《香港傭兵》: [Day 23－殺戮特區] PART 04
「唉...連呢邊都亂喇...」黃生一邊揸車...一邊繼續講...
『嗯...』我同日倫都唔多理佢...
「始終都係近特殊區...總有一日受波及...」之但係黃生仲係繼續講...
我同日倫都留意住車外嘅情況...
開始...見到有解放軍...
幾架解放軍嘅裝甲車...幾個手持長槍...Full Gear嘅解放軍士兵...
會唔會...等陣會唔會...
話口未完...
我哋架車開始減速...我亦都望到前面...有解放軍嘅路障...
幾個手持長槍...Full Gear嘅解放軍士兵企喺路障前...其中一個向我哋示意停車...
黃生越揸越慢...越揸越慢...慢慢停喺士兵面前...
幾個士兵行近...其中一個就行到埋黃生旁邊...
黃生立即撳低個車窗玻璃：「兵大哥～兵大哥～小弟係Call車司機...」
士兵望望架車...又望望黃生：「Call車司機？去那？」
黃生尷尷尬尬笑笑口：「去深井...競爭大...要來回多幾轉...通融...通融...」
士兵又望一望我同日倫...然後向黃生揮住手：「去！去！趕快去！」
黃生點晒頭咁笑笑口：「謝謝兵大哥～謝謝兵大哥～」
解放軍士兵讓開條路...
“吱！吱～”黃生就撳返高隻玻璃...開車駛過路障...
喺出入荃灣嘅路口...都設有解放軍嘅路障...
咁就真係...麻煩...
一路上...對面線都有車入荃灣...都塞咗一條車龍...等通過解放軍嘅路障...
雖然話好似都係睇一睇...問一問...好似冇上車搜...之但係...都夠晒麻煩...
「唉...搵食吖...搵食吖...」黃生繼續一邊揸車一邊口噏噏，「而家搵食真係唔容易吖...」
『嗯...』
「周街都係老解...唉...搵命搏...」
『嗯...』
「見係你咋真係...」
『...』
“飃...”一路上都總算順利...
只係上一上橋...再落返嚟...好快就嚟到深井...
“依...”黃生停定喺深井入口...
「多謝晒喎梁生～」黃生由倒後鏡中望一望我。
『我等陣會再租你...』等陣...一陣...
「係？幾耐吖？」黃生好似好有興趣咁。
『未知...到時再Call你...』要睇日倫想過嚟做乜...
「哦...好吖好吖～」黃生點晒頭，「咁我喺呢頭睇睇有冇得走返轉先～你到時Call我啦～即到～」
『嗯...』
我同日倫就解開安全帶落車...
“吱！吱～”望住白色嘅七人車駛去...
好彩黃生都冇同解放軍多口講我哋係嚟自特殊區...
「佢都蠢唔晒...起碼冇同解放軍講我哋係嚟自特殊區。」日倫望住白色七人越駛越遠...越駛越遠...
『所以我先安心話一陣再搵佢...』唔係嘅話...一手捏斷佢條頸...
「好喇...我哋而家...入去睇睇先...」日倫就向住深井方向行...
“沙 沙 沙”我就同日倫喺鋪咗唔少碎沙石嘅路邊行...行唔夠幾步...就覺得有啲唔妥...
再行多兩步...離遠就見到...解放軍士兵...
幾個手持長槍...Full Gear嘅解放軍士兵企喺裝甲車旁邊...
解放軍...已經過咗嚟深井...
“沙 沙 沙”我同日倫再行前多幾步...同四五個睥實我哋嘅解放軍士兵擦身而過...繼續行...扮晒冇嘢咁繼續行...
再行多幾步...行到去差唔多小巴站...離遠望到由特殊區出入深井嘅路障...
再唔係警察嘅路障...係解放軍嘅路障...
路障前後停泊嘅再唔係警車...而係解放軍嘅軍車...
企喺度駐守...又或者係行嚟行去巡邏緊嘅都唔再係警察...而係解放軍士兵...
解放軍...已經接手咗深井嘛？
係嘅話...就麻煩...
我同日倫望一眼...停泊喺路障前面...林雪架紅Van後...立即轉入深井...
「我哋搵個地方坐低食啲嘢先...」日倫一邊行...一邊偷偷望四周...
『嗯...』我都跟喺日倫身邊...偷偷望四周...
有唔少解放軍士兵...真係唔少...
街上都係手持長槍...Full Gear嘅解放軍士兵駐守...巡邏...
已經再冇警察...半個警察嘅身影都見唔到...
睇嚟真係...深井已經交由解放軍接手...
除咗解放軍士兵...我都有留意街上嘅平民...街坊...
「唉...真係好麻煩吖...」
偷偷聽佢哋講乜...
「係囉...無啦啦有咁多解放軍...」
睇嚟...冇預早通知呢度嘅居民...
「屌...鬼咩！尋晚荃灣嗰邊恐襲呀嘛！咪搞到連呢邊都係解放軍囉！」
尋晚恐襲...睇嚟佢哋真係唔知...解放軍早就計劃好接手呢邊...
「係啦！話唔定又係同特殊區有關...」
知啲唔知啲...根本就唔關特殊區嘅事...
「唉...班友成日搞事...真係好麻煩囉...」
「係囉！搞咁多做乜鬼姐？霸咗大西北咪算囉！又要走過嚟炸工廠！人哋又得罪你啲乜呀？！」
「咪就係！都怕鬼咗佢哋㗎啦！硬係要搞嘢嘅！好啦而家！解放軍都接手喇！」
「咁咪好囉...快快手手一次過鏟平佢哋...最好就殺夠幾十萬人...咁咪平到亂囉...」
破壞死物就唔得...但支持殺人...咩思想嚟㗎...
「係吖係吖！殺鬼死晒佢哋就啱㗎喇！唔使搞到我哋呢度又武裝警察！又解放軍咁！日日都好似戒嚴咁！都唔關我哋事嘅！」
「啱呀！支持解放軍武力平亂！咁我先有生意做㗎嘛！」
「唔係喎...就係呢度變咗邊界...你先搵到咁多咋喎...」
「邊係呢邊係呢...佢先係！」
「許！我又邊夠佢搵得咁多？」
「痴線！有邊個唔係發國難財㗎？」
「唉...唔好講唔好講...我愛國嘅...」
所以話...去到邊個年代都係有咁多港豬...有咁多口講愛國嘅賣國賊...
繼續邊留意...邊偷聽...邊觀察...邊搵地方食嘢...
行咗一段時間都仲未搵到...
唔係有啲閂門唔做生意...就係裡面坐滿晒人...
有唔少都係好似我哋咁...著住黑色大褸...黑色嘅裝束...
再唔係就係成間好似俾解放軍包咗場咁...成間餐廳都係解放軍士兵...軍人...
行咗好耐都仲係搵唔到...行到差唔多出海邊...然後...就見到...海邊放咗唔少檯檯凳凳...
露天食肆？早幾日同日倫過到嚟...都唔見有嘅？
或者真係太多人食嘢...又有唔少唔敢開門做生意...
想發國難財嘅...咪就係要咁做囉...
不過放到成個海邊都係檯檯凳凳咁又點？都係坐滿晒人...
點好呢...有冇位搭呢...
當我同日倫再行近啲...喺啲食客身邊再行多幾步...我就離遠見到...有張檯...坐咗個...肥佬...
我望住...食緊豆腐火腩飯嘅：『林雪？』
林雪邊食啖飯，邊口噏噏：「咦？你仲未撚死吖？」
『嗯...托賴...』我同日倫行到嚟林雪面前，『有冇人㗎？一齊坐OK嘛？』
林雪繼續邊食邊口噏噏：「屌你個嘴吖...我幾時都係獨行俠獨來獨往...邊鳩度見閪到我會有人一齊...坐你就坐喇咁撚多嘢講...」
『唔該...』我就同日倫搭林雪檯...
一坐低...望望...冇餐牌...
再望望...伙記都好似未得閒招呼我哋...
我一邊望住個伙記...一邊問問日倫：『諗到食咩未？』
「嗯...」日倫點點頭，「就豆腐火腩飯啦...你呢？」
『嗯...唔該...』我就向啱啱收起兩隻碟...正想行返入餐廳嘅伙記揮揮手...
「嚟緊！」個伙記一見到我揮手，就立即行咗過嚟先，「要啲咩吖？」
『兩個豆腐火腩飯...俾多兩杯凍啡添...唔該...』
「兩個豆腐火腩飯～兩杯凍啡～」伙記放低張單後，就一邊行返去餐廳，一邊口噏噏，「咁凍都咁多人飲凍嘢...」
等到伙記行返入餐廳後...我打量住林雪...
林雪又邊飯連火腩放入口，邊口噏噏：「望乜鳩嘢姐...唔撚死得又眼超超咁...」
『冇...你嘅食相吸引嘛...』有機會親眼睇到林雪食豆腐火腩飯...真係男人嘅福氣...
「屌你個嘴...」林雪擰擰頭，「講到咁閪HeHe...點吖？你哋兩個都係等我車返入特殊區？」
我同日倫都擰擰頭...
「哦？」林雪疑惑咁打量住我哋，「唔鳩係趕住返入去，又做乜撚過嚟深井？」
日倫帶住微笑回答：「我哋仲有朋友未到...所以諗住等埋佢哋先姐～」
「嗯？」林雪諗一諗，用隻羹篤兩篤碟飯，「綽姿吖？」
『嗯...』林雪估到都好正常...
話晒林雪都叫做識得綽姿...又見過我跟住綽姿出出入入...
所以我都唔怕直認...
「唔閪好話我唔鳩提你哋...」林雪又豆腐連飯放入口，「要入去好快撚啲喇...」
我同日倫都冇出聲...等伙記拎兩杯凍啡過嚟...放喺檯面：「兩杯凍啡～」
等到伙記行開之後，林雪篤兩篤杯凍檸茶，飲一啖：「有好閪多人等緊入返去...得我一架車...唔鳩知要等幾撚耐㗎...」
有好多人...都係我哋SPIRIT嘅人？
我唔肯定有幾多成係我哋SPIRIT嘅人...之不過就一定有...
林雪繼續豆腐連火腩再連埋飯撈埋汁咁放入口：「而家出入都幾鳩煩...雖然話都冇話要搜乜閪查乜柒...之但係你知啲老解㗎啦...估唔撚到佢㗎嘛...點柒知佢哋會唔會突然屎忽痕...搞乜鳩花臣...」
都真係...話唔埋...
解放軍接手...一定唔會再跟警察嗰套...
一定有啲搞作...
「最撚大鑊係過兩日...」林雪三扒兩撥，「即係呢個月嘅七號...就禁柒止出入...」
『禁止出入？即係咩吖？』唔會係...
林雪邊咀嚼，邊口噏噏：「即係封鎖區域囉...我諗係咁上下啦屌...都係今朝過嚟嘅時候...班撚屌老解同我講...話七號唔閪使再過嚟...屌你老母問多兩句都俾佢哋屌柒...惡閪過撚...」
真係...解放軍真係要封鎖區域...
話唔定...唔止係要封鎖...
話唔定...真係要打入去...要鏟平特殊區...
就好似...西貢攻防戰咁？
之但係...今次...解放軍嘅對手唔止係革命軍....唔止係逆行者...亦都唔會有我哋幫手...仲要係敵對...
今次會係...三個勢力喺同一個地方混戰？
唔會真係咁亂吖化...
林雪扒埋最後嗰幾啖飯入口：「總之係要入閪去就快啦...唔柒知班鳩頭會唔會提撚早...」
「嗯...」日倫點點頭，「咁你有乜打算？萬一真係封咗呢邊...」
「我有閪打算吖？」林雪用餐巾紙抹抹個嘴，擰擰頭，「使鳩諗咁柒多咩？不嬲都係見步行步㗎啦屌！」
見步行步...
林雪一啖啜晒成杯凍檸茶：「屌食撚完開工先！」
日倫就拎走林雪張單：「呢餐我請啦～」
林雪就笑笑口起身：「喂咁就多撚謝晒喇！」
日倫同林雪揮揮：「客氣喇～」
林雪就揮住手咁行：「記鳩住吖...要入閪去就快喇...」
望住林雪肥大嘅背影越行越遠...越行越遠...轉個彎...
咁鳩長氣嘅...睇嚟都真係要快...