...係日倫？
定係因為佢知得比我哋多太多...所以以百分比嚟計...收埋嘅資料...同我哋差唔多...甚至更多...
不過而家都唔係計算嘅時候...
而家...想聽聽日倫嘅見解...
「假如...」日倫諗一諗，「單單話只有片翼一個...或者有多幾個先行者...有多幾個執行者...咁認定係由片翼一手搞出嚟都不為過...之但係...你哋都見過一尾...」
我同綽姿...都見過一尾...
日倫繼續講：「一尾...先行者Number One...一直冇人見過佢...傳聞只會喺唯一預行者...恐怖身邊...只會執行恐怖指派嘅任務...你話一尾帶走深層睡眠嘅片翼...即係話係由恐怖指派一尾帶走片翼...」
羅羅諗一諗：「咁即係話...所有嘢都係關恐怖事？係由恐怖落Order？」
恐怖...我哋SPIRIT嘅最高決策人...而且係唯一...唯一個決策人...
究竟有幾厲害？
要有幾勁嘅實力...先可以獨攬大權...隻手號令整個神秘且強大嘅地下組織...
日倫點點頭：「照手上有嘅資料...應該就係...」
『我哋SPIRIT將有關抽取黑物質嘅技術俾咗解放軍...要佢哋幫我哋抽取...同佢哋分...但有部份重要嘅技術就冇教到佢哋...佢哋用咗某途徑取得嗰部份技術...片翼調查到...就發出緊急委託...委派我哋去徹底破壞解放軍嘅軍工廠...我哋SPIRIT就同解放軍反咗面...係唔係咁？』我一口氣講...唔俾日倫再唧牙膏...
日倫點點頭：「應該就係...」
『有一點...我唔明...點解委託任務更新...毀滅CNA000試作型...』喺嗰一刻之前...我一直打算唔夠打就走...
日倫又諗一諗：「呢一點...其實我都覺得奇怪...由我一收到任務更新...我就奇怪點解會有人知道裡面嘅情況？係一早已經知道有CNA000試作型？所以其實個委託係一早就要我哋毀滅CNA000試作型？冇可能...冇可能咁橋...咁橋你哋炸咗個倉之後...任務就更新...而我嘅Drone同所有器材都冇連去其他地方...更冇連上SPIRIT...所以我會覺得...一直都有人喺附近監視...」
『而嗰個人...就係片翼...』我接埋落去...
日倫點點頭：「嗯...我推測就係咁...片翼係最大可能...佢同我哋一樣潛入過軍工廠...而且可以喺千鈞一髮之間更新任務...我諗除咗佢之外...都係得恐怖同一尾...但重點都係CNA000試作型殘骸上嘅綠色粒子...」
果然...唔提出嘅話...日倫都未必會講出口...
果然...每個人都仲係有所隱瞞...
羅羅都諗一諗：「咁講法...喺你哋深層睡眠之時...片翼就以綠色精神化之下...瞬間毀滅CNA000試作型...真係一瞬間...我已經好快咁趕到嚟...之但係...只係見到你哋兩個瞓喺地上...仲有CNA000試作型殘毀...見唔到...亦感覺唔到片翼嘅氣息...但又奇怪...你話佢一閃之後...佢身上就冇晒紅色粒子...亦冇綠色粒子...乜能量都冇晒咁...好似進入咗深層睡眠咁...咁佢係點離開㗎呢？」
片翼係...點離開？
假如真係片翼...
佢會好似上次咁...一閃後...突然進入深層睡眠？
假如真係...
日倫諗一諗：「可能又係一尾帶佢走呢...」
係一尾...
日倫繼續講：「假如所有嘢都係由恐怖安排...再指派一尾去帶走片翼都唔出奇。」
冇錯...假如所有嘢都係由恐怖安排...我哋SPIRIT嘅唯一最高決策人...獨裁者...
咁講法...上一次...要消滅所有變節行者嘅強迫委託...都係由恐怖指派片翼發出？
有必要？
雖然變節嘅都包括先行者級數...
之但係...真係事無大小都會親力親為？
唔好話親唔親自郁手...就係關注都好唔得閒...
所以話...獨裁都真係唔容易...
羅羅咬住唇咁諗一諗：「嗯...或者都真係...可以喺咁短時間...毀滅CNA000試作型後離開...乾淨俐落...」
一尾...同片翼...
究竟佢哋兩個有幾厲害？
淨係片翼嘅話...已經見過佢出手唔止一次...但羅羅都話未係最盡...
咁一尾呢？
佢哋兩個嘅實力...究竟會有幾恐怖...
恐怖...會比佢哋兩個加埋...更加恐怖...
日倫打量住我同綽姿：「咁究竟點解你哋兩個都會突然進入深層睡眠？」
『我...我都唔清楚...只係好似平時咁囉...又突然進入深層睡眠...但係綽姿呢？』我打量住綽姿...
綽姿木無表情擰擰頭...
『咁日倫呢？』我打量住日倫，『最後嘅畫面有影到啲咩嘛？』
「最後...」日倫拎拎部電話，「就係得呢啲...」
喺我哋之間播出一段立體投射全息影片...係影住我俾CNA000試作型一刀刺入胸口將我舉起...再一嘢掉落地...碌咗兩個圈趴喺地上...然後...閃一閃...畫面再閃多兩閃...黑晒...
『就係得咁多...』就正如頭先羅羅所講...
「嗯...」日倫點點頭，「就係得咁多。」
『之後羅羅就趕過嚟...見到我哋都進入深層睡眠...』其實...有啲嘢...
「嗯...」日倫同羅羅都點點頭...
『咁即係話...綽姿都係同我差唔多時間...』我係冇講到...
「嗯...」日倫同羅羅再點點頭...
就係...藍色粒子...
我冇講到出嚟...就喺我趴喺地上望...望望四周...望望火海一片嘅四周...尋找綽姿嘅位置...
綽姿...企咗喺...火海之中...
我望到...綽姿嘅身影企喺火海之中...身上並冇任何紅色粒子...只有黑...黑...藍...藍...
突然...綽姿嘅黑色身影上...有一點點...一粒粒...藍色...藍色粒子...
藍色粒子...逐漸...逐漸...越嚟越多...喺綽姿身上...全身上上下下...越嚟越多藍色粒子...飄浮...飄浮...
包圍住綽姿嘅火焰...慢慢減弱...慢慢熄滅...可以再睇得清楚啲...綽姿身上...藍色...藍色嘅...粒子...
突然...大量藍色粒子由綽姿身上爆出...佢手上嘅精神刀柄隨即亮出...藍光刀刃...
我仲記得...我記得好清楚...喺我進入深層睡眠前一刻...
冇錯...我的確有所隱瞞...
正如頭所講...每個人都仲係有所隱瞞...
藍色嘅粒子...點解會...喺綽姿身上...
日倫諗一諗：「綜合所得嘅資料...我哋同解放軍合作...之但係片翼調查到佢哋得到我哋唔想俾佢哋得到嘅技術...就派咗綽姿去破壞及殺短白髮男人...然後再派我哋去破壞兵工廠...而解放軍喺西貢遺址被破壞後就預咗我哋會去破壞兵工廠...所以就借我哋嚟測試CNA000試作型...佢哋真係研究成功...雖然最後應該都係由片翼毀滅CNA000試作型...」
『佢哋已經掌握到呢方面嘅技術...就算毀滅CNA000試作型...就算破壞咗兵工廠...佢哋都總可以再整過...再起過...繼續研究...生產...』當一種科技...技術被掌握後...要量產就唔難...
「嗯...」日倫點點頭，「雖然係...但...都要一段時間...或者...同我哋嘅關係破裂後...唔會咁順利...」
同我哋嘅關係...破裂後...
日倫擰擰頭：「點都好...有樣嘢可以肯定嘅...就係我哋同解放軍已經反咗面...仲要唔係個別...係恐怖決定...今次真係麻煩...」
『嗯？』我唔明...唔明點解係恐怖決定就麻煩...
唔係恐怖決定嘅話就冇咁麻煩？
日倫眉頭一皺：「SPIRIT好耐都冇試過有重大方針...對上嗰次...應該就係偏重中共...主要接受警察...解放軍仲有國安局嘅委託...估唔到...今次就係同解放軍反面...話唔定...話唔定好快就到警察同國安局...唔係...應該話就算中央冇指示...警察都唔會敢同我哋有瓜葛...嗰班狗嘅嗅覺最靈敏...」
班狗嘅嗅覺...
就算收唔到風...都一定聞到有異味...
日倫眉頭再皺得緊啲：「而家都係睇國安局班人...」
國安局...
日倫繼續皺住眉：「國安局同解放軍話就話都係幫阿爺辦事...之但係...各懷鬼胎...」
各懷鬼胎...
日倫再諗一諗：「喺呢段時間...究竟佢哋會有咩動作呢？」
國安局...喺呢段時間...趁住我哋SPIRIT同解放軍反面...會有咩動作？