《香港傭兵》: [Day 22－現在未來] PART 10
日倫繼續講：「最諗唔通嘅都係...點解會破裂呢？話晒...解放軍幫我哋SPIRIT抽取...有七成係歸我哋...」
『會唔會係...我哋SPIRIT想攞晒？』人本來就貪婪...尤其係我哋SPIRIT...
貪婪喔...七罪宗...
日倫諗一諗：「如果話係想攞晒...咁就真係大貪咗啲...」
大貪咗啲？
羅羅都點點頭：「嗯...要攞晒就要進駐西貢遺址...仲要運送...」
日倫接住講：「先唔好話要運送去邊...就算係要進駐西貢遺址...要派幾多人？」
綽姿都點點頭：「要守住西貢遺址...抗衡呢區最大武裝勢力...解放軍。」
日倫接住講：「我哋雖然強大...之但係要日以繼夜咁守住一個地方...仲要抗衡解放軍始終都係唔方便...」
羅羅都點點頭：「守點始終唔係我哋專長呢...」
『咁即係話...我哋SPIRIT要同解放軍關係破裂...等同放棄西貢遺址...放棄黑球？！』唔會係咁掛...
日倫、羅羅同綽姿都點點頭。
『邊有可能吖？咁樣對我哋SPIRIT完全冇好處！直頭係蝕到入肉！我哋會做咁蝕嘅蝕本生意㗎咩？』我真係唔敢相信...
日倫擰擰頭：「我都唔知...之但係照現時所知資料分析...就係咁。」
咁講法...我哋所知嘅資料實在太少...
日倫繼續講：「而家唔理得咁多住...而家要做嘅係準備好今次嘅強迫委託。」
都...係嘅...
其他嘢都唔可以理住...始終強迫委託喺正面前...等緊我哋...
羅羅舉晒手咁：「我呢？我呢？咁我點吖？」
綽姿冷冷放下一句：「你都唔喺委託入面...強迫委託又唔可以自己加入...可以點？」
羅羅扭晒計咁：「我唔制吖我唔制吖～我要跟埋你哋去吖～」
日倫擰擰頭：「唔得㗎喎...咁樣唔啱規矩㗎喎...」
羅羅接住講：「最多我做Backup喇～」
Backup？
日倫同綽姿都對望咗好一陣...
綽姿冷眼打量住羅羅：「Backup冇所謂...反正就唔會分報酬俾你。」
日倫都點點頭：「Backup都可以嘅...不過就唔可以知道我哋嘅行動計劃。」
羅羅帶住天真嘅笑容點點頭：「冇問題啦～冇問題啦～知唔知我都冇所謂嘅～」
日倫望住部電話繼續講：「咁好喇...委託嘅任務係由我去計劃...綽姿同飛揚行動...咁我而家就準備先。」
羅羅就拉住綽姿：「咁我哋去煮定晚餐先～」
綽姿就被羅羅拉住咁行咗出房：「喂...喂...」
煮...晚餐？
羅羅同綽姿去煮晚餐...日倫就計劃...咁我呢？
『呃...我有冇啲咩可以幫手？』我都係問一問日倫好啲...
日倫就行去拎起塊平板：「得㗎喇～之前我哋都潛入過去一次～又有晒料～等我整理再加返啲嘢就OK㗎喇～你抖抖先啦。」
『哦...好好...辛苦晒...』即係冇我嘅事啦...
咁我都係行返出去...路過廚房又望一望...就見到羅羅拉住綽姿一齊搵嘢...
羅羅打開個雪櫃：「喂日倫！你呢度冇嘢食㗎？！」
日倫就喺房嗌返出嚟：「有啲咁囉...唔係好多...」
羅羅喺個雪櫃摷兩摷：「唔係唔係好多...係好少喎！」
日倫又喺房嗌返出嚟：「夠㗎喇～你哋自己諗啦～」
羅羅就拉一拉綽姿：「我哋自己諗喎～食鬼晒佢啲嘢姐～」
綽姿都點點頭。
『呃...使唔使幫手？』我都係問一聲好啲...
「唔使唔使～」羅羅同綽姿就繼續喺個雪櫃摷，「你出去坐陣～抖抖啦～」
『哦...好好...辛苦晒...』又冇我嘅事...
望住兩個小妹妹幫日倫清雪櫃...我都係行返出廳...
行返出廳...坐喺梳化上...望住部電話...睇返個強迫委託...睇返自己嘅任務...
其實真係冇乜嘢做...淨係得“對工廠設備、物資、裝備及武器進行破壞”...
好空泛...咁即係點？拆晒成間工廠？
我都唔知...不過我諗綽姿會知多啲...
再唔係應該就係...跟住佢做就得...
我...跟住綽姿...真係只要跟住綽姿做就得？
「飛揚哥哥～」羅羅喺廚房大嗌出嚟，「你唔梳洗先？你足足有成日幾冇梳洗過喇～」
『呃...好好...』係喎...唔講都唔記咗添...
羅羅繼續嗌：「定係你想我同你一齊沖吖？」
『唔係呀唔係呀！我自己得㗎喇！』嘩！唔好咁大誤會好喎！除咗綽姿...仲有日倫喺度㗎嘛！
俾咁多人誤會...好難解釋㗎嘛！
日倫都喺房裡面嗌出嚟：「浴室裡面有新嘅潔具，你可以開嚟用～仲有兩條黃色嘅毛巾都係新嘅～你可以拎嚟用。」
『哦...好好...唔該...』都係快快手手走入浴室梳洗先！
“灑！”快快手手洗個頭...沖個涼...
足足有成日幾冇梳洗過...真係好唔真實...
到咗而家...我仲係接受唔到...
明明我就...我就有返翻去過去...
明明我就同阿月過咗一日...
喺巴士上...有阿月叫醒我...
同阿月返翻去土瓜灣...睇藝術展...飲咖啡玩貓占個卜...跑輸俾阿月...
擊退MK古惑仔...同阿月去銅鑼灣買嘢上山...
幾經辛苦終於同阿月上到大東山...紮好營...欣賞風景食大餐...
好真實...我到而家都仲好記得...好真實...過咗好真實嘅一日...
嗰度先係真實...呢度唔係...
我仲係分唔到邊度係真實...邊度係夢境咁梳洗...
然後著返好衫行返出嚟...偷偷望一望日倫...
仲係好專心咁對住部平板...又拎起部電話掃幾掃...
仲未計劃好？
不過如果係日倫嘅話...都可以好放心...（你話係綽姿嘅話就要擔心姐...）
然後行過廚房...偷偷望一望...
「喂...落油落油呀梁綽姿...」
「究竟你識唔識㗎朱海羅？」
「我唔識唔通你識吖梁綽姿？」
「一定識多過你少少...鹽嚟㗎。」
「係喎係喎...嘻嘻...咁呢樽係糖喇掛？」
「呢樽係幼鹽...你真係唔識㗎喎。」
「差唔多嘅樣...又唔係自己屋企...點分吖？」
「試啖囉。」
「喂好鹹呀！想鹹死人咩？！」
「燶喇。」
「喂你見燶又唔熄火？！」
「呢味餸你負責㗎嘛。」
「我負責你就唔幫手㗎喇？你嗰味都著火喇！」
偷偷望住兩個小妹妹喺廚房雞手鴨腳咁...會唔會燒咗人哋個廚房㗎？
唉...都係唔好理咁多...行返出廳先...
行到出廳企喺窗台前...已經日落西山...天都開始變藍...變黑...
黑夜...有種親切嘅感覺...
奇怪...點解突然會有...之前都唔覺...
突然覺得黑夜好寧靜...好安全...
唔通係因為...多咗喺黑夜活動？
邊關事呢？一直返工唔係OT到凌晨...就係夜晚先去酒吧見客...
一直都係黑夜活動開嘅我...一直都只係覺得黑夜好攰...
但而家...完全冇攰嘅感覺...仲好似...帶點...興奮...
點解會咁㗎呢？
我就企喺窗台...望住窗外嘅夜景...
呢度都有十幾廿樓高...可以俾我望得遠啲...再遠啲...
望到最遠最遠...遠一遠...放空...放空...
時間不知不覺咁過...不知不覺...
「飛揚哥哥～有得食喇～」羅羅就拎住兩碟餸放喺餐檯～
『哦...咁快嘅？』我轉身一望，亦望到綽姿拎住兩碟餸行出嚟。
我偷偷望綽姿手上兩碟餸...同餐檯上兩碟餸...都好似有板有眼...
頭先唔係就快要燒咗日倫個廚房㗎咩？又估唔到煮出嚟OK喎～
日倫都喺廚房拎咗兩碟餸出嚟：「真係估唔到...俾你兩個搵晒我啲食材出嚟...」
羅羅同綽姿再行入廚房，羅羅就嗌出嚟：「係吖～你睇小我哋吖？行動型行者都識摷嘢㗎嘛～收唔埋㗎喇～」
日倫放兩碟餸喺餐檯上：「你哋真係唔留返啲㗎喎～」
羅羅同綽姿就各拎兩碗白飯，放喺餐檯上，羅羅繼續講：「係唔留㗎喇～有得食仲唔食盡佢吖？」
『唔留返啲...有咩事就連少少渣拿都冇...』我行到埋餐檯前...嘩...真係好豐富咁喎...
有魚有菜又有肉...四個人食六碟餸...仲要大大碟咁...
日倫派埋筷子坐低：「嗯嗯...飛揚就講得啱喇...你兩個冇理由諗唔到㗎嘛？」
綽姿坐低，羅羅就拉住我坐喺佢身邊：「咩我哋諗唔到姐～可以有咩事姐？」
『唔係話可以有咩事...係任何時候都要留有一手...』咁豐富...食唔食得晒㗎？
日倫、綽姿同羅羅都冇出聲...淨係眼定定咁望住我...
『做...做咩？』咁樣望住人...真係好尷尬囉...
日倫擰擰頭：「冇...冇...覺得你...唔同咗姐...」
綽姿點點頭：「終於似返啲樣。」
嘩...係唔係讚緊我吖？
羅羅就甜絲絲咁望實我：「點唔同都好～都係我最愛嘅飛揚哥哥～」
『哈...哈...哈哈...』唔好咁啦...好老尷㗎真係...
綽姿冇羅羅咁好氣，已經拎起碗飯開餐。
日倫都拎起碗筷：「食飯喇～」
『嗯嗯...大家...食飯...』食飯食飯...
「飛揚哥哥試呢個吖～我煮㗎～」羅羅夾餸俾我～
『哦...好好...嗯！好好好味！估唔到你哋兩個煮嘢食都咁好食！』好有煮家飯嘅味道！
羅羅谷起塊面豬登：「呢碟係我煮㗎！冇佢份㗎！」
綽姿就夾另一味餸俾我：「咁你試埋我煮。」
『嗯！真係好好味呀！你煮嘢食真係越嚟越叻喎！』之前係墜毀UFO...而家係入得廚房，出得廳堂嘅小妹妹！
綽姿冷眼望一望我就繼續食...
羅羅又谷住塊面豬登：「咁邊個好食啲？」
『呃...兩個都咁好食...』呢啲問題答邊個都係死㗎咋喎...
「唔得！」羅羅谷到塊面都紅晒，「一定要揀一個！」
『咁...咁就要食多啲先分到喇...』拖字訣！
日倫試完兩味餸，擰一擰頭：「計我話就兩個都麻麻...」
羅羅同綽姿都怒視住日倫，異口同聲問：「你講咩話？！」
日倫都係擰擰頭：「對比起我嚟講，你哋兩個都係BB班～」
嘩...挑機咁話喇喎...
羅羅帶住質疑嘅眼神打量住日倫：「你會煮嘢食㗎咩？」
綽姿邊食飯，邊冷眼打量住日倫，點點頭。
日倫繼續擰擰頭：「我唔煮嘢食又邊會有咁多嘢食喺屋企俾你哋煮吖？行動型嘅行者都要用腦去分析嘅～」
啱吖啱吖～
綽姿冇日倫咁好氣，繼續邊夾餸邊食飯。
羅羅仲係唔服氣：「講到尾你都係介意我哋煮晒你啲嘢食姐～小氣鬼～飛揚哥哥唔准點頭喔！」
『係係...唔點頭就食嘢啦～』
「我要飛揚哥哥餵～」
『好好好...我餵你～吖～～～』
「唔唔～有飛揚哥哥餵係最幸福～我都餵返你～」