《香港傭兵》: [Day 23－殺戮特區] PART 03
“嘟！”同日倫入咗閘...行到上月台...
『我哋去荃灣做咩？』企喺閘門前等車...左望右望...
身邊都仲係有唔少人等車返工返學...
個個都係低住頭睇自己部電話...
真係唔明...呢個時勢仲返咩工返咩學...
一啲危機意識都冇？
定係自欺欺人一切仲係正常？
一個半個係咁就話姐...特殊區又好...呢邊又好...成班人都係咁...
香港人係唔係集體撞邪吖？
「都係過去探探路先...」日倫望咗我一眼，「你真係唔同咗...」
『吓？』咩唔同？
「同我啱啱識你嘅時候...」日倫打量住我...
『人會變...喺呢種環境之下生存...仲唔變...會死...』我唔知點解會咁講...只係喺個腦閃出...好自然咁講出口...
「係適者生存嘛？」日倫諗一諗，「但我睇你唔似係咁簡單...」
『咩都好...都唔重要...生存落去先係最重要...』一係生...一係死...冇中間...
「嗯...」日倫點點頭後...
“飃！”列車就到站。
入到列車車廂...都有唔少人...
亦都係一樣...個個都低頭睇住自己部電話...不論係返工嘅成年人...定抑或係著住校服嘅學生...
我偷偷望一眼佢哋手上部電話...個Mon顯示緊嘅...都係荃灣工業區啲片...
都係影住唔少解放軍軍車...手持長槍...Full Gear嘅解放軍士兵...解放軍設置嘅封鎖線...
全部人都係留意住尋晚我哋炸毀神秘工廠嘅新聞...
男男女女老老幼幼都係...個個都表示關注...
咁關注有鬼用咩...又乜都唔做...仲係戇鳩鳩咁返工返學...
一陣又唔知俾解放軍捉去邊...做啲乜...
真係成班都係戇鳩鳩...冇得救...
“飃！”
唔使幾耐就嚟到荃灣...
我同日倫都同一大班仲係戇鳩鳩咁趕返工返學嘅港豬一齊落車...
“嘟！”喺出閘嘅一瞬間...前面兩個學生妹就已經被手持長槍...Full Gear嘅解放軍士兵截停...
行多唔夠幾步...又有幾個阿叔企埋一邊俾兩個解放軍搜緊袋...
而我同日倫都未行到出門口...
「喂！站著！」亦都被兩個解放軍士兵喝停！
我望住個解放軍士兵行到嚟面前...佢一手就推我埋牆：「搜身！」
我同日倫都趴喺牆身...俾兩個解放軍士兵搜身...
解放軍士兵一邊搜...一邊問：「去那？」
日倫尷尷尬尬咁答：「上班...」
「上班？」解放軍士兵又疑惑咁問，「那兒？」
日倫繼續尷尷尬尬咁答：「深井一帶...」
「深井一帶...」解放軍士兵又諗一諗...
日倫繼續尷尷尬尬咁答：「對啊...對啊...在深井一間便利店工作...」
我身後個解放軍士兵一邊搜我身，一邊問：「一起的嗎？」
『對...』我就用上普通話回答，『一起在便利店工作...』
佢哋都真係...搜得好徹底...
唔好話衫褲褸袋...就連“袋底”都摷幾摷...捏兩捏...
搜到冇嘢好搜...摷到冇嘢好摷...解放軍士兵推一推我哋：「走！」
「謝謝兵大哥...謝謝兵大哥...」我同日倫就頭也不回咁行出地鐵站。
同日倫再行多兩步...喺天橋上行...都仲係見到有唔少手持長槍...Full Gear嘅解放軍士兵巡嚟巡去...
而街上...其實都唔算有太多人...
通往工廠嘅天橋都已經封咗...企咗幾個手持長槍...Full Gear嘅解放軍士兵守住...
至於橋下嘅馬路...都已經唔見有貨車出入...就只有停泊咗幾架解放軍裝甲車...又有幾架軍車駛過...
我同日倫繼續行...盡量遠離有解放軍嘅地方...
行多兩步...見附近都冇解放軍嘅身影...日倫就拎部電話出嚟撳撳...
我就留意住四周...留意有冇解放軍...有冇唔尋常嘅人...
「冇共享車...附近...全個荃灣一帶...」日倫再碌兩碌部電話，「想搵架共享車睇睇都冇...睇嚟已經開走晒。」
『要去深井？』我望到離遠有兩個解放軍士兵行過...但應該唔會過嚟我哋呢邊...
「嗯...」日倫點點頭，再碌兩碌部電話，「點都要過去嗰邊睇睇...冇共享車...小巴唔知有冇...冇理由行過去㗎...」
『要搵車...或者...』我都拎部電話出嚟...
「你有車喺呢邊？」日倫望咗我一眼...
『唔係...』我就開返個...Call車App，『或者...有方法...』
日倫就代我留意住四周...我就撳一撳...撳一撳最近Call過嘅車...
Edward Wong...EdWong...七人車...
即管試試聯絡佢...
我揀咗黃生之後...揀埋荃灣過深井...
然後等咗一陣...又等咗一陣...再等多一陣...
然後...望住部電話...裡面彈咗條選項...寫住“車資：一千”...
一千蚊？我記得上次都係二百...食水真深...
不過算啦...用錢解決到嘅問題就唔係問題...
我就撳一撳條選項...再撳確定服務...
然後就彈咗個“等候時間：約三十分鐘”嘅對話方塊出嚟...
三十分鐘...都要等咁耐...
時間都唔係問題...問題係等候嘅地定係...荃灣西鐵站嗰邊？
地圖顯示...出發嘅地方係喺荃灣西鐵站嗰邊...連接到去深井嗰邊...
睇嚟係因為...受解放軍封路影響...
要行去荃灣西鐵站...
『我哋要行去荃灣西鐵站嗰邊等...』我袋返好部電話...
「Call咗車？」日倫問一問...
『嗯...之前喺呢頭Call過車去深井...今次試試再Call返佢...個司機要我哋去荃灣西鐵站嗰邊等...』我望望條天橋...
「哦...係吖...呢邊行過去...荃灣西鐵站嗰邊...天橋應該仲行到嘅...」日倫就開始向住天橋方向行...
『嗯...』我都跟喺日倫身邊...
一直向住天橋方向行...向住荃灣西鐵站方向行...
行唔夠幾步...就已經見到有幾個手持長槍...Full Gear嘅解放軍士兵守喺天橋上...
佢哋一直望實我同日倫...
我同日倫就唔多理會咁繼續行...喺佢哋面前經過...又繼續行...
然後又遇到幾個路人...又繼續行...又遇到兩個手持長槍...Full Gear嘅解放軍士兵巡緊...
行到過嚟呢邊...橋下面嘅馬路都係冇車...乜車都冇...
再行多兩步...轉個彎...有一兩架解放軍嘅裝甲車駛過...
而馬路旁邊久唔久都會見到有解放軍士兵巡邏...留守觀察四周...
真係大笨象到...
究竟佢哋想點？
真係想搵我哋出嚟？
我哋而家咪喺佢哋頭上行過...喺佢哋身邊擦身而過...咁又點？
截停都截停過兩次...搜身都搜過一次...發現到咩？
都發現唔到...就算發現到咁又點？
除咗我同日倫...就算俾解放軍搵到其他行者...咁又點？
立即開戰？
『係呢...究竟SPIRIT有咩指示？』我又好奇解放軍咁大動作...我哋SPIRIT又會有乜對應...
「冇...」日倫一邊行...一邊擰擰頭...
『冇？』乜都冇？
「嗯...」日倫點點頭...又留意四周，「冇任何委託係針對解放軍...甚至荃灣呢邊...」
『公告呢？』點都有啲指引掛？
「公告？」日倫眼尾望一望我，「不嬲都冇公告呢回事...假如你係想話我哋SPIRIT有咩方針...一直都只係靠睇委託板上有乜委託去推測。」
『嗯...』原來係咁...
講開又...好似真係...
一直以嚟...都唔見有咩公告...
一直都係跟委託行事...
有咩委託就自己接...接到咩委託就跟住做...
冇明確表示我哋嘅立場...就只有靠委託板上嘅委託...強迫委託...委託人...去推測...
上一秒仲幫緊佢哋做事...下一秒可能就要收佢哋皮...
打從一開始...應該就係咁...
傭兵...我哋SPIRIT係...傭兵...
同日倫喺天橋上同多三四個手持長槍...Full Gear嘅解放軍士兵擦身而過...行返落橋...
喺馬路旁邊行...已經再見唔到有解放軍嘅蹤影...亦冇其他人...
成條街就只有我同日倫...就連推車仔...執紙皮嘅公公婆婆都唔見...
最知驚嘅...反而係啲上咗年紀...真係奇怪...
行過啲大型商場...裡面都係冇商舖...
“飃！飃！”冷風迎面撲埋嚟...我同日倫再喺馬路旁邊行多兩步...
『係呢度喇...喺度等佢嚟...』我就企喺路邊...望望四周...
呢邊真係好似死城一樣...
反而...咁先覺得正常...
「嗯...」日倫都望望四周...
『頭先App顯示要等三十分鐘...而家應該要等多...差唔多十五分鐘左右...』而家咁嘅情況...周街都係解放軍...仲要荷槍實彈...全副武裝...仲點可以正常生活？
係香港人先咁痴線...喺咁痴線嘅情況之下仲正常生活...CLS...
「十五分鐘...」日倫拎部電話出嚟睇睇，「差唔多。」
“飃！飃！”我就同日倫企喺馬路旁邊...食住風咁等...等...再等...
等多一陣，食多一陣風...
“吱～”我就聽到...電動引擎聲...
我望向空空如也嘅馬路上...遠遠嘅遠處...正正就有架...白色嘅七人車駛緊過嚟...
『到喇...』我望住架白色七人車向住我哋呢邊越駛越近...越駛越近...
日倫都同我一齊望...望住架七人車再駛得近啲...望住個車牌...EdWong...
當架白色七人車駛到嚟我哋面前...停喺我哋身邊...
「喂梁生～好耐冇見喇喎～同朋友一齊返入特殊區吖？」黃生撳一撳掣，側門自動打開。
『唔係返入特殊區...想同朋友過去深井姐...』我就同日倫上車...
「嘩...而家呢邊出入唔容易吖真係～度度都有老解吖～過嚟都好麻煩㗎～所以就要收貴啲囉～真係唔好意思喇～」黃生從倒後鏡中望住我同日倫...側門即同時閂返埋。
『唔緊要...』我同日倫都扣好安全帶後...
“吱～”黃生就隨即開車。
「嘩真係吖...」黃生望一望倒後鏡中嘅我同日倫，再望返路面，「打仗咁款吖...成個荃灣都係老解！又裝甲車！又揸晒槍！痴晒線！」
『嗯...』我望出窗外...留意住出面嘅情況...
「冇晒車敢入嚟做生意㗎喇～」黃生又望一望倒後鏡中嘅我，「見係梁生你Call咋～我先入嚟咋～第二個嘅話，我都唔專登走入嚟喇～」
『嗯...多謝喎...』廢話唔使講咁多啦...