《香港傭兵》: [Day 14－紅色警戒] PART 08
點會...
明明係羅羅...
眼前呢個...啱啱幫我哋擋完口砲嘅...明明就羅羅...
點會...點會係...
「我哋又見面喇～」羅羅帶住微笑望住我講完一句，身上就飄出大量紅色粒子！
點會係...羅羅點會係...行者？！
無數咁多發出刺眼紅光嘅紅色粒子圍住羅羅身邊！
仲要...咁強...氣息好強！
唔止...唔止羅羅...附近都出現咗唔少陌生嘅氣息！
喺上面...破爛嘅牆邊...水管...圍住我哋...企咗唔少散發住紅色粒子嘅黑色身影！
係頭先...一定係頭先目標人物碌口砲...強大嘅精神能量引起佢哋嘅注意...引咗佢哋過嚟！
無錯...精神能量...點解目標人物會有...
「佢係我嘅！」羅羅大喝一聲！就一個閃身！邊拔出精神刀柄！亮出極刺眼嘅精神刀刃！邊飛過去目標人物面前！
“嗡！嗡！”羅羅極速揮兩刀！目標人物對手臂隨即被斬斷！
好快...仲好強...好強大嘅精神能量！！！
「嗚呀！！！」目標人物雙臂斷口噴出大量紅色粒子！！！
斷肢亦隨即化成大量紅色粒子，喺空氣中飄散！！！
頓時間，整個空間都被大量紅色粒子包圍！
羅羅立即一手捉實目標人物後腦，順勢撳佢塊面落地！
「嗚呀！嗚...嗚！」目標人物整個人就被羅羅壓住喺地上！博命掙扎！
竟然...可以咁輕鬆...
「嗚呀！嗚...嗚！嗚呀！！！」目標人物身上飄散出大量紅色粒子！
而且...而且面上好似...有啲裂紋...
一條條...一條條裂紋...
裂紋之中發出紅光...同時亦有大量紅色粒子喺裂紋中飄出！
唔對路...好似...點睇都好似...唔多對路！
「嗚...嗚呀！嗚...嗚！嗚呀！！！」目標人物身上嘅裂紋越嚟越多...
由裂紋飄出嘅紅色粒子亦越嚟越多...越嚟越光！
「嗚呀！嗚...嗚...嗚！嗚呀呀呀呀！！！」目標人物全身發出刺眼嘅紅光！
“轟隆！”一聲巨響！目標人物發生大爆炸！
『嘩！』爆炸所產生嘅紅光極刺眼！刺眼到白茫茫一片！乜都睇唔到！
痴線㗎！發生咩事呀？點解會人體爆炸㗎！
過咗一陣...開始睇得返嘢...就見到成個空間都被紅色粒子包圍...
紅色粒子閃著閃著...飄散...消失...
「咳...咳！」被紅色粒子包圍住嘅羅羅撥一撥開紅色粒子，「點會爆炸㗎？！」
我同綽姿互相扶住對方，行近羅羅：『你...你冇事吖嘛？』
咁近距離爆...點都有啲擔心嘅...
「我冇事～係有啲蝕姐...」羅羅望住目標人物爆炸嘅位置...再望望頭上...
我都跟住抬頭，望上圍住我哋嘅其他行者...逐一離開...
都走晒...走晒...
只係淨返...我哋三個...
「唉...蝕吖蝕吖...」羅羅擰擰頭，「今鋪真係蝕到入肉吖～」
「你仲好講...」綽姿對羅羅冷言冷語，「唔係因為你，目標會爆炸？」
「嘩～你咁講嘢嘅？」羅羅冷眼望住綽姿，「聽講頭先係我救咗你喎～」
「邊個使你救？」綽姿冷眼望住羅羅。
「你囉～人少少咪認咗佢囉～」
「係你多管閒事。」
「唔係我多管閒事，你死咗喇～」
「就係你多管閒事，先打亂我嘅計劃。」
「你有計劃架咩？」
「有都唔會話你知。」
綽姿同羅羅就一人一句咁...
『呃...呃...係呢...』本來我都唔想打擾佢哋...
之但係...
「嗯？」羅羅又帶住微笑望實我...
突然…
「嗯？唔係...唔係而家就...」
覺得有啲攰…
「嗯。佢又進入深層睡...」
好眼瞓…
「吓？咁快？佢由使用精神液一刻開始...到而家都唔夠...半個鐘喎～」
四肢乏力…
「係...佢就係咁弱…」
失去意識…
…
..
.
「我真係得㗎～」月月把聲由電話之中傳過嚟。
但除咗月月把聲...我仲聽到...
「喂呀！唔好陪佢啦！」
仲聽到背景有唔少男男女女嘅大嗌...
「嗰日我哋有Party呀！」
吵吵鬧鬧...
『你唔得閒可以唔使專登陪我㗎喎...』我都無謂要你難做啦...
「呃...得㗎得㗎...我都好耐冇見過你班Friend喇～預埋我啦～」雖然月月係咁講...
「我哋呢邊難得人齊呀！係囉係囉！我哋難得咁齊人！又可以上Jen Jen屋企開Party！」但月月背後班仆街又起晒哄咁！
真係唔撚明班仆街咩心態！邊有顏面叫個Friend唔好陪男朋友過聖誕？！
『真係唔緊要喎...如果你真係唔得閒，我可以叫佢哋唔好買我哋兩個飛。』做男朋友就係要大方...
「得㗎喇得㗎喇～預埋我啦～我哋今晚再講啦～」月月趕住收線咁...
『嗯～咁好啦～今晚再講啦～拜～』
「拜～你咪鬼理佢啦！男朋友陪少陣唔係會死㗎嘛？咁痴身...」臨收線之前都聽到班仆街講難聽過粗口嘅說話！
我望住部電話：『屌你老母真係唔知乜撚人嚟！』
同我一齊挨喺欄杆嘅豪爺拍拍我膊頭：「點吖？係唔係買埋阿月飛㗎？」
『唉...佢話就話OK...但係...都係唔好買住...』我帶點無奈擰擰頭...
「哦？你怕佢又甩你底吖？」豪爺又無奈咁打量住我。
『嗯...都唔止一次啦...因為呢班仆街...』記得嘅都已經有六次...
唔去記嘅呢？真係唔想去數...
「自從你同阿月去咗讀I大之後...好似多咗問題喎～」豪爺點起支煙，遞包煙俾我。
『嗯...自從入咗I大...識咗呢班所謂同學嘅仆街之後...』我都接過豪爺包煙，拎一飛...
「唉～賣藝臨去大馬之前交帶落，要我好好睇住你...」豪爺幫我點點煙，「唔好話我唔提醒你...」
『嗯？』提醒我？想提醒我啲乜吖？
「再係咁樣吖...」豪爺吞口雲，吐啖霧，「你同阿月好快散㗎咋...」
我都扯啖煙：『你詛咒我吖？』
「唔係話詛咒你吖...」豪爺挨喺欄杆，望住馬路上嘅車駛過，「講事實咋...問心吖，你都話啦...唔止一次啦...」
係...啱啱自己先講完唔止一次...
『咁都係因為班仆街姐！』唔係仆街霸住月月...
「班仆街固然仆仆街啦！」豪爺再扯啖煙，「但牛唔飲水點撳得牛頭低？」
『呃...』都係嘅...
「我唔係想分化你哋吖～但阿月係愛你吖，又點會捨得Dom低你吖？女人都係黐身㗎～」豪爺擰擰頭。
『咁阿月不嬲都唔黐身嘅...』同月月一齊咁耐，大家都好自由嘅...
「屌你啦～好好好～就當佢唔黐身喇～都冇理由甩自己男朋友底呀化？！喂上次哈囉喂本來話一齊去海浪公園玩嘅！然後呢？咩佢個Friend突然話想去老蘭飲嘢就唔得閒嚟！咩Friend咁巴撚閉呀？！」豪爺屌晒鬼咁。
『Jen Jen吖嘛...』有邊次唔係因為佢吖...
「Jen乜撚嘢Jen吖？仔定囡嚟㗎？！」豪爺皺晒眉黑晒面咁。
『囡嚟㗎...』真係唔鳩想提起...
「囡？囡又會咁撚重要？重要過自己條仔？！」豪爺越問越躁！
『唉...條囡TB嚟㗎...』我大大啖扯飛煙！
「屌！咁就明撚晒啦！」豪爺擰擰頭，又大大啖扯飛煙！
『明乜撚姐...』我冷眼打量住豪爺。
「條TB擺撚明係想撬你牆腳啦！你咪撚扮唔明啦！」豪爺又冷眼打量返我。
嘩！咁都俾你睇得出我扮？！
「喂！人哋擺明車馬，你唔係咁都唔保衛家園呀化？！」豪爺鄙視我！
『唔擺明車馬啦...人哋係TB...唔通去屌鳩佢咩？佢話係“Friend”喎你都吹佢唔脹啦...』講起就扯火！
最撚憎啲TB扮撚晒係Friend嚟撬你牆腳！
進可攻！退可守！陰撚濕到！
「屌咪屌囉！明眼人一睇就知佢係仆街啦！」豪爺舉晒中指屌晒鬼！
『最弊就係其他人都幫住佢啦！』呢樣又係勁扯火！
「其他人？」豪爺扯飛煙，諗一諗，「你班同學仔吖？」
『係吖...咪就係我班好同學囉...成日推波助瀾...』我都扯飛煙，點點頭，『屌佢哋班人老母我同阿月第一日返學，佢哋班友都睇我唔順眼㗎啦...』
「點解呢？衰樣衰吖？」豪爺又冷眼望住我。
『點鳩知呀？話我襯唔起阿月掛～』成班都係屎忽鬼！
「咁咪即係衰樣衰囉～」豪爺又恥笑我！
『喂係唔係咁講嘢呀？！』兄弟都唔幫吖化？！
「唉～啲仆街係咁㗎啦！唔抵得人哋好，係都要拆散人哋先安樂！咁啱唔啱聽吖？」豪爺搭搭我膊頭！
『唔係啱唔啱聽！呢個係事實！』事實就係有咁多仆街仔鍾意人哋仆街！
「唉～沒有他都會有別人～你我避免不過～」豪爺擰擰頭。
『無啦啦唱咩歌呀？』仲要唱得咁難聽...
「三角誌吖～唔係咩？當年你喺校草手中搶阿月返嚟...而家就俾個TB搶...」豪爺再扯啖煙，擰擰頭。
『或者...或者情況未去到咁壞呢...』或者...或者...
「情況未去到咁壞？哈～」豪爺恥笑一聲，「我就真係唔多睇好喇...」
『或者今次...唔會再甩我底呢...』或者...或者...
「或者？或者啦呵～唉～入去打多鋪機先～第四者跟你有段情...我也為你高興～」豪爺彈一彈走手上支煙頭，行入機舖...
唉...都係唔好諗喇...
就喺我都彈走手上支煙頭，正想行返入機舖之時，手上部電話一震...
我望到...有SMS...係月月Send嚟嘅SMS...
我打開個SMS一睇...內容係寫住...
“Sorry吖...我都係同唔到你哋睇戲...唔使買我飛喇...最多我嗰邊開完Party就立即過嚟Join你哋啦～”
我望住阿月Send俾我嘅SMS...整個空間漸漸變成灰色…分裂…
分裂到手上部電話...阿月Send俾我句SMS...唔使買我飛...粉碎...飄散...
當我再次有意識之時...再次睜開眼之時…
『就算她...跟你有...天...天...花...』陌生嘅...天花板？！
我望住...粉紅色嘅天花板...
「你醒喇？」然後就係有把嬌俏嘅聲音...加上一個身影飛撲埋嚟！攬實仲瞓喺張...生保床上嘅我！
呢個身影...係...
『羅羅？！』的確...睇清楚啲...攬到我實一實嘅...的確係羅羅！
點解？點解會係羅羅？呢度又係邊度？
「終於醒喇？」呢把係...綽姿把冷淡聲，「咁我哋走。」
『喂喂...等等先...』我推一推起羅羅，再坐起身，『呢度係邊度？點解我哋會喺度？』
我坐起身再睇清楚呢間...房...
全間房唔係好大...但好整齊...好女仔...
全間房唔係粉紅色...就係以粉色為主嘅色調...
「呢度係我喺旺角區嘅藏身之地～」羅羅仲係攬到我實一實，「你進入深層睡眠之後，我同梁綽姿就帶咗你返嚟。」
係...係我進入深層睡眠...
綽姿立即插嘴：「搞清楚，係佢死都要帶你返嚟。我冇諗過要嚟。」
係...係羅羅要帶我返嚟...
「哎吖～」羅羅攬實我，皺住眉咁望住綽姿，「都話咗唔使收你Sil咯～你咪安心喺度一齊進入深層睡眠囉～」
唔收Sil...一齊進入深層睡眠...
綽姿冷眼望住羅羅：「我唔覺得你會有咁好人囉。」
羅羅谷起塊面豬登：「難得我好人又唔得吖？」
「又唔知有乜詭計...」
「我似會有乜詭計吖？」
「我點知你...」
「好心著雷劈～」
『等等先...等等先...』我雙手捉住羅羅膊頭，眼定定望實羅羅，『你...你都係...行者？』