《香港傭兵》: [Day 11－不入虎穴] PART 06
『我有冇打算返去...』其實呢個問題...『有...一直都有...』
其實唔使諗啦...
仲要越快越好添！
「點解吖？留喺度唔好咩？」羅羅皺晒眉咁問。
『我...我始終都唔屬於呢度...』呢度太危險...
喺呢個適者生存嘅世界，我真係唔能夠適應...
「過去...」羅羅諗一諗，「係唔係仲有人等緊你返去？」
『唔...嗯...』我點一點頭。
除咗話呢度太危險，我生存唔到之外...最重要都係阿月...
我嘅生存原動力...我嘅最愛...
「嗯...」羅羅好似有啲失落，「咁...咁你諗住點返去？」
『我諗住吖...』呢層...『其實我都唔知...』
而家都仲係毫無頭緒...只係...
『只係知道...有種物質...可以穿越時空...』到而家...都仲係淨係知得咁少...原地踏步咁...
「有種物質...可以穿越時空？！」羅羅碌大對大眼睛，好奇咁望實我！
『嗯...話說我哋SPIRIT有個情報庫...裡面有講過關於原核可以穿越時空...』個情報庫仲要好撚呃錢添...
「原核...情報庫？！」羅羅顯得再驚訝啲！
『嗯...我哋SPIRIT係有個情報庫...俾我哋買賣情報嘅...有啲似討論區咁囉...不過全部都要俾錢先睇到...』仲要逐頁計！又唔可以Cap圖！出咗去想入返嚟又要再俾多次錢！
你話幾咁呃錢呢！
「咁...」羅羅又諗左一諗，「咁你可以喺情報庫搵...返翻去嘅方法囉～」
『唔係咁易㗎...啲情報好貴㗎...我真係冇咁多錢買...而且...照我估計...情報嘅內容都唔會講得出點樣可以返翻去...』唔好話我話，一定又係睇到最重要嗰Part又TO BE CONTINUED！
「都係嘅...」羅羅諗吓諗吓點點頭...
『你都話係呢...』你睇羅羅呢個天真無邪小妹妹都話係～仲會有錯咩？
「咁跟住落嚟...你打算點做？」羅羅又好好奇咁打量住我。
『我吖...自己查囉...只要一日唔死...話唔定終有一日會查到嘅～』
「哈哈～邊有咁易死吖？」
『嘩...你真係有所不知...要死真係好容易...』
「點解咁講吖？」
『我吖...嚟咗未來一個星期多啲咋...差唔多日日都出入鬼門關吖！』
「吓？有冇咁危險吖？」
『我哋執行啲委託好危險㗎！呢一秒仲生勾勾，下一秒就灰飛煙滅！』
「嘩嘩嘩！好似好刺激喎！」
『會死人㗎！刺激...』
「係咩係咩？講嚟聽聽～」
『唉...我哋呢...係倚賴委託為生嘅...』
「嗯嗯～」
『每個委託都有報酬嘅...』
「咁咪好似打機咁囉？」
『差唔多啦...』
「跟住呢跟住呢？」
『其實一般嘅委託都唔係咪咩問題...最怕係會遇到...逆行者...』
「逆行者...」
『嗯...我哋最大嘅敵人...』
同羅羅坐喺爛磚瓦上傾返我呢個星期所見所聞...
講講屯門、元朗及天水圍...
講講西貢獻命同天門...
羅羅都好有興趣，對我哋SPIRIT。
更有興趣嘅係...逆行者。
「嘩...咁講法...逆行者真係好危險...」羅羅皺晒眉咁望實我。
『唔係唔係...應該話做SPIRIT嘅行者好危險...』我總係覺得如果我只係一個平民...會平平安安長命百二歲...
只要唔生活喺屯門...唔生於香港...
「其實都唔係姐...」羅羅眼仔碌碌，咬咬手指咁諗諗，「只要打敗逆行者嘅話...」
『唔係咁易㗎...都話咗佢哋有比我哋更強大嘅綠光能量...』仲係唔知點得嚟...
「打唔贏...咪逃走囉～」羅羅彈一彈起身，就喺爛地上跑跑跳跳～
『喂！喂...等埋我吖！』我都立即彈起身，跟住羅羅身後跑！
一路跑！喺爛地上跑上爛梯級！
又彈彈跳跳左閃右避，避開爛磚碎瓦大石頭！
一路跑到入...一座古色嘅建築物！
『嘩！危險吖！唔好亂走啦！唔知會唔會倒塌㗎！』我一直跟喺羅羅身後跑！
其實話除咗怕座危樓會唔會倒塌之外，我更怕會遇到唔知咩人！
你話遇到奇怪嘅乞兒或者露宿者都唔係咩問題...遇到西貢獻命班人就真係仆得街！
一邊跟住羅羅跑，一邊都提高警覺，留意四周。
好彩嘅係喺殘舊破爛嘅古色建築物入面跑咗咁耐，都仲未察覺到有生命跡象...
其實應該話，當踏入青松觀之後，除咗我同羅羅之外，再見唔到有其他人影...
最多都係得...
“喵！”喺度寄居嘅野貓。
「吖～好得意吖～」羅羅嘗試行近堆野貓～
但堆野貓一見羅羅行近，就立即四散！
睇嚟...啲野貓好少見人...
唔通而家呢度...真係冇人嚟？
一個滿天神佛嘅地方，淪陷之後就冇人再嚟呢度求神佛打救。
「唔使驚唔使驚～」羅羅企定定，望實淨返落嚟嘅一隻黃色小貓。
“喵...喵...”但隻黃色小貓都好似好驚驚～正準備要拔足狂奔～
「唉～算啦算啦～我都係唔打搞你喇～」羅羅好冇癮咁退後兩步...
“喵...喵...”隻黃色小貓就一路望實羅羅，一路驚驚青青咁行開～
「唉～貓貓都唔鍾意我～」羅羅扁晒嘴咁～
『哈哈～係咁㗎喇～少見人嘅野貓係怕人啲嘅～』我都行埋羅羅身邊，安慰一下佢。
「哈哈～你都幾識安慰人㗎喎～」羅羅古古惑惑咁打量住我～
『真心話嚟喇～』我望住羅羅。
「嘩～真心話～」羅羅Keep住古古惑惑打量住我～
『係吖係吖...哈哈...』俾羅羅以呢種古惑眼神打量住，總係有啲尷尬...
我都係避開羅羅嘅古惑眼神...望望四周...
我望望四周...望清楚啲先發現...原來有唔少一格格...一格格...
係...龕位？！
一格格...一格格...
原來我哋走咗入嚟龕堂都唔知...
望清楚一格格龕位，差唔多全部都係爛晒...
仲有唔少連骨灰龕都爛埋...成格都係骨灰...
點會咁㗎呢？
似係...人為...
咩人咁冇品，走嚟打爛晒人哋啲骨灰龕位呀？！
唔通係...盜墓者？
呢啲骨灰龕位可以有乜好盜呀？
我而家先發現，為咗少少不義之財，去破壞先人安寧嘅盜墓者原來係咁仆街！
「係呢...其實屯門係一個咩地方？」羅羅雙手擺後，探頭望望啲骨灰龕。
『屯門吖...』應該點講好呢...『其實係...英國殖民地時期，規劃發展嘅衛星城市...』
咁講羅羅會唔會明呢？
「嗯？英國殖民地時期嘅衛星城市？」羅羅充滿好奇咁望實我。
我都估到羅羅唔多清楚㗎喇～
羅羅咁細個，唔好話屯門係咩地方，就算係香港...隨時連被英國統治過都唔知啦～
就算知吖，都只係喺百度睇到香港做過英國隻狗～回歸祖國後得到自由～背靠祖國之下，得以繁榮安定衝出宇宙～
人哋話歷史是由勝利者書寫的，我就話歷史都被獨裁者刪改了～
『嗯...大致上就係...一個邊緣地區...有工業...有農地...有生產力...有消費力...可以自給自足自成一國嘅城市...不過...好早之前就已經失敗咗喇...』簡單啲講會唔會容易啲明？
「哦？失敗咗？」羅羅仲好似唔多明。
『嗯...因為始終市區都搵得比較多...啲人都係衝晒出去做嘢...』仲有好多原因嘅...
好似話階級觀念啦...
覺得喺邊緣城市生活低人一等啦...個個都想衝返出大都市生活，感覺上等啲啦～
因為自己被睇低而感到羞恥...因為自己高人一等而不可一世...其實真係好戇鳩㗎喎。
香港咁細都仲要分階級？分到個個成為獨立個體好唔好？
都唔肯團結，真係唔怪之得搞到今時今日嘅局面。
「都唔係吖～至少而家都真係自成一國～同元朗天水圍一齊被劃分為特殊區～就好似...烏托邦一樣～或者英國本來就打算等呢一日～」羅羅諗一諗，又點點頭。
『烏托邦...冇可能成功㗎～烏托邦既理念係好～但人係貪婪同充滿敵對！最終都係會失敗...好似而家西貢獻命同天門咁。』之前宋伯伯已經問過...
雖然我仲係唔係太清楚現況...
之但係...種種跡象顯示...反抗嘅力量太少...而且唔夠團結...要被攻陷擊破，只係時間問題。
「我就覺得鬥爭係必然，但而家未係最終～勝利嘅又未必係屬於邪惡...但正義又唔一定會勝利～呢個世界冇客觀嘅正義，就只有主觀嘅邪惡。」羅羅帶住微笑打量住我。
『嘩...咁高深吖...』聽完之後，雖然唔明...但好似好厲害！
呢種感覺...有啲似阿月...
喺羅羅身上...有阿月嘅...感覺？！
嘩嘩嘩！唔得唔得！
係幻覺嚟㗎姐！你嚇我唔到嘅！
唔好諗唔好諗！俾阿月知道我喺其他女仔身上感覺到佢嘅感覺...實死無全屍！
唔止咁...仲要係一個十四歲嘅小妹妹！
灰飛煙滅都唔掂...
「飛揚哥哥？做咩面都青埋咁嘅？」羅羅靠近我面前，貼塊面埋嚟望清楚我～
『冇冇...我冇青...我冇青...』我都係退後兩步...同羅羅保持一個身位嘅距離！
真係唔好貼咁埋...
太埋仲會聞到羅羅身上嘅少女幽香...
其實...喺頭先被羅羅翹住嚟行...我已經聞到...
只係我逃避！唔去面對！
『係呢係呢...你肚唔肚餓吖？』都係唔好單獨同羅羅喺呢啲地方太耐...
莫講話會唔會突然殺出幾個西貢獻命嘅人...我開始覺得自己成為羅羅嘅最大威脅！
「嗯嗯...都有少少餓喇...」羅羅咬住唇，摸摸自己個肚仔。
『咁...咁不如我帶你去食嘢先好唔好？』你再係咁可愛咁摸住自己個肚仔...我怕自己會忍唔住食咗你吖...
「嗯～好吖好吖～」羅羅一個突襲就翹實咗我隻手臂！
嗚呀！我成個心都軟埋喇...
被羅羅翹實隻手行返出青松觀，街上都仲係冇乜人。
雖然話頭先喺青松觀冇遇到奇怪嘅人，冇遇到西貢獻命，總算好彩。
之但係出到嚟又要提高警覺，留意四周...
帶住羅羅喺身邊真係每分每秒都提心吊膽...
「係呢係呢～你想帶我去食乜嘢呢～」羅羅仲係一面天真無邪，一啲戒心都冇嘅可愛甜美笑容望實我～
『去到你就知～』我古古惑惑咁打量住羅羅～
「好吖好吖～有神秘感吖～」羅羅仲要甜絲絲咁笑住望實我～
嗱～你話死唔死？你話死唔死？
我頭先嘅口吻...完全係金魚叔叔帶小妹妹去睇金魚啦～
佢都仲要覺得係有神秘感嘅～
真係拐咗去都唔知咩事～
就喺我分一分心...去咗諗拐走羅羅之時...
轉角突然出現兩個身影！
兩個都係高高大大...大大隻隻...
仲要係...光頭嘅！
兩個光頭嘅大隻佬...係...係西貢獻命！