《香港傭兵》: [Day 23－殺戮特區] PART 06
「你真係好無聊！」
我同日倫都望住綽姿同羅羅好似貓貓打交咁...
「幫你化妝又唔啱吖？！」
喺張床碌嚟碌去...碌多幾個圈...
「咳咳...」日倫忍住笑咁咳兩聲，「好喇好喇...夠喇夠喇...差唔多要傾返啲正經嘢。」
「無聊！」綽姿落一落床，喺檯面拎起張紙巾，對住塊鏡抹抹塊面，「你用咩筆畫㗎？抹唔甩嘅？！」
羅羅喺床上陰陰嘴笑：「識用就梗係用油性Marker啦～」
綽姿怒視住羅羅：「你係唔係真係咁無聊呀？！」
日倫都擰擰頭：「你不如都係去梳洗先啦...」
「唉...」綽姿睥住瞓喺床上嘅羅羅，行出房。
羅羅喺張床碌兩圈後，坐返起身：「點吖？出面咩環境吖？」
日倫坐喺凳上，擰擰頭：「有啲麻煩...不過都係等埋綽姿先傾。」
羅羅點點頭：「好囉～」
我都坐喺床邊...等...
我哋三個都靜靜咁等...
日倫同羅羅都拎起部電話撳撳睇睇...
我都拎部電話...開返個SPIRIT App出嚟睇睇...
睇睇個Balance...都係冇增加到...都係得882 Sil...
係冇報酬？定係仲係綽姿Keep住咗呢？
『日倫...尋晚嘅報酬...收咗喇？』呢個問題...問問日倫就啱喇...
「嗯...」日倫望住部電話點點頭，「收到...同正常完成委託一樣。」
『嗯...』咁就奇怪...
奇怪嘅唔係我仲未有報酬到手...
我份報酬應該係由綽姿分配...
就算今次佢會分俾我... 綽姿都係啱啱醒...未分都唔出奇...
奇就奇在...同正常完成委託一樣？
尋晚...明明...
不過呢啲都係等綽姿出返嚟先再討論...
而家就再...睇睇...
委託板上嘅...都係啲平價委託...
要執行嘅都係啲護送...偷資料...
喺呢區嘅地點...都係分布喺香港各地...
係特殊區比較少...
而且...都唔會同解放軍有關連...
至於公告...真係冇公告...
真係純睇委託做人...
咁嘅話...我相信絕大部份...甚至全部SPIRIT嘅行者都已經估到...我哋同解放軍反咗面...
只係...唔知邊個反邊個先姐...
碌幾碌委託板...又撳返出去...碌碌新聞...
新聞自由被限制...被控制後...都只係睇到咩咩恐襲...咩咩初部懷疑係反政府咩咩恐怖分子所為...咩咩解放軍協助維持和平治安等等嘅廢話...
真相唔會再被報導...亦唔會俾市民睇到...
喺SPIRIT App同新聞之間左碌右碌多陣...
“咔！”綽姿就由浴室行返出嚟。
綽姿用條白色大毛巾抹住頭，冷眼望住羅羅咁行入嚟房：「真係麻煩。」
羅羅陰陰嘴笑，打量住綽姿：「做咩姐～咁鬼小氣㗎～都洗甩晒啦～」
我都望清楚綽姿塊面...黑色嘅圓圈交叉刀疤仲有貓貓鬚都已經洗甩晒...變返白白滑滑...
綽姿放條毛巾喺凳背，就隨手拎起個風筒：「你就講得輕鬆...知唔知我洗咗幾耐？就係因為你嘅無聊...」
“飃！”綽姿吹吹把濕髮。
羅羅就向住綽姿扮鬼臉～
呢兩個小妹妹真係...
等到綽姿吹乾把秀髮...放返好把風筒後...
「咳咳...」日倫咳兩聲，「好喇...真係係時候討論返尋晚嘅委託。」
我、羅羅同綽姿都靜靜咁...望住日倫...
日倫打量住我同綽姿：「究竟你哋發生咗咩事？」
我哋...我同綽姿...
『你係指...』我諗一諗...打量住日倫...「我哋同CNA000試作型對戰嘅結果？』
「先唔好講對戰...」日倫打量住我，「今次你又係咩情況？」
『我？』我咩咩情況？
日倫一直打量住我：「你今次...唔會又係好似無意識咁...好似乜都唔知咁掛？」
『唔...』我擰擰頭，『我係有意識...』
日倫點點頭：「睇得出你尋晚同西貢遺址唔同...不過都係好勁...」
『嗯？』咩意思？
日倫撳一撳部電話，然後喺我哋面前就投射出一啲數據...一啲立體數據圖表：「呢個係你尋晚嘅資料...簡單嚟講...你精神能量比起綽姿仲要高...高得出奇...而且一直Keep住高水平狀態。」
『你Check住我？』我冷眼望住日倫...
「唔係唔係...」日倫立即揮揮手，擰擰頭，「你唔好誤會...我只係為咗你哋嘅安全，所以先要Check住你哋嘅精神能量...即時分析形勢...作出唔同嘅作戰策略...呢啲都係我嘅任務。」
『嗯...』都講得通...
日倫點點頭：「就係因為尋晚留意到你哋都長期Keep住高水平狀態，所以基本上你哋都可以隨心所欲...我都唔使有咩意見...」
咁都好合邏輯...
尋晚都唔係好覺日倫有啲咩指示...聲都唔多出...
原來係因為...我同綽姿都足以應付...日倫只需觀察情況...
「你真係同之前好唔同...」日倫打量住我，「比起啱啱遇到你...強勁咗好多...不過你唔想在意呢點，我哋都係集中討論返尋晚...同CNA000試作型交戰。」
『嗯...』其實...我又冇話想唔想...
只係...我都唔知點解...
我都唔知點解...好似好自然...
好自然咁...好似與生俱來咁...好似...好似...一直都係咁...
我都解釋唔到...如果真係要討論...要問我...我都答唔到...討論唔到...解釋唔到...
「關於CNA000試作型...」日倫撳撳部電話...
喺我哋面前就投射出CNA000試作型嘅模型...
日倫指指CNA000試作型：「佢嘅外殼雖然係以白同銀色為主...之但係應該就係用上我哋SPIRIT嘅黑物質製成。」
我哋三個都望住部CNA000試作型...白白...銀銀...
日倫再撳撳部電話：「雖然我都唔知佢哋係點做到...點去製造...之但係...CNA000試作型係用上我哋嘅精神能量做能源。」
CNA000試作型中間個拳頭咁大嘅圓形物體隨即發出紅色光...沿住十幾條白線...向四肢及頭部流動…閃爍閃爍…似流水…似心跳...
日倫指住CNA000試作型中間個拳頭咁大...閃住紅光嘅圓形物體：「好大量...濃度好高嘅精神能量...由呢度發出...散去身體各部位。」
的確...就如尋晚一見到...所推測嘅一樣...
日倫撳兩撳部電話：「佢嘅武器係附有精神能量...又或者係發射出高密度精神能量...產生破壞力。」
CNA000試作型隨即拔出有薄薄一層紅色粒子喺刀刃上嘅日本刀...同時...電磁砲由背後伸向腰間...裂甲...
日倫再撳一撳部電話，指住CNA000試作型：「而最後佢仲可以進入第二個型態...」
同時...CNA000試作型身上嘅裝甲好似“裂甲”一樣...大量嘅精神能量就由CNA000試作型裝甲底下層紅光甲片噴出...
日倫繼續講：「有關CNA000試作型就暫時講到呢一度...跟住要講係...尋晚...解放軍係預咗我哋會破壞佢哋嘅工廠...仲預咗搵我哋去測試CNA000試作型。」
『嗯...』的確係咁...『但點解佢哋會知道？』
綽姿冇出聲...
日倫就繼續講：「首先可以排除咗個委託係解放軍佢哋自己委託我哋，破壞係表面，實際係想測試CNA000試作型呢點...因為尋晚屠總司令都已經講過...加上而家出面成個局勢都係我哋SPIRIT同解放軍反咗面。」
『嗯...』的確...尋晚屠總司令...
立體投射...全息影像...
「再加上...」日倫點點頭，再撳撳部電話...
然後...喺我哋面前...投射咗一件...立體殘骸...
睇清楚啲...被打橫斬開一截截嘅...係...CNA000試作型...
日倫指住被打橫斬開一截截嘅CNA000試作型殘骸：「呢個立體影像，係由羅羅趕過去搵你哋，我叫佢影返嚟。」
原來...毀滅咗...
CNA000試作型...真係被毀滅咗...
羅羅點點頭：「當我見到你俾CNA000試作型一刀刺入胸口將你舉起...再一嘢掉落地...碌咗兩個圈趴喺地上...冇幾耐就連畫面都冇埋！我就第一時間趕過嚟！」
『畫面...』冇埋？
日倫點點頭：「嗯...其實喺你用SB1炸CNA000試作型嘅時候，跟住你哋過去嗰三部Drone都同時被炸毀...好彩我早喺你哋入咗個大貨倉之時，立即飛多三部去你哋嗰邊...不過唔知點解...突然失去能源...」
『失去能源？』即係...冇電？
日倫又點點頭：「嗯...我都唔知點解...明明係滿晒能源咁飛過去...但由羅羅拎返嚟之後再三檢查...裡面嘅能源真係冇晒...係連少少都冇...真係好奇怪...」
羅羅立即谷起塊面豬登：「你仲好講！要我一個帶住飛揚哥哥同梁綽姿返嚟...仲要我拎埋三隻爛Drone！我邊有咁多隻手吖？！」
日倫尷尷尬尬咁：「咁...咁我唔係行動型吖嘛...唔方便入戰區㗎嘛...再加上我要留喺車上做分析同指示㗎嘛...」
羅羅再谷到塊面豬登脹啲：「指鬼咩？乜都睇唔到...都係靠我口述咋嘛...」
日倫又尷尷尬尬點點頭：「咁咪多得你口述囉...」
羅羅谷住塊面豬登，冇日倫咁好氣...
『究竟...究竟係咩人做呢？』我望住CNA000試作型嘅殘骸...
日倫打量住我同綽姿：「唔係你哋做嘅？」
我同綽姿對望...
『我...我記得...我記得喺我俾CNA000試作型一刀刺入胸口...舉起...一嘢掉落地...碌咗兩個圈趴喺地之後...之後就...冇印象...』應該係...應該係喺嗰陣...進入深層睡眠...
綽姿就擰擰頭...
「嗯...」日倫點點頭，「我都認為唔係你哋...」
『嗯？』係唔係又有咩線索未講？
日倫望住CNA000試作型嘅殘骸：「雖然立體影像影唔到...之但係...」
羅羅冇等到日倫講埋落去，就接住講：「斷口有少量嘅...綠色粒子...」
『係...』綠色粒子？！
「冇錯...」日倫點點頭，「係逆行者嘅...綠色粒子...」
係逆行者嘅...綠色粒子...遺留喺...殘骸嘅斷口...
『你哋係想話...會係逆行者做嘅？』假如CNA000試作型嘅殘骸斷口有綠色粒子係關鍵...
咁即係...日倫同羅羅都推斷...係逆行者所為...
日倫同羅羅對望一眼...然後日倫點點頭：「唔排除有呢個可能...」
『照我睇...就未必...』我...我諗...唔止逆行者...
「嗯？」日倫同羅羅都打量住我...好似等緊我提出佢哋心中嘅假設...
『會唔會...會唔會係...片翼？』又令我諗起...呢個大人物...