《香港傭兵》: [Day 11－不入虎穴] PART 03

屌你唔係真係咁撚橋呀化？！

我立即左手拎起部電話一睇！

畫面裡就有個紅色底嘅訊息框，裡面仲寫住“緊急”兩隻大字！

個訊息框一閃一閃...一閃一閃...

唔係吖化...可唔可以唔係呀？！



我立即撳開個訊息一睇...畫面立即開咗個地圖出嚟！

地圖之中...仲有一粒紅色點閃吓閃吓...

睇清楚...呢粒紅色點...好近...好近屋企！

唔通真係...綽姿咁快就被人捉咗？！

死喇死喇...咁而家應該點做？而家應該...



我立即衝出門口！衝落街！

“咔！咔！咔咔咔！啪！”大大力推開鐵閘，我就見到...

“颼！”有架白色輕型貨車喺我面前飛過！

我立即望望手上部電話...地圖上所顯示嘅紅點...同輕型貨車嘅位置係一樣！

係喇...一定係喇...綽姿一定喺嗰架貨車度！



我立即拔足狂奔！追住架白色輕型貨車！

會去邊呢？

西貢獻命班仆街會捉綽姿去邊呢？！

架輕型貨車開得鬼咁快！

唔得喇...太快喇...點追呀？！

真係前世未追過車咩...

究竟佢哋要去邊呢？

呢個方向...向住...向住...



我慢慢停落嚟，睇睇手上部電話...睇睇地圖...望住粒紅點正沿住...駛向...

唔通真係...

“叮叮”兩聲，我見到對面馬路有一架殘舊破爛甩晒油嘅輕鐵正要埋站！

睇嚟應該係...

好喇！

我立即跑過對面馬路！跑上輕鐵月台！就喺輕鐵快要開動之時，極速由壞咗嘅車門跑入殘舊嘅車廂！

『嗄...嗄...啱啱好...嗄...啱啱好趕得切...嗄！』我上氣唔接下氣咁！



唉...真係冇鬼用...跑兩步就斷氣咁制...

好啦好啦...等我再睇睇...睇睇地圖...

輕鐵震吓震吓又搖吓搖吓咁…好似快要出軌咁...

應該係喇...睇住紅點駛過嘅路線...

雖然紅點行吓停吓...但呢個方向...呢條路線...應該就係...

“飃！飃！”冷風由破碎嘅玻璃窗吹入嚟...

之但係跟住落嚟應該要點做呢？

綽姿已經被人捉咗...雖然話追蹤器仲喺綽姿身上...之但係我又可以做啲乜呢？



呢一刻嘅綽姿...係唔係已經被迷暈咗呢？

架輕鐵又好似上斜冇力咁，好唔容易先上到天橋，埋一埋站。

會唔會有危險呢？

而家仲喺輕型貨車裡面嘅綽姿...

點好呢...點好呢？？？

我一路望實粒紅點...就好似望住綽姿一樣...

好焦急...但又諗唔到可以點做...



一路望又一路諗...好似過咗好耐...好耐先駛到嚟兆康站。

架輕鐵都未停定，我就單手撳住破爛嘅窗框跳出去！

一路望住電話裡嘅地圖，一路跑上西鐵站！

真係！真係過咗嚟！我嘅推斷係冇錯！

上到嚟西鐵站，都唔係有好多人。

之不過而家有冇人都唔重要！最重要都係繼續跑！

我繼續跟住路線跑！

跑返出西鐵站！繼續沿住荒涼嘅路邊跑！

街上都唔算太多人，好似就只有三四個...六七個大學生擦身而過！

話咁快我就跑到嚟嶺南大學！

我再望望電話裡面幅地圖...望望紅點...

『停咗！』粒紅點停低咗！

停定咗咁...一閃一閃...一閃一閃...

『果然...果然真係！』

我繼續跑！跑到差唔多到富泰...

差唔多喇...差唔要抖返順條氣！

我就減慢步速...放輕腳步...

雖然仲係未諗到可以做啲乜...之但係...都係要過咗去先！

當行到過嚟富泰商場，我就開始提高警覺！

呢個位置...呢個距離...已經好接近...

我要再提高警覺...留意四周...留意四周有冇光頭佬...有冇西貢獻命嘅人！

我左望望...右望望...貼近牆邊...鬼鬼祟祟咁探頭望多兩望！

冇人...四周都唔見有人...

我就加快腳步！跑入草叢！

我閃埋喺草叢裡面，好小心咁慢慢行...

盡量唔好太大動作...盡量唔好發出聲響...

要偷偷地咁...以草叢掩護之下...潛行過去...

當我差唔多潛行到貨倉外圍之時，隔住生滿鏽漬嘅鐵絲網望入去...我望到有架白色輕型貨車停咗喺貨倉門口！

就係呢架...頭先捉綽姿過嚟嗰架！

輕型貨車旁邊仲企咗兩個西貢獻命嘅光頭佬...食緊煙！

睇嚟係...已經將綽姿抬咗入貨倉...

咁講法...綽姿已經昏迷咗？！

死啦死啦...會唔會有險危㗎？

死啦死啦...會對綽姿做啲乜㗎？

死啦死啦...綽姿隻豬冇喇！！！

我而家應該要...應該要點做呢？

綽姿話過唔可以打草驚蛇...唔好話唔可以呀！我想打都打唔到啦！

咁而家應該...應該...

而家應該要接委託！

冇錯！綽姿話要搵西貢獻命嘅護送委託接！

好好！我就撳返開個委託板...點搵呢？

應該搵...西貢獻命...護送...

畫面一轉，就真係出現一個有關西貢獻命嘅護送委託！

喂真係掂喎！

等我再撳入去睇睇...

『係一個獨佔委託...時間係今晚...九點...集合地點仲要係...呢度！』

啱喇啱喇！一定係呢個喇！！！

等我快快手手接咗佢先！

我一接受委託，就見到“成員”裡面仲有三個空位！

照咁睇...今次個委託仲可以多三個成員...

多三個嘅話...會唔會對我哋嘅調查...有影響？

我諗...而家都係唔好諗呢啲住...

我諗而家應該要...

就喺呢個時候，手上部電話一震！

我整個人嚇咗嚇！

電話繼續喺我手中震吓震吓...

係...係有人打嚟？

我再望望電話...畫面中正顯示住...

『朱...』海羅？！

手中部電話Keep住震吓震吓...

我望住“朱海羅”個名...

係朱海羅打俾我？

呢個時候…打俾我做乜呢？

呃...都係聽咗先...

我滑動解鎖接聽：『喂？』

當然就講得好細聲...怕俾西貢獻命班人發現嘛！

「飛揚哥哥早晨～」電話就傳嚟一把嬌俏嘅女仔聲～

『早早...』我繼續Keep住細細聲...

除咗話怕俾西貢獻命班人發現之外，仲有係因為有啲怕羞...

聽到一把咁嬌俏甜美嘅女仔聲...仲要叫我做哥哥...真係心都軟埋...

「咁早打俾你，有冇阻住你吖？」朱海羅繼續Keep住嬌俏語氣咁問。

『唔...唔阻...唔阻...』我都唔知叫唔叫阻...

我都仲係一路躲藏喺草叢之中...偷偷望住出面...望住嗰兩個仲喺輕型貨車旁邊食緊煙嘅光頭佬。

「唔阻就好喇～我幾驚會阻住你做嘢～」朱海羅仲要帶少少甜絲絲咁～

『唔...唔會...唔會...』我都做唔到啲乜...

「係呢...咁你今日...得唔得閒吖？」朱海羅問得有啲羞澀。

『我...我...』我今日得唔得閒？

「我呢...入緊屯門...可唔可以帶我遊覽吓？」

『入...入緊屯...入緊屯門？！』我有冇聽錯吖？！朱海羅入緊嚟屯門？！

我講得好似有啲大聲...因為真係幾震驚！

我撳住自己個嘴，望望嗰兩個光頭佬...

好彩嗰兩個光頭佬好似仲未察覺到我嘅存在...繼續邊吹水邊食煙。

『唔唔唔...唔好入嚟喇...呢邊好危險㗎！』呢邊有專捉小妹妹嘅光頭變態佬！

你知啦...朱海羅咁細個...又咁可愛得意...好易成為西貢獻命嘅目標！！！

「之但係...我已經上咗車喇...」朱海羅又帶住羞澀嘅聲線。

『你...你上咗車？去到邊吖？』唔係已經上咗...林雪架紅Van嘛？！

「我啱啱喺深井上咗車...而家開車喇～」朱海羅帶點興奮。

我仲聽到...由電話傳嚟嘅...“吼！吼～”嘅引擎聲！

仆街喇呢次！真係上咗紅Van！

「呃...你係唔係唔得閒...咁我...我唔阻你喇...我自己一個行就可以喇...」朱海羅帶住點點失落...

『唔係唔係！我得閒吖我得閒吖！』除咗話唔想令朱海羅呢個小妹妹失落...最重要都係安全問題！

一個可愛妹妹仔獨自喺屯門行...同一隻純情小白免喺森林裡面亂跑亂跳有乜分別？！

好易俾啲變態色狼擔咗去㗎嘛！！！

『咁你知唔知要喺邊度落車？』我望望嗰兩個光頭佬...好似食完飛煙...準備上返車？

「我知吖～我知吖～司機哥哥話喺三聖落最好～到咗就會叫我㗎喇～」朱海羅仲要天真爛漫咁～

你話死唔死...你話死唔死...嗰個好明顯就係叔叔啦！仲哥哥？！

『咁...咁你落咗車之後未見到我就唔好周圍行！企定等我喎！』我望住兩個光頭佬上返車...

「嗯嗯～」朱海羅仲要成個小妹妹咁～

『記住喎！唔好跟人行咗去！小心啲光頭佬！小心白色嘅輕型貨車！』望住架白色輕型貨車開動！

「吓？」朱海羅仲要乜都唔知咁！

當然乜都唔知啦！！！

『總之你要記住！記住！！！我而家立即趕過嚟！！！』望住架白色輕型貨車駛出貨倉！

「嗯嗯～慢慢啦～我會等你㗎～」朱海羅又天真爛漫甜絲絲咁～

『好好好！一陣見啦！』

「嗯嗯～一陣見～」

收咗線之後，我再望望個貨倉...有幾個光頭佬邊食住煙邊巡...門口又有幾個守住...

係好唔放心...之但係...而家乜都做唔到...

一定要等到今晚...等到今晚九點...委託時間...

望就望呢十二個鐘...西貢獻命班仆街唔會對綽姿點啦...

唉...好喇！要起行喇！要趕過去搵朱海羅喇！

唔係嘅話...朱海羅有咩事...我仲更加唔安落！

我立即轉身，行返出草叢。

一出草叢，跑返過富泰，都開始見有唔少人喺街上行。

大多數都係廿歲左右嘅...大學生。

唔係向住嶺南大學方向行，就係由嶺南大學方向行出嚟。

有男有女...

唔知係唔係大家都察覺到有危險，啲女仔都唔會單獨行。

唔係一大班女仔一齊行，就係同幾個男仔一齊行。

我唔知咁樣嚇唔嚇得到西貢獻命班人（講真我真係唔覺得有阻嚇作用...）...

之但係...有意識好過冇意識嘅...

我都係唔好理咁多！快啲趕去搵冇意識嘅朱海羅！

我出盡全力喪跑去西鐵站！

『嗄...嗄...』跑到成隻狗咁！終於跑到過嚟輕鐵站！

我搵返架去三聖嘅輕鐵...係喺...邊個月台...

『嗄...係...呀！搵到喇！等！等埋！』我望住架輕鐵正要開動！

我立即由破爛嘅窗框跳入車廂裡！

『嗄...好彩...好彩越得切...嗄...』我上氣唔接下氣咁...撳住對膝頭哥抖抖！

車上嘅人望咗我一眼，又自己顧自己，冇理我咁多。

好喇...唔知趕唔趕得切...喺朱海羅過到嚟之前...去到三聖呢？

以林雪手車...唔使五分鐘就飛到入嚟啦！

架輕鐵可唔可以快啲㗎？

快啲啦...再快啲得唔得呀？！

喺焦急嘅心情之下，你越想架輕鐵快啲，佢就越係慢慢行！

急到我個心都煩晒！心都亂埋！

仲要站站停！（輕鐵就梗係會站站停㗎啦！）

好唔容易先過咗市中心...好唔容易先過咗安定...好唔容易先嚟到三聖！

我都未等架輕鐵停定，就立即由破爛嘅窗框跳出車廂外！喪跑去路邊！

要快啲！要跑快啲！唔可以有事！唔可以俾朱海羅有事！

我跑跑跑跑跑跑！好快咁跑到嚟馬路邊！

『嗄...嗄嗄！嗄嗄嗄...嗄！』冇...冇人...

我扯晒大氣咁望左望右...望晒成條馬路...都唔唔見朱海羅嘅身影...

唔係...唔係真係...遲嚟一步嘛？！