《香港傭兵》: [Day 11－不入虎穴] PART 05
“咔...咔...咯咯...”輕鐵繼續以慢速行駛...
「嘩～馬路上都冇車㗎～」羅羅都仲係開心大發現咁嘅樣～
『嗯嗯...真係冇乜車...』我都一邊提高警覺...仲有嘅係...
除咗話要提高警覺，保護身邊嘅羅羅，其實我仲好擔心綽姿...
都差唔多過咗成個幾鐘...唔知西貢獻命班仆街會對綽姿點添㗎...
就算而家冇對綽姿點，仲有咁多個鐘先到委託時間，大把機會俾西貢獻命班仆街為所欲為...
「嘩～嗰座大廈啲窗都爛晒㗎～冇人修理㗎咩？」羅羅好好奇咁指住座大廈～
『嗯嗯...好多大廈都係咁...冇人修理...』繼續提高警覺...保護羅羅...
而家絕對唔可以俾羅羅有事！
羅羅一路都係帶住天真嘅笑容，對四周嘅事物都充滿好奇心。
我就一路擔心住綽姿，提高警覺。
好好彩，遊咗成大半個鐘輕鐵河，都冇乜異樣。
一路上都見唔到西貢獻命嘅蹤影。
然後...
「嘩～我想去嗰度睇睇吖～」羅羅帶住天真嘅笑容向外一指～
『嗯？邊度邊度？』我跟住羅羅手指仔指住嘅方向一望...
喺遠遠嘅遠處...隱約好似見到...
「嗰度嗰度～好有古色風味嘅建築物～」羅羅繼續指～
『嗯嗯...』好似真係有...但而家已經見唔到...
「我哋過去咯～」羅羅捉實我手臂，雙眼閃閃發光咁望實我～
『唔...之但係...好似有啲遠喎...』距離下個站...行過去嘅話...好似唔係咁安全...
「好啦好啦...我想過去睇睇吖...好啦好啦...」羅羅捉實我手臂，Fing吓Fing吓...嗲吓嗲吓...
『呃...好啦好啦...』你嗲成咁...我又點會話唔好吖...
「好嘢～飛揚哥哥真係大好人～」羅羅仲要好天真無邪咁喺我面前彈彈跳跳～
我承認我係一個好易心軟嘅人...
尤其係對住啲得意又可愛仲要嗲到爆嘅小妹妹...
“叮叮”等到輕鐵埋站停定後...
「出發出發～」羅羅就翹實我手臂，彈住咁行～
雖然話件褸有啲厚，之但係咁彈法...總係會感覺到啲...唔應該感覺到嘅彈性...
仲發育緊嘅...軟熟...彈性...
『係...係呢...你...你今年幾歲吖？』我尷尷尬尬咁問問...
「我？我十四歲囉～」羅羅甜絲絲咁對住我笑～
『哦...十四歲...』非法年齡呀！！！
其實我睇得出羅羅唔過十六...係估唔到仲要細過綽姿！
十四歲嘅小妹妹...唔得唔得...要保持返啲距離先得...
但正當我要拉開少少距離...羅羅又翹得我實啲！好似有心拉返我埋去咁！
我又感覺到喇！我隻手臂又感覺到啲唔應該感覺到嘅軟熟彈性喇！！！
「咁飛揚哥哥你幾多歲吖？」羅羅又充滿好奇咁望實我～
『我...我廿一喇...』我尷尷尬尬咁望羅羅一眼...又避開佢嘅視線...
嘩唔得唔得！望望都觸電！塊面仲有啲熱熱地！
「原來飛揚哥哥廿一歲～係最吸引女仔嘅年齡～」羅羅又含情脈脈咁望實我～
『吓？係㗎咩？』呢層我又真係唔覺喎...
「嗯嗯～梗係啦～帶點成熟又唔太老餅～係最吸引女仔㗎～」羅羅塊面仲要紅紅地咁～
『吓？呃...我...唔成熟㗎...』仲好幼稚添...
肥豬腦細成日都話我做事唔夠成熟㗎啦～
啲啲壓力都承受唔到啦...
OT幾晚就殘到核爆啦...
俾客屌兩句就死晒狗咁啦...
屌你老母你自己做啦！
不過最大問題都係過咗廿歲仲玩課金手機Game真係好幼稚...
每日都定時定候開Game消體力...牽住鼻子走...都算！
打關儲石...都算！
仲要走去課幾千蚊抽垃圾？！
咁大個人一啲定力都冇...真係諗諗都覺得自己幼稚...
「唔係吖～最起碼...而家有你喺我身邊...好有安全感～」羅羅咬住下唇，塊面紅卜卜，雙眼發晒光咁望實我。
『安...安全感...』就更加談不上...
好似我呢啲廢柴...唔好話喺呢個動盪不安嘅年代，就算係太平盛世，我咪又係一隻淆底獸！
俾客屌唔敢還口...都算！
有時同阿月出街，啲MK仔用啲猥瑣嘅眼神視姦阿月，我都視而不見...拖住阿月行快幾步走佬...
點解唔反睥？
唔係吖...冇必要成日得罪人啦...
我知㗎！我知你實話我正廢柴㗎！
咁可以點姐...
返轉頭打鳩佢哋一身呀？
唔係吖...冇必要成日得罪人啦...
之不過呢...
『無論點都好...我都會好好咁保護你。』我捉實羅羅隻...冰冷嘅小手。
「嗯～」羅羅帶住甜絲絲嘅微笑點點頭。
點都好...而家嘅我...一定要保護到身邊嘅人！
同羅羅繼續行，呢邊都係...冇乜人。
仲要比起富泰嗰邊更加荒涼。
其實呢邊一直都只係得醫院比較熱鬧。
而當我哋再橫過幾個路口，橫過兩條馬路...
我好似又見到有...有啲古色嘅建築物...
「就到喇就到喇～頭先見到嗰啲古色建築～」羅羅又成個天真無邪嘅小妹妹咁～
『嗯...嗯...』我哋再行前多幾步...再行近多幾步...
可以再清楚啲...
破損嘅...已經褪色嘅...古色建築物...
呢度好似...係...
『青松觀？！』
圍住破損褪色仲有唔少已經倒塌嘅外牆行...
呢度...呢度真係...
再行多幾步...行多兩步...
『真係青松觀...』我望住已經倒塌咗一大半嘅“青松觀”入口...
原來羅羅所指嘅...古色建築...就係...
「嘩～真係未見過吖～好古色吖～你睇你睇～呢啲係唔係瓦片吖？」羅羅隨手執起散喺地上嘅瓦片。
『嗯...係瓦片...』真係估唔到...
「真係估唔到，原來香港仲有咁古色嘅建築物～」羅羅放低手上塊瓦片後，拍拍手，又八八卦卦望兩望。
『嗯...我諗香港...應該淨係得呢區先有...』被遺忘嘅區域...
「我哋入去睇吓咯～」羅羅一邊講，一邊彈彈跳跳咁走入青松觀！
『吓？喂...喂！小心呀！』就咁就走入去？會唔會有危險㗎？！
好快咁追返上前！跟喺羅羅身邊！
提高警覺！留意四周！
四周除咗有唔少破損嘅建築物外，仲有好多枯樹...
冇人打掃嘅關係，地上仲要鋪滿枯葉...
“咔...咔...”一步一步踩上枯葉...
『小心！』我拉一拉停羅羅！
原來塊地都有唔少裂縫！羅羅差啲就踩咗落去！
「嘩嘩～好彩有你咋～」羅羅立即攬實我！
『嗯嗯...小心啲...睇清楚先好行吖...』除咗留意四周...仲要留意地面...
「嗯嗯～」羅羅點點頭後，小心翼翼行唔夠兩步，又大安旨意咁彈彈跳跳。
我就一路睇住條路，一路旁住羅羅身邊行。
沿住鋪滿枯葉嘅爛石路再行得入啲...四周都有唔少破爛嘅建築物。
有唔少外牆倒塌...又有唔少屋頂倒塌...
總之就係被頹垣敗瓦所包圍...
「呢度...好多地方都爛晒呢～」羅羅左八八，右卦卦。
『嗯...的確...估唔到連佛門清靜地都無法避免...』仲有邊度可以避難...
「呢度係道觀嚟㗎～」羅羅谷起塊面豬登，指住個冇咗個頭嘅銅像，「你睇你睇～孔子像吖～」
雖然冇咗個頭...但好似係...莊子像...
『都係滿天神佛嘅地方啦～』呢點應該冇錯喇掛？
「唔...」羅羅眼仔碌碌咁諗咗諗，「人總係喺無助絕望之時求神拜佛打救～」
『呃...都係㗎...唔係可以點？』都去到無助絕望嘅境地，仲可以點？
「自救～」羅羅帶住天真嘅笑容舉晒手～
『自救？哈哈～自救到就唔使求神拜佛啦～』雖然有啲悲觀...但事實...
「求神拜佛都係自欺欺人姐～試問你幾時有被打救過？」羅羅坐喺爛磚瓦上～踢吓踢吓對腳仔～
『呢層...』又好似...
「我就有試過被打救喇～」羅羅帶住微笑諗一諗，「係你哋SPIRIT嘅人～」
係被我哋...SPIRIT嘅人...打救過？
係喎！羅羅講過佢曾經被SPIRIT嘅人救過！
『係呢！你係點解會被SPIRIT嘅人救過嘅？』呢層我又好奇喇！
SPIRIT嘅人會救人？真係聞所未聞！
「我吖？」羅羅咬住唇咁諗咗諗，「都好細個嘅事Luu～」
好細個？幾細個？而家嘅你我都覺得好細個喎...
「嗰陣時貪玩周街走～點知遇到壞人想捉走我～好彩有個著住長袍嘅人救咗我～佢仲話自己係...SPIRIT嘅人～佢走咗之後，就一直都冇再出現～我有試過搵有關SPIRIT嘅事～但一直都搵唔到...諗住再冇機會知SPIRIT嘅事...點知就俾我遇到你喇～」羅羅又雙眼發晒光咁望實我！
『原來係咁...』所以話羅羅真係唔知死...
細細個貪玩周街走差啲俾壞人捉走...
而家又貪玩走入嚟特殊區遊覽！
唔係次次都咁好彩㗎小妹妹...
「係呢係呢～其實你哋SPIRIT係做啲乜㗎？點先可以做到SPIRIT㗎？」羅羅又好有興趣咁踢晒對腳仔～
『呃...呢層吖...』我坐到羅羅身邊，『其實我都唔係好清楚咋...』
「吓...你都唔清楚...」羅羅扁扁地嘴...拉住我隻手...
『呃...因為我都係...唔知頭唔知路...誤打誤撞咁成為SPIRIT嘅人...』要我講都唔知點講好...
「誤打誤撞？」羅羅又好似好好奇咁等聽故仔。
『我吖...唔係呢個年代嘅人...我...係廿年前嘅人...唔知點解會走咗過嚟呢個年代...又無啦啦有人話我係SPIRIT嘅人...然後就係咁囉...』我又1999喇...
不過冇計啦...我到而家都真係唔知發生咩事...
「你係話你...穿越時空？」羅羅帶住好奇心打量住我。
『嗯嗯...可以咁講啦...』嘩...我都講到1999咁...羅羅都信到十足十...你話佢幾咁單純呢～
「咁你係...點穿越時空㗎？」羅羅又好有興趣咁繼續追問。
『呢層...其實我都唔係好清楚咋...』我用力咁諗諗，『我隱約記得我係坐緊巴士...返入屯門...然後駛入隔音隧道之時，好似有個黑色嘅...黑點...越嚟越大...變成黑球...然後...扭曲...扭...曲...』
羅羅聽到好似入晒神...著晒迷咁...雙眼都放空...
『喂...喂...羅羅？』我喺羅羅面前揮揮手。
「係係！呃...我諗緊咩係隔音隧道咋嘛～嘻嘻...」羅羅尷尷尬尬咁笑一笑。
『隔音隧道吖？用鐵框同玻璃做嘅隧道～而家冇呢啲嘢㗎喇咩？』講開又講，出過市區幾次，我都冇乜留意。
「哦～嗰啲隧道～有吖有吖～一時之間諗唔起姐～」羅羅又尷尷尬尬點點頭，「咁...咁你有冇打算...返翻去？」
問我有冇打算返翻去？唔係扮㗎喎～真係信到十足十㗎喎！
你話吖你話吖～羅羅係唔係夠晒單純吖～