《香港傭兵》: [Day 22－現在未來] PART 09
大家又沉思...
『我估係...EVE...』我唔知大家覺唔覺得...
係唔係又係覺得但唔講出口...
之但係...我總係覺得...EVE...
日倫諗一諗：「係原核...」
綽姿同羅羅都望住日倫，異口同聲：「原核？」
日倫點點頭：「其實我都唔係太清楚...之但係貝講過要喚醒ADAM...比起喚醒EVE...更難...更難...難上加難...用三原核嘅ADAM同EVE相比嘅話...咁EVE相對應該都係其中一種原核...」
『嗯...我都認為係...』我都點點頭...
綽姿冷眼咁打量住我...羅羅就疑惑咁打量住我...
『喂...喂你哋咁嘅眼神係咩意思吖？我真係咁認為...我一聽到貝咁講就有咁嘅諗法㗎喇！』做咩姐？好似質疑我馬後砲咁...
綽姿冇我咁好氣...羅羅就勉強認同咁...
唉算...佢哋點睇我都唔重要...
綽姿完全無視我，問日倫：「你話係三原核...ADAM同EVE...仲有一個呢？」
日倫接住講：「LILITH。」
之前日倫都已經同我講過...
羅羅打量住日倫，笑住咁講：「睇嚟你都真係知唔少喎～果然係調查型行者～」
「唔係...」日倫擰擰頭，「我並唔知得好多...對於LILITH...我只知道個名...而EVE都係同你哋一樣，啱啱先從貝口中得知...」
綽姿同羅羅都打量住日倫...
日倫繼續講：「EVE...一直都喺逆行者手上...」
綽姿接住講：「正確嚟講，應該係喺屯門常開或者天水圍城手上。」
羅羅接住講：「而ADAM本來就係由屯門常開或者天水圍手中...交到去西貢獻命手上...」
日倫接住講：「佢哋兩邊...本來就係各持一個原核...」
我又接住講：『而家就係EVE喺天門手中...』
我都未講完，日倫就接住講：「EVE...究竟有咩能力呢？」
綽姿諗一諗：「喚醒...係指咩呢？」
羅羅又諗一諗：「分開唔同階段...唔同階段又有咩分別呢？」
我又諗一諗：『ADAM同EVE...會有咩分別？』
綽姿同羅羅都冇出到聲，打量住日倫...
我都跟住佢哋兩個...打量住日倫...
講到尾...日倫都係調查型行者...手頭上點都應該多資料過我哋掛？
日倫無奈咁擰擰頭：「EVE真係唔知...至於ADAM...本來有關ADAM係知得多啲嘅...之但係而家你哋都聽咗貝所講啦...我哋所知嘅，都係一樣咁多㗎咋。」
『ADAM本來喺西貢獻命手中...但俾SPIRIT陰咗...失控產生黑球...吞噬咗西貢...黑球係一種好特別嘅副產物...可以抽取...製造高科技嘅嘢...最重要嘅都係...ADAM被我哋SPIRIT搶走...而家喺我哋SPIRIT手中！』我一直...一直搵緊嘅ADAM...帶我返翻去過去嘅ADAM！
日倫諗一諗：「萬一真係喺我哋SPIRIT手中...咁就真係唔使諗...好難搵得到...」
我捉住日倫衫領：『難搵？點難搵呀？明明就近在咫尺！就喺我哋自己手中呀！』
日倫雙手搭住我膊頭：「你冷靜啲先...」
『冷靜？我點冷靜呀？你叫我點冷靜呀？我要返去呀！我要返翻去過去呀！一直要搵嘅嘢...可以帶我返去嘅嘢...就喺我哋手上咋！！！』
羅羅都行到埋嚟我身邊，捉住我手臂：「飛揚哥哥...你冷靜啲先...冷靜啲先...唔係你諗得咁簡單...」
唔係我諗得咁簡單...
我鬆返開對手...
綽姿冷冷一句：「佢知...佢知唔係咁簡單...話晒都已經咁多日...成為我哋SPIRIT嘅隨行者。」
『Sorry...』冇錯...都已經咁多日...點可能唔知...
我哋SPIRIT...幾咁神秘...就算係我哋行者自己本身...都唔清楚...
唔好話內部...外部都了解唔到...
每個行者都係只知自己要知嘅事...做自己要做嘅事...
ADAM...三原核嘅情報咁珍貴...會有邊個知？
喺SPIRIT當中...
『我諗就只有...片翼...』先行者No.2...
羅羅接住問：「你係想講...所有嘢都同片翼有關？」
日倫接住幫我答：「就算唔係所有...都應該莫大關連...」
『又係片翼...』點解又會係佢...
綽姿冷冷放下一句：「關佢事都唔出奇...始終佢都係負責重要嘅強迫委託。」
日倫都點點頭：「冇錯...雖然都係冇得到證實...之但係過去好多重要嘅強迫委託都係由片翼親自帶隊。」
羅羅諗一諗，點點頭：「雖然我接觸佢嘅機會唔多...」
日倫都點點頭：「我都只係見過佢幾次...幫過佢幾次手...」
羅羅碌大對大眼仔：「佢都要搵你幫手？！」
日倫再點點頭：「都係幫手調查啲嘢咁啦...」
綽姿同羅羅打量住日倫，異口同聲講：「好厲害。」
日倫面有難色：「有咩咁厲害吖？就算係先行者，都會搵調查型執行者買手上嘅情報㗎啦...」
羅羅打量住日倫：「人哋係先行者No.2喎...」
綽姿都點點頭...
日倫皺住眉咁：「有乜咁出奇吖？你哋知唔知調查型嘅先行者啲情報主要都係放上情報庫㗎？雖然話佢哋啲第一手資料又準確又詳細又有口碑...但好貴㗎真係！所以有唔少先行者都寧願私底下搵我哋執行者買情報囉...喂你哋識唔識嘢㗎？」
羅羅冷眼打量住日倫：「人哋係先行者No.2喎...」
綽姿又點點頭...
日倫皺晒眉咁：「先行者No.2又點吖？唔俾人哋覺得自己分析力強...搵執行者買情報返嚟再自己加以分析就足夠㗎？」
「唔...」羅羅同綽姿都疑惑咁打量住日倫...
片翼...先行者No.2嘅片翼...
就喺呢個時候，我大髀一震...
係...電話？
同時！茶几上都有兩部電話一震！
我左手拎部電話出嚟...綽姿同日倫都拎起茶几部電話一睇...
一睇個Mon...就有一個訊息框...顯示住...
『緊急...』委託？！
點解又會有...
「做咩做咩？」羅羅八八卦卦咁望望我哋手上部電話，「有強迫委託吖？」
點會又有強迫委託...
羅羅都喺茶几上拎起部電話一睇：「冇嘅冇嘅？」
我立即撳開個強迫委託一睇...
「喂喂你哋接到咩委託吖？」
今次嘅委託...破壞工廠？！
「喂喂俾我睇吓啦～」
破壞邊間工...唔通係？！
我立即撳入內容一睇...係要...破壞...解放軍位於荃灣嘅工廠！
「喂吖喂吖～唔好唔理我好喎～」
果然...果然係嗰間神秘嘅兵工廠！
雖然都已經算唔得上係神秘...
我再睇一睇...就見到...
『片翼？！』又係片翼發出！
「咩咩片翼吖？又係片翼發出嘅強迫委託吖？」
點會又係佢㗎？唔會係咁啱啦！
『羅羅...你冇收到委託？』見羅羅咁想知...我都唔好意思再唔理佢...
羅羅擰擰頭：「冇吖冇吖～你哋收到啲咩委託吖？」
我就交部電話俾羅羅睇...
就喺呢個時候，綽姿想阻止：「喂。」
『唔緊要啦...就算羅羅冇收到委託...我哋而家總算係坐埋同一條船...』我就交部電話到羅羅手中...
羅羅雙手接過：「都係飛揚哥哥夠體貼～」
綽姿就冇我哋咁好氣，睇住自己部電話...又撳兩撳...碌兩碌...
羅羅都拎住我部電話睇睇...撳兩撳...又碌兩碌：「點解嘅？點解你哋都有份...係我冇嘅？如果話係計地區...我都同你哋同區啦...點解...點解淨係得你哋三個...成個強迫委託淨係得你哋三個咋喎...」
日倫都望住自己部電話...撳兩撳...碌兩碌：「可能係因為...我哋三個都入過去嗰間工廠...」
羅羅谷住塊面豬登：「我都有入過去啦～我哋三個入過去交收添㗎～」
『嗯...喺我哋潛入去...更早嘅時間...我哋三個都入過去交收...』嗰個手提箱...裡面載有遠端連接投射系統嘅黑色手提箱...
日倫擰擰頭：「唔好唔記得...我哋唔止係潛入...仲喺入面見到片翼...」
羅羅睜大對大眼仔：「你哋喺入面遇到片翼？！佢喺入面做啲咩吖？駐守吖？你哋俾佢發現吖？唔係吖化...咁都仲生存到？！」
「唔係...」日倫再擰擰頭，「照我哋嘅結論...片翼都係同我哋一樣...潛入去...調查啲嘢...」
「唔係吖化？！」羅羅睜到對大眼仔就快要跌出嚟！「片翼喎！先行者No.2喎！鼎鼎大名嘅先行者No.2片翼大人親自去調查？！你頭先都有講過話佢會搵你幫手～買你手上嘅情報啦～點會親自出手調查工廠咁大笨象吖？」
「唔...」日倫諗咗一諗，「我都覺得奇怪...就算話間工廠同解放軍有關，都唔使勞煩到片翼大駕親自出手...」
『嗰間工廠...真係好唔簡單...我諗都唔使我多講...你哋應該比我更清楚...』我望一望羅羅...再望一望日倫...最後打量住綽姿...
佢哋三個諗咗一諗...再點點頭...
綽姿再諗一諗：「間工廠所用嘅材料...正正就係由黑球抽取嘅物質。」
羅羅又諗一諗：「所以裡面有咁多探測唔到嘅設備...」
日倫又諗一諗：「同我哋SPIRIT嘅裝備一樣...七三分帳...我哋SPIRIT俾技術解放軍幫我哋抽取...七成歸我哋...三成歸佢哋...嗰三成...就喺嗰間工廠加工...製造...」
『呢個就係...貝所講...我哋SPIRIT同解放軍嘅合作...』仲有會展嗰個會議...
如果“抽取黑球”就係我哋SPIRIT同解放軍嘅合作...咁國安局呢？
日倫點點頭：「我哋SPIRIT同解放軍嘅合作...而家就要我哋去破壞解放軍嘅工廠...再加上...」
綽姿接住講：「尋晚...破壞喺西貢遺址裡面嘅所有設施...盡量殺死裡面嘅研究人員...」
羅羅接住講：「即係話...我哋SPIRIT同解放軍嘅合作關係破裂？！」
『有一點我想知道...強迫委託有冇機會由第三方委託我哋SPIRIT？』呢點我一直都冇搞清楚...
之前就話唔需要搞到咁清楚...但而家唔同...
日倫又諗咗一諗：「有係有嘅...而且好常見...以我估計...比起我哋SPIRIT內部發出更多...好大機會係因為情況太緊急...評估過風險太高或者評估得唔夠深入...呢啲情況我喺評估嘅時候都有發生過...評估完出到嚟唔係直接放上委託板...而係由先行者發出強迫委託...」
『咁邊個會想破壞我哋SPIRIT同解放軍嘅合作關係？』我又好奇...
日倫擰擰頭：「邊個想破壞都冇關係...最重要都係的而且確有咁嘅委託...仲要係強迫委託...仲要係兩次...要知道關乎我哋SPIRIT嘅利益...冇我哋SPIRIT嘅允許...個委託又點會發出？」
咁又係...
最後把關嘅都係我哋SPIRIT自己...唔得到我哋SPIRIT自己批准...個委託邊出到街？仲要係強迫委託...仲要係由片翼發出...
綽姿都點點頭：「係日倫講嘅就冇錯。」
羅羅都點點頭：「調查型行者...基本上唔會出錯～」
日倫擰擰頭：「我都有錯過...一次咁多啦...」
一次咁多？係指...西貢攻防戰嗰次？
我估...應該就係...