《香港傭兵》: [Day 13－愛港愛國] PART 07
我推門入茶記...
數一數...三檯合共...十六個人...
真係啱啱好...包起一架紅Van...
「冇位喇！想食嘢就等等啦！」侍應邊拎住幾碟飯邊同我講。
『哦...好好...』我留意住班金毛仔...
「企埋一邊啦...咪撚阻鳩住啦！」侍應同我擦身而過。
『Sor...Sor...』我就行近班金毛仔身邊...聽聽...
「大佬...真係要入去吖？」其中一個金毛仔問問佢身邊...肥屍？！
我認得佢！上次喺旺角遇到嗰個...
估唔到...
「唔係點吖？你阿公叫到，唔撚做吖？」肥屍一鳩拍落條金毛仔個頭度。
係佢哋喇...
「但裡面好危險㗎喎...」金毛仔摸住個頭繼續細細聲講。
肥屍睥撚住條金毛仔：「我夠同你阿公講過幾次啦...之後點吖？」
「點吖？」金毛仔仲戇鳩鳩咁...
「咪又一鳩拍落我個頭度囉！」肥屍再一鳩拍落個金毛仔個頭度！
金毛仔又摸住自己個頭...
肥屍又攬攬條金毛仔：「你大佬我早幾日帶咗琛仔佢哋幾個入去打過招呼㗎喇...琛仔佢哋而家喺入面都搞緊㗎喇...我哋而家入去...係揚名立萬嘅機會呀！」
「係唔係真㗎...」金毛仔半信半疑...
「望就望佢哋唔會反口啦...喂！啲嘢食咁耐都未嚟㗎？！俾啲嘢飲嚟濕吓口先都得掛？！」肥屍望住個侍應大大聲講！
「等等啦！好忙呀！」侍應仲係唔多得閒理鳩肥屍！
我就望望水吧...正正就有十幾杯嘢飲放喺檯面...
睇嚟...呢十幾杯嘢飲...係肥屍佢哋㗎喎？
咁就真係天助我也...
我就偷偷行埋去水吧嗰邊...又偷偷倒少少坑渠水落其中一杯凍奶茶...
真係少少好喇...少少應該飲唔死人嘅...
倒咗少少坑渠水落杯凍奶茶...再用支飲管攪兩攪...
就咁睇冇乜異樣...應該OK嘅...
「喂！」侍應把聲突然喺我背後出現！「有位喇嗰邊！咪阻住啦！」
『哦哦...Sor...Sor...』嚇撚死！以為俾人發現我做衰嘢！
我就行過去同三個軍裝阿Sir坐...侍應就放啲嘢飲上盤，行去將嗰十幾杯嘢飲放喺嗰三張坐滿金毛仔嘅餐檯上。
我就眼定定咁望實嗰杯...俾我加咗料嘅凍奶茶...望住個侍應將佢放喺肥屍嗰張檯...
Yes！掂晒！
杯嘢果然係俾佢哋！仲要係坐喺肥屍隔離嗰條金毛仔拎起...攪兩攪...啜兩啖！
掂吖！真係掂晒！
條金毛仔睇起上嚟仲冇乜點咁...察覺唔到杯凍奶茶加咗料...
咁就只可以話係你唔好彩喇～
「喂食咩呀快快手手落埋單啦！」侍應行到埋我身邊。
『呃...芝腿治...』其實我都仲未肚餓...
「嘩入嚟淨係食咁少嘢唉是旦...」侍應邊落單邊行咗去。
啱啱幫人哋加完料咋...唔係嘅話我想淨飲添呀！
我都係唔理個侍應咁多，繼續留意住班金毛仔...
個個都唔係飲自己杯嘢，就係睇自己部電話...
等到嘢食到就自己食自己...
其實佢哋入去黃金海岸做乜呢？
尋日同綽姿睇過黃金海岸裡面...真係唔好話要插旗...插針都插唔入...
帶咁大班人入去...真係有得分？
「芝腿治...」侍應放低碟芝腿治。
望一望...個樣就唔算靚仔㗎喇...希望冇加到料啦...（做完虧心事個心係虧啲㗎喇...）
我就邊食個芝腿治，邊留意住班金毛仔...
之但係留意咗成餐...都留意唔到啲乜...
而飲咗杯加咗料嘅凍奶茶嗰條金毛仔仲係冇乜異樣...
喂...係佢平時食開污糟嘢，身體有抗體？定抑或啲坑渠水落得太少冇料到呀？！
直到成班金毛仔食完嘢...
直到成班金毛仔起身俾錢走...
「咁大班古惑仔都唔知想去邊...」同檯其中一個警察望住班行緊出門口嘅金毛仔口噏噏。
「理得佢哋去邊？」另一個警察又飲住杯熱奶茶，「總之唔好喺呢頭搞事就得啦～」
嗰條金毛仔都係冇異樣...
屌！我真係唔應該咁仁慈...應該有幾多就倒幾多！
而家都係唔好諗咁多！跟住佢哋先！
我都快快手手喺銀包拎張一百蚊放喺櫃檯：『唔使找！』就衝出門口！
「梗係唔使找啦！食得碟芝腿治咁大把！阻住晒啲位做生意...」
我追到出嚟，就見成班金毛仔向住馬路方向行。
成班黑衫黑褲金毛仔霸晒成條路嚟行...呢種排場...十足十拍緊古惑仔電影...
哪個叫做正義，哪個戰無不勝～對錯正邪卻難定～～～
我再偷偷跟住佢哋後面...偷偷留意住飲咗加料凍奶茶嘅金毛仔...
真係冇乜異樣...仲係大搖大擺大支嘢咁跟住肥屍身邊行！
唔係咁堅揪呀化？！
當我跟住班金毛仔行到出馬路...行過警察路障...
班警察睥咗班金毛仔幾眼...又無視佢哋...
而當班金毛仔行到去差唔到林雪面前...
林雪扯飛煙一啖，再彈走支煙頭：「食撚完屎喇？吖？要我等你哋咁閪耐？」
肥屍行到去林雪面前：「收咗我哋錢㗎喎...等吓都唔得吖？」
林雪打量住肥屍：「你老味收得你個萬𡃁嘢好鳩多咩？我走多幾轉都唔止啦！咁閪多嘢講...上車啦...」
肥屍好冇癮咁叫班𡃁：「上車...」
就喺呢個時候...
「唔得...大佬...」肥屍身邊條金毛仔面都青埋！「個肚...好痛...好撚肚痛...」
掂吖掂吖掂吖...嚟料喇嚟料喇...啲坑渠水有料到喇！
望住條金毛仔面都青埋咁撳住個肚...
肥屍一鳩拍落金毛仔個頭：「你咪撚呢個時候借屎遁呀！」
「唔係吖唔係吖大佬...」金毛仔塊面越嚟越青，「真係好痛...都唔知係唔係頭先啲嘢唔乾淨...」
肥屍皺晒眉咁：「你幾時有食過乾淨嘢㗎？！大家都一齊食，又唔見我有事？」
你梗係冇事啦，都冇飲過杯坑渠水凍奶茶～
「唔得喇唔得喇...」金毛仔撳住個屎忽，「我要爆爆石先！一陣我自己入嚟搵你哋啦！」
「你係會入嚟先好呀！」肥屍篤撚住金毛仔個頭！
「得得得！你哋入去先！」金毛仔就撳住個屎忽轉頭跑！
望住條金毛仔走返過警察路障...
林雪就擔住飛煙行去肥屍身邊：「喂...我唔鳩理你幾多人上車...俾咗錢冇得退...仲有佢下轉要自己俾返車錢㗎...」
「得啦得啦...」肥屍冇咁好氣，「佢自己有錢㗎喇！一陣問佢拎啦！」
林雪指指肥屍：「你講㗎...轉頭佢冇我唔閪俾佢上車㗎...」
「得啦得啦...我哋而家入咗去先啦...」肥屍就準備拉大隊上紅Van。
就喺一行十五人準備上紅Van之時...
『請問...』我係時候開聲喇，『有冇位車埋我呢？』
林雪同肥屍都同一時間望住我...
然後林雪就搭住肥屍條頸：「反正有位...俾條撚樣上埋囉...」
「我包咗車㗎喎...」肥屍又好似唔係好想...
「屌你老味我都等閪咗你咁柒耐啦...」林雪又扯一扯飛煙，「當俾我幫補吓都得掛？」
幫補？
「唉...是撚旦你啦...」肥屍冇林雪咁好氣，拉大隊上車。
林雪就扯住飛煙向我招招手：「有冇錢呀？有錢就俾錢上車啦！」
『有有有...』我就喺銀包拎五百出嚟，交到林雪手，『五百夠嘛？』
「唉...得啦得啦...上車啦望...」林雪拎住我手上張五百蚊紙，袋落衫袋，就扯埋最後一啖，彈走飛煙上車。
屌你老味咁都要收鳩我五舊你真係識搵錢...
上到車坐最後...同一大班金毛仔坐埋同一架紅Van...
個個都打開隻窗，拎飛煙出嚟點。
喺公共交通公具上食煙...真係唔多習慣...
“依...吼！”林雪撻著車之後，又拎飛煙出嚟點...
個個都食...搞到我又想食返飛...
就喺呢個時候...
林雪一個反手，將包煙拋去我度！
我雙手接住！
林雪就望住倒後鏡中嘅我：「整返飛啦...」
『哦...多謝喎...』我就喺包煙裡面拎飛煙同火機...一點...一扯...再放返個火機入包煙裡面...拋返俾林雪...
林雪Dom包煙喺車頭：「好...起飛...」
“吼！吼～”
邊扯邊望風景又噴煙出窗外...
車上個個都係咁...
係因為...太緊張？
的確...我留意到車上嘅金毛仔都好似好緊張咁...
就連肥屍都係...只係冇講出口...
食煙可使人冷靜...使人頭腦清晰...其實唔係藉口...
之但係...其實佢哋要入去做啲乜？
又同乜人傾掂數？
以我估計...應該都係西貢獻命...
“依...吼...吼...”好快又嚟到小欖...西貢獻命嘅路障...
要傾嘅話，最好就梗係搵話事人嚟傾...即係西貢獻命啦。
之但係傾咗啲乜呢？之間又有乜利害關係？
咁就真係唔知...
只可以話，一定又唔會係好嘢囉...
“吼！吼～”駛過西貢獻命嘅路障後，紅Van又全速前進！
唔使好耐，又駛到嚟黃金海岸。
“依！依！啪”一駛到嚟黃金海岸入口，林雪就邊急煞邊打開車門！
「呢度自己入去啦...」林雪指一指黃金海岸入口，「唔撚送喇...」
一個個金毛仔就跟住肥屍落車。
我都跟住班金毛仔落車。
“啪！吼！依！吼～”我隻腳一踏落地，林雪就趕住閂門開車走！
班金毛仔就同肥屍企喺黃金海岸入口，左望望...右望望...好似仲未想入去咁。
「等埋條仆街仔先入去好...定係行咗入去先好呢...都係食多飛煙先啦！」肥屍就同班金毛仔又拎飛煙出嚟點。
我就唔理得佢哋咁多，行入黃金海岸先！
免得俾人誤會我跟蹤佢哋啦～
我一邊行入黃金海岸，一邊拎返部電話出嚟睇。
我想再睇多次...目標人物個樣...
當我打開SPIRIT App...現有委託...我留意到成員裡面多咗個人！
呢個人叫做...海賊？
海咩賊吖？海賊王吖？路飛吖？
咁佢又係做啲乜㗎？
當然又係睇唔到佢負責啲乜...
唔緊要啦～反正我而家要做嘅就係搵目標人物～其他嘢都唔關我事～
我就開返目標人物張相出嚟睇清楚啲...
一邊行入黃金海岸，一邊望實目標人物張相...
真係幾靚女...睇起上嚟都係十八九歲...
又靚女...又青春...究竟衰乜要俾人捉？
仲要係委託我哋SPIRIT去捉...
唉...我嘅憐憫之心又出晒嚟...
當我望住張相，行到差唔多到市集...
『應該由...邊度搵起呢？』呢度話大唔大...但人頭湧湧...
真係無從入手喎...
就喺我拎住部電話，極度迷惘咁企喺市集前...睇住People Come People Go People Mountain People Sea...
「喂～飛揚～」我背後有把男仔聲出現...
呢把男仔聲...貼正喺我背脊嘅男仔聲係...
我回頭一望！企正喺我背後嘅...正正就係...
『梓...梓翹？』