《香港傭兵》: [Day 14－紅色警戒] PART 09
「死咯...」綽姿Face Palm，「你真係唔知㗎？」
吓？乜我係應該知㗎咩？
『我第一次見佢嘅時候，佢都冇用精神液...』係咯..我又點會應該知呢？
「冇用精神液都Feel到啦...佢咁古怪...」綽姿冷眼望住羅羅。
「喂！咩古怪吖？我都不知幾正常！」羅羅又谷起塊面豬登！
「你正常？」
「我點唔正常吖？你先古怪吖！」
『係咯係咯...』
「你係咩咯吖？佢成個行者咁嘅樣都睇唔出你仲係咯？真係好鬼蠢㗎！」
「唔係吖唔係吖～咁先可愛吖嘛～」羅羅雙手翹實我隻手臂。
小饅頭...羅羅個小饅頭壓晒埋嚟...
「可咩愛吖？遇到行者都認唔到出嚟...俾逆行者埋咗身都唔知啦！死咗都唔知咩事啦！仲唔係蠢吖？」
「你唔好咁話佢啦～係我掩飾得好姐～」
『你...』我再眼定定望實羅羅，『你真係行者？』
羅羅帶住微笑，眼定定咁望實我：「嗯～朱海羅，妖邪，執行者。」
「死啦...仲要問...」綽姿又Face Palm，「點解我會有啲咁蠢嘅隨行者㗎...」
『咩話？！你勁綽姿咁多都仲係執行者？！』唔撚係吖化？！
「你講咩呀？！」綽姿一個飛身就跳咗上床！雙手捏住我條頸撳我落床！「咩勁我咁多呀？！」
『咳！咳...死...死...死喇我...』我雙手拉住綽姿對手，拼命掙扎！
我有講錯咩...咁羅羅真係勁過綽姿...
而綽姿嘅實力又咁接近先行者...咁有“羅羅點解仲未係先行者”呢個疑問都好正常姐...
「你放手先啦～你放手先啦～佢都係講事實姐～」羅羅都幫我拉住綽姿！
「哼！」綽姿冷眼咁打量住我同羅羅，落返床。
『咳咳！咳...』差啲冇命...
所以話好多時真係真相不要說明...
講真話真係好易收皮...
「其實我都唔知點解仲未做到先行者～」羅羅一邊幫我掃背...掃返順條氣，一邊諗諗...
「明顯係你嘅性格問題。」綽姿冷眼望住羅羅。
「我性格有咩問題？」羅羅又冷眼望住綽姿。
「幼稚。」
「我呢啲叫少女吖好唔好？！」
『咁講法...你所講嘅...全部都係大話...』羅羅同我講嘅...所有所有...
羅羅眼定定望實我：「我冇講大話㗎～SPIRIT都算係一個孤兒院吖～而最重要嘅係...我對你係真嘅～」
對...對我係真？
羅羅又雙手翹實我手臂，甜絲絲咁帶住微笑。
綽姿就冇我哋咁好氣咁擰擰頭。
『呃...呃係呢...你哋...你哋一早就識㗎喇？』都係搵啲嘢講講...唔好咁尷尬...
「我哋？」羅羅打量住綽姿，「我哋都識咗好耐啦～早喺西貢攻防戰之前就認識㗎喇～」
原來...佢哋一早就識...
仲要喺西貢攻防戰之前...
「唔好講咁多廢話...」綽姿翹住對手，挨喺梳妝檯邊望實我，「點解你會知黃傘收埋咗目標人物喺嗰座工業大廈裡面。」
『我...我吖？呃...』我諗一諗，『早幾日出咗旺角...咁啱遇到黃傘嘅人挾持住目標人物同警察...國安局對峙...然後我跟住佢哋尾...去到嗰間工業大廈囉...仲要咁啱第一次遇到羅羅添～』
「嗯嗯～嗰日我都係咁啱去搜集有關黃傘嘅情報～咁啱遇到飛揚由天上飛落嚟～呢啲咪叫做命中注定囉～」羅羅又甜絲絲咁翹實我手臂～
小饅頭...羅羅個小饅頭...好軟熟...好有彈性...
「有冇搞錯...」綽姿冷眼望住我，「一個女仔見到你從天而降仲講乜命中注定你唔覺得好古怪㗎咩？」
『咁佢嗰時話曾經俾個好似我咁嘅SPIRIT嘅人救過吖嘛！』
「佢講你就信㗎喇？！」
「我真係有俾個SPIRIT嘅人救過㗎～」
「咁都唔係一啲戒心都冇㗎嘛？！」
『咁我真係冇諗過㗎嘛...』
「真係好弱㗎！」
「你唔好咁話佢啦～我覺得佢咁樣真係好可愛～」
「得喇得喇！唔好講廢話喇！咁即係話你一睇到個委託就估到目標人物會喺裡面啦？」
『呃...我係諗可能...或者...有機會...話唔定...起碼有啲線索囉...』肯定我就唔敢肯定㗎喇...
綽姿擰擰頭：「早就估到你有古怪。」
『咁我都係唔想你濫殺無辜姐...』我真係冇其他目的㗎喇...
「你有呢種想法真係好可愛吖～」羅羅又貼晒成個人埋嚟～
少女嘅身體...仲發育緊嘅少女身體...
「天真就天真啦...」綽姿冇眼睇我咁擰擰頭。
『係係...我知自己天真㗎喇...』我唔殺佢哋...佢哋想我死吖嘛...『咁你哋係幾時去到？』
綽姿冷眼打量住我：「我知你有古怪，就提出分開行，然後就跟住你尾...」
羅羅又帶住天真嘅微笑舉一舉手：「我一早就已經喺對面座大廈平台...即喺我哋第一次相遇嗰度呢～然後我見到黃傘嘅人入咗去冇幾耐，你又行咗入去喎！之後我仲感覺到有一股好弱嘅行者氣息...我就等待時機～」
『好弱嘅行者氣息...係唔係即係指我吖？』我指一指住自己個鼻。
綽姿又冷眼打量住我：「唔使問啦...」
『咩姐...咁點解我感覺唔到你哋嘅氣息嘅？』你哋感覺得到我...但當其時我完全感覺唔到附近有行者...
「你咁鬼弱就當然感覺唔到我哋嘅氣息啦！我哋控制氣息嘅能力唔差㗎！俾你感覺到我哋就死得啦！」
「你唔好咁講佢啦～」
「你話唔係咩？！用精神液嘅Level又高過我哋...維持精神化狀態就短過我哋...進入深層睡眠又早過我哋...又遲過我哋醒...你話係唔係弱喇？！」
「就係咁先可愛吖嘛～」
點解講講吓又講咗去我身上㗎...
『呃...話說...點解目標人物身上...會有精神能量？』都係講返正題...
「呢層...」羅羅咬住唇咁諗諗，「我都覺得奇怪...」
綽姿就翹住對手唔出聲。
『會唔會係...目標人物都係SPIRIT嘅行者？』我嘅大膽假設夠唔夠大膽？
「唔會。」綽姿擰擰頭，「佢同我哋...有分別...」
有分別？
「嗯...」羅羅咬住唇咁點點頭，「佢嘅精神能量唔係長袍發出...而係...直接喺身上...」
直接喺身上？！
『呃...其實會唔會係佢身上啲衣物都係用長袍嘅物料製造？』即係新款式呢...
「唔會。」綽姿又擰擰頭，「你有冇留意佢對手、頸同塊面？睇你個呆樣都知冇。」
吓？我又要留意到啲乜呢？
「嗯...」羅羅又點點頭，「佢哋精神能量係直接喺皮膚發出...就算你哋把精神刀斬中佢條頸，都會被精神能量擋住。」
又係喎...
當精神刀直接斬中目標人物條頸，冇任何衣物擋住之下...都有超強嘅紅色精神能量阻隔刀刃...
「雖然話喺我哋皮膚都會有少量精神能量做保護...但都唔足以好似目標人物咁，有咁強嘅保護能力...而且仲有一點...」綽姿諗一諗，「佢對爪...」
『發出紅光嘅利爪！！！』就好似精神刀刃一樣！
「嗯...」羅羅又點點頭，「佢對手乜都冇...但就可以散發出紅光利爪...呢點已經同我哋好唔同。」
冇錯喇...我哋係靠精神刀柄...
但標目人物就乜都唔使...直接靠雙手...
「而且佢嘅能量好大。」綽姿又諗一諗...
『係！係極大！不論係身上...定係雙爪！』防禦力極高...攻擊力又極大！
「唔止...」羅羅又諗一諗，「仲有口砲...」
係...仲可以用口噴出極高精神能量...當砲咁用！
「直接用身體...」綽姿諗咗一諗，「釋放出精神能量...作攻擊之用...」
「係我哋SPIRIT唔會用嘅方法...」羅羅又諗諗...
『點解我哋SPIRIT唔會用呢？』雖然我問完呢個問題之後覺得問得有啲戇鳩...
之但係我唔明吖嘛...
只見綽姿同羅羅互相對望...
咁...咁即係點？
「其實我哋都唔清楚吖～」羅羅擰擰頭～
吓？唔清楚？
「冇任何有關呢方面嘅情報。」綽姿都擰擰頭。
吓？又係冇呢方面嘅情報？
「或者係太過危險掛～」羅羅又擰擰頭～
吓？有幾時唔危險㗎？
「呢啲都係謠傳。並無實質證據。」綽姿都擰擰頭。
吓？係謠傳？邊度傳過嚟㗎？
真係唔明...點解身為SPIRIT嘅一份子，都總係唔清楚有關自己組織嘅事？！
「但謠傳又未必信唔過喎～」羅羅又諗咗一諗，「假如拉埋今次件事嚟講...」
拉埋今次件事嚟講？
「你嘅意思係...」綽姿又諗咗一諗，「目標人物用上危險方法...」
唔明...佢兩個講緊乜？
「有冇發現...」羅羅又諗一諗，「目標人物好似失控咁？」
『有吖有吖！直頭冇人性嘅野獸咁呀！！！』又大嗌！又亂爪！
「仲好似一直都...」綽姿又諗咗一諗，「神志不清...」
『神志不清...都係吖都係吖！一直都呆呆濟濟咁！』之前見佢被馬尾女挾持已經係咁！！！
「所以...」羅羅又諗一諗，「佢就係用上危險嘅方法...」
吓？都係唔明喎...
綽姿又唔出聲...翹住對手諗諗...
『呃...咁即係話...佢都係SPIRIT嘅人？』我真係諗唔到嘢...只好又大膽假設。
「唔係。」綽姿又擰擰頭。
『點解可以咁肯定呢？』係唔係又隱瞞住啲乜呢？
「係因為...」羅羅又諗一諗，「委託人係愛港愛國...」
『委託人係...愛港愛國？！』點會係班仆街㗎？
雖然話黃傘同愛港愛國係敵對...
之但係...目標人物同愛港愛國...有關係咩？
綽姿擰擰頭：「假如目標人物係SPIRIT嘅人，委託人唔會係愛港愛國...更冇可能會喺黃傘手中。」
雖然唔明...但好似好有道理...
綽姿再諗諗，打量住我：「你頭先話...黃傘嘅人挾持住目標人物同國安局對峙？」
『嗯！係吖！就頭先嗰個馬尾女咋嘛！係喇！個馬尾女呢？』同發咗癲咁嘅目標人物交戰之後，都唔得閒去留意馬尾女...
「佢趁亂走甩咗Luu～」羅羅咬一咬唇，「早知就捉咗佢先啦～」
噢...原來走甩咗...
「係國安局...」綽姿又諗一諗，「個馬尾女仲好似話...就算係同歸於盡...都唔會交返實驗品俾我哋...」
『係吖...佢係有咁講過吖...仲唔止一次...』我一捉住佢嘅時候就已經有咁講過...
羅羅又咬住唇諗諗：「黃傘...愛國愛港...國安局...實驗品...真係奇怪...點連都連唔到落同精神能量有關連...仲要係極大量嘅精神能量...」
「嗯...」綽姿又點點頭，「極大量嘅精神能量...仲會爆炸...」
「冇錯喇...」羅羅點點頭，「雖然爆炸嘅威力唔算好大...之但係...散發咗好多好大量精神能量！」
綽姿又點點頭：「啲精神能量亦都消散得好快...」
羅羅又點點頭：「只係維持咗一瞬間...就消失得無影無蹤...」
綽姿再諗諗：「而喺我一見到目標人物之時...我就感覺到佢身上有啲唔妥...」
羅羅打量住綽姿：「喺佢身上...感覺到氣息？」
綽姿點點頭：「嗯...有一點點...好微弱...」
羅羅接住講：「好微弱...好微弱...然後一瞬間膨脹...爆發！」
「你都感覺到？」
「你都感覺到我又點會感覺唔到吖？」
雖然仲係唔係好知乜嘢情況...
之但係...有一點...喺我腦海中閃過...
國安局同我哋SPIRIT...係有合作關係...