《香港傭兵》: [Day 19－神秘工廠] PART 03

Lock返部電話...袋返好...再行近啲...再睇清楚啲...

企喺入口嗰幾個金毛MK仔都察覺到我越行越近...望咗過嚟...

我又再望清楚...當我差唔多行到去班金毛MK仔面前...我見到佢哋身後...好似有...路障？

「喂！入去吖？」其中一個金毛MK仔截停咗我，指指佢身後嘅黃金海岸。

『係吖係吖...』睇嚟真係...



企喺出面就有四五個金毛MK仔...

然後又有路障欄住條路...

再入少少又有六七個金毛MK仔喺度食緊煙...吹緊水...

加加埋埋都十一二個人守住...使唔使咁誇張吖？

最大問題嘅都係...上兩次過嚟...都冇人守又冇路障...可以話係出入自如...



點解而家又會...

「入去做咩吖？」條金毛MK仔揭開件大褸！叉住條腰！

『我...我入去碼頭嗰邊拎貨嘅...』我驟眼一望...就望到條金毛MK仔腰間插咗把手槍...

唔止佢一個...我仲留意到隔離嗰個...仲有後面嗰兩個金毛MK仔嘅腰間都係插咗把手槍...

「拎貨？拎咩貨吖？」條金毛MK仔打量住我咁行近我身邊。



『拎咖啡豆...』屌又使唔使問得咁清楚吖？

「拎咖啡豆？搜咗身先！」條金毛MK仔就推我埋燈柱。

我雙手撳住條燈柱...擘大對腳...

搜身？使唔使咁誇張吖？

因為咩事搞到咁緊張吖？

係咯...點解黃金海岸又會突然變得咁緊張？

唔通係因為...

兩個金毛MK仔就企喺我身邊𥄫實我...



身後條金毛MK仔就由我對腳一直向上搜...

都真係搜得好仔細...連袋底都搜埋...

又真係估唔到條金毛MK仔都幾專業㗎喎...唔講仲以為係警犬...

不過又好彩冇帶裝備喺身～唔係嘅話又要諗藉口解釋～麻煩到嘔～

條金毛MK仔由我嘅褸袋拎咗部電話出嚟，望咗幾眼：「解鎖！」

『哦...』我就右手拎住部電話...望一眼...解鎖...

條金毛MK仔立即搶咗我手上部電話！又碌又撳又睇！



有乜好睇吖？用右手解鎖嘅話，就只係一部普通嘅電話～

條金毛MK仔又真係碌到冇嘢好碌，睇到冇嘢好睇咁，好快就隊返部電話俾我：「入去啦！」

『哦...唔該...』都話咗冇嘢睇㗎啦～

我都大模斯樣咁行過路障～同幾個金毛MK仔擦身而過～

一路行...向住碼頭向方行去過...又偷偷回頭望幾望...

我望到就連入嚟嘅貨車...都要停喺路障前...兩個金毛MK仔仲會走上車搜查...

睇嚟真係好緊張咁喎...

唔通真係因為...我哋？



我繼續向住碼頭方向行...一路上都遇到唔少金毛MK仔喺度巡緊...

兩三個一Team嘅又有...四五個一Team嘅又有...

路旁同出入口又企咗幾個金毛MK仔把守又好...睇水又好...

個個唔係食住煙左望右望...就係吹住水咁左望右望...

而一路上都仲係有幾個平民百姓喺身邊經過...

再望遠少少...市集嗰邊都有人開緊檔...

或者而家都仲係時間尚早嘅關係，唔算有太多人...但總算係正常運作...



只係提高咗戒備...

而有一點值得注意嘅就係，雖然提高咗戒備，但戒備嘅人仍然係由黑社會擔任...而唔係西貢獻命...

睇嚟...黃金海岸真係交晒俾班黑社會？

定係仲有...其他原因？

我一路喺心底裡盤算住...一路向住碼頭方向行...

“飃～灑～”好快就俾我行到碼頭。

望望個碼頭，有唔少工人喺度搬緊貨...

一箱又一箱...大大細細都有...

又有一包二包...大包細包都有...

仲一隻停泊喺碼頭嘅白色船...有唔少工人正上落貨...

當然就唔少得啲金毛MK仔...

成個碼頭都真係有唔少金毛MK仔喺度食住煙傾緊計...又睇緊水咁...

而我就要搵咗“友哥”先～

咁大個碼頭...邊個先係友哥吖？

我行多幾步...望多幾眼...

Owner講得出個碼頭係友哥管嘅話...似係大粒啲嘅...應該會係...

我行多幾步...就見到個大大隻隻...黑黑實實...拎住塊板...好似喺度點緊貨咁...

我就行埋去...行近呢個男人身邊：『友哥？』

「哦？係吖...」友哥望咗我一眼，又繼續點貨，「攞貨吖？」

『係吖係吖...Today Coffee嚟拎咖啡豆㗎～』又真係一搵就俾我搵到～睇嚟我真係進步咗唔少～

「哦？」友哥就打量住我，「杜生話有個呆呆地嘅𡃁仔嚟拎豆...就係你吖？都似啦...」

『呃...係吖係吖...』咩呆呆地吖？我都唔知幾醒目！

「等等啦...葉仔！喺嗰邊拎箱咖啡豆嚟！」友哥對住個𡃁仔指指遠處...碼頭旁邊...幾箱木箱，「今朝第一船嗰批貨㗎！」

「得得！我知邊箱喇！」個𡃁仔就向住遠處...放喺碼頭旁邊嗰幾箱木箱行過去。

『呃...係呢...點解好似...多咗咁多人巡咁嘅？』趁有時間...打聽一下先～

「嗯？」友哥又一邊點貨，「幾日前有個黃傘嘅人潛咗入嚟吖嘛...」

『黃傘嘅人？』係...嗰個“逆行者”？！

「嗯...呢度唔歡迎黃傘㗎...其實好多地方都唔歡迎佢哋...」友哥繼續點貨...又擰擰頭。

原來係...黃傘...

「結果有“人”捉走咗佢啦...」友哥講個“人”嘅時候語氣特別重...

友哥所指嘅“人”...係我同綽姿...

「為免再俾黃傘嘅人潛入嚟...咪加強守備囉...你啲豆吖...」友哥指指個𡃁仔手上箱咖啡豆。

『唔該...』我接過𡃁仔手上箱咖啡豆...好彩今次唔算好大箱...又唔係太重姐...

「唔送喇...」友哥向個𡃁仔指指面前幾箱木箱，「同我抬呢嚟箱過去嗰邊...」

總算又俾我打聽到啲嘢...

原來...唔關我哋事...係關黃傘事...

正當我拎住箱咖啡豆，想轉身離開之時...

「飛揚？」背後傳嚟一把穩重嘅男仔聲...

我回頭一望...正正就望到有一個身影...喺正我背後...

我再望清楚啲...呢個身影係...

『日...日倫？』

喺正我面前嘅...正正就係...著住黑色大褸...一面穩重嘅日倫...

「又會咁啱嘅？」日倫望望四周一眼，再帶住微笑望住我。

『哦...係吖係吖～我嚟拎貨咋嘛～係呢又會咁啱喺度撞到你嘅？』日倫...應該唔係喺特殊區...應該係喺出面落腳㗎喎...

「我想入嚟睇睇...」日倫再望望班工人上落貨，「得唔得閒？邊行邊講？」

『哦...好好...』我諗都算得閒嘅...反正Owner都係叫我十二點前返去姐。

我就跟住日倫身邊，行出碼頭。

一直行...向住...市集嗰邊嘅方向一直行。

日倫邊行又邊望望四周，再望望我手上箱咖啡豆：「幫Today Coffee拎㗎？」

『呃...係吖係吖～見得閒咪幫佢哋做跑腿囉...』嘩...佢咁都知係幫Today Coffee拎嘅？

我望一望個箱面...一塊木板咁...上面乜都冇印...

「哦～我係聞到有咖啡豆味，所以估係Today Coffee～」日倫帶住微笑點點頭，又隨便咁望一眼四周。

『哦～』原來係聞到...

其實係唔係我鼻塞呢？我又真係聞唔到有咖啡豆味...

係真係要勁大力索...好用心咁留意...先聞到啲啲咖啡豆味...

「佢哋唔夠人用咩？又會搵你過嚟拎嘅？」日倫打量住箱咖啡豆。

『人就應該啱啱好夠嘅～之但係呢...嗰個輝哥成日扮舊患復發偷懶㗎～咁雨姐口硬心軟咁去照顧佢～咪得返Owner一個睇舖囉～咁冇人去拎，我咪幫手拎囉～』啱吖啱吖～雨姐就係口硬心軟嘅女人仔～

「舊患復發...」日倫諗咗一諗，「咁應該都幾嚴重...」

『九成係扮㗎啦～不過唔好話...我都真係見過一次...輝哥標晒冷汗...又面青青咁...』或者...都總有一成係真嘅...

「嗯...」日倫點一點頭，又帶住微笑打量住我，「咁你有人工收㗎嘛？」

『都算有嘅～五十蚊囉～』真係好唔化算...

「哈哈～好過冇啦～」日倫笑一笑，又望一眼喺身邊駛過嘅貨車。

『哈哈～都係嘅...』我都望住架貨車駛過之後，『係呢...你...咁早就入咗嚟嘅？』

「係吖...」日倫望一眼四周，「諗住早啲入嚟調查...搜集情報...睇睇有冇特別...點知就見到呢度守衛森嚴咁...」

『嗯...都係吖...係而家我哋行緊呢段路冇乜人咋...頭先一路上都有勁多金毛MK仔巡嚟巡去咁...』真係喎...係呢段路先唔見有金毛MK仔咋喎...

「個個都有槍喺身添。」日倫點點頭。

『係吖係吖！你都有留意到吖？』我睜大對眼咁睇望日倫！

「嗯...雖然只係手槍...」日倫諗一諗，「或者呢邊始終都係特殊區...不過頭先入嚟嘅時候，喺入口就已經要搜身...係麻煩啲。」

『係吖係吖...連入嚟嘅貨車都會上車搜㗎...係喎！咁你身上嘅裝備咪...』我都未講完要講嘅說話...

「我離遠見到企咗咁多人喺入口...仲有架貨車被人搜緊，就將啲裝備收喺草叢。」就被日倫打斷。

『哦～』日倫真係好鬼醒...

「一個小小嘅海岸...都要咁緊張...」日倫望住遠方嘅市集。

『因為之前有黃傘嘅人潛咗入嚟喎...呢邊係唔歡迎黃傘嘅...』我都望住遠方嘅市集...

好似仲係唔算有太多人擺檔...

「香港都冇乜邊個地方係歡迎黃傘...」日倫諗一諗，點點頭，「或者就只有天門...」

『天門吖？』我都諗一諗，『都啱嘅...話唔定黃傘同天門真係有關係...』

「嗯？」日倫打量住我。

『潛入嚟嗰個黃傘...係逆行者...』嗰個灰色頭髮...有粒楊丞琳痣嘅靚女...原來係逆行者...真係呃晒...

「嗯...咁就應該係喇...」日倫點點頭。

『黃傘好似被愛港愛國打壓得好勁呢～唔投靠天門都唔掂～』成個委託板都係愛港愛國對付黃傘嘅委託...

萬一真係有行者接...黃傘佢哋就真係好唔得閒...

「天門都需要出面嘅人幫手。」日倫又點點頭。

『吓？天門都要人幫手㗎咩？』逆行者咁鬼勁...淨係單憑佢哋自己，冇嘢搞唔掂啦！

「始終都係...」日倫又諗一諗，「特殊區以外...」

係特殊區以外...就要人幫手？

其實我又真係唔係好明...但見日倫冇講落去，我又唔係咁好意思問...

無謂俾人覺得我係問題寶寶啦～

沿住馬路旁邊行多幾步，又開始見到有金毛MK仔喺路邊食緊煙...

又有幾個食住煙嘅金毛MK仔巡緊...

唔使幾耐，我哋就行到過嚟市集。

『睇嚟真係仲有啲早...唔係有好多攤檔做生意...』其實連客人都唔多...

而家嘅黃金蒙馬特都係得幾檔喺度擺賣...

仲有幾檔喺度執緊...整理緊...

而遊客呢？可以話淨係得我同日倫...

而最多嘅都係...金毛MK仔...

啲金毛MK仔都係一樣啦...喺唔同嘅角落路邊樓梯旁食住煙咁周圍望...

有唔少仲望咗過嚟...打量住我同日倫...

日倫就好似唔多在乎咁，行上樓梯。

我都跟住喺日倫身邊行，行到上平台。

日倫又隨便咁望一眼四周：「不如搵個地方邊食邊傾好唔好？」

『都好吖...之但係呢度好似...冇乜地方...食嘢...』平台之上...就只有...

「嗰度咪有嘢食囉～」日倫指住...酒吧！

冇錯喇！平台之上...就只有呢間酒吧！

『嗰間酒吧唔安全！上次就係喺嗰間酒吧捉嗰個逆行者㗎！』真係好鬼危險！

「哈哈～而家呢區仲有邊度安全㗎～」日倫笑笑口，擰擰頭，就向住酒吧方向行過去。

講就係咁講姐...之但係...明知山有虎...又何必偏向虎山行呢？