《香港傭兵》: [Day 08－破壞能源] PART 06
唉～一心諗住可以抖抖Hea返陣...又要巡...
冇計啦～都要聽綽姿話㗎啦～
沿住樓梯向上行，上到上一層，都係有唔少雜物。
未起好嘅危樓，會唔會有倒塌嘅危機㗎？
我都唔係好敢行近牆身...
遠離牆身咁行，望望有啲未起牆...有啲起到一半...鋼筋都外露...仲要生晒鏽！
睇起上嚟都唔多穩陣...
再行多幾步，地下仲要穿咗個大窿！
嘩...會唔會行行吓又冧㗎？
都係輕腳啲...小心啲...
再行入少少...
「喵！」又有貓叫聲！
有貓貓喎...喺邊呢？喺邊呢？
我就再探索一下～
「喵！喵！」聽住貓叫聲探索探索～
當我行到去一個大籐籃前...
『原來喺呢度～』我望到有一隻大黑貓，仲有三隻小黑貓瞓喺籐籃裡面～
大黑貓仲要兇神惡煞咁睥住我！
我單膝半跪：『你一定係貓媽媽喇～我冇惡意㗎～我冇惡意㗎～唔使咁驚～』
「喵！」但貓媽媽仲係勁惡死咁睥實我！
我都唔敢靠近，只係離遠咁望住三隻小黑貓飲奶～
三隻小黑貓就輕鬆自在啦～唔憂柴又唔憂米～
所以話幾時都係做仔嗰陣最開心～
做仔嗰陣...
細個就想快啲大個...大個可以自己話事...想入機舖就入機舖...想去睇三級片就睇三級片...
但大過咗先發現有好多嘢都要自己負責...
只能獨處...
要出嚟面到殘酷嘅社會...
背後全沒有支柱...
你以為已經夠現實？
更現實嘅係唔好話想養兩老...就連自己都養唔到...
講真嗰句，做咗幾年嘢，可以同阿月搬出嚟租屋住已經算唔簡單...
買樓呢樣真係諗都唔敢諗...
唉...月月...冇咗我嘅日子，你係點樣過㗎呢？
我冇咗你嘅呢一個禮拜，真係生不如死...
『我真係好掛住你呢...月月...』
離遠住望住四隻貓仔囡都好一段時間...
「喵！喵！」但貓媽媽對我仲係充滿敵意！
『好喇好喇～我都係唔打擾你哋喇～』我都係唔受貓貓歡迎㗎喇～
轉身離開貓貓們，去搵返條樓梯，上多層。
呢層嘅樓梯...比較爛...比較難行...
途中仲有雜物阻撚住！
『喂屌...又鐵罐又鐵釘...又冧咗一邊...又鋼筋外露...』可唔可以唔上呀？
當然唔得啦...
一陣俾綽姿發現我偷懶，斬我都似！
好啦好啦...都係小心啲啦...
小心翼翼咁跨過鐵罐...避開鐵釘...檻過缺口...輕輕踩上鋼筋...
好唔容易終於上到嚟...最上層。
成個頂都未蓋上！可以好清楚咁睇晒成個天空！
厚厚嘅灰雲...就連一點點光線都透唔到落嚟...
“飃！飃！”仲要風很大！
『真係高處不勝寒...』
我又繼續行，繼續查察...
呢一層唔止天花，就連牆都冇一塊！
就只有一碌碌柱。
呢啲係唔係樁柱？
唔知～我對起樓冇乜研究～
除咗一碌碌柱之外，都係同下面一樣，有唔少雜物。
一包包穿咗嘅水泥變埋石屎又有～磚又有～鏟鋸鎚等工具都有～
我再行多幾步，睇清楚周圍...冇乜異樣～一切正常～
然後就行近樓邊，望出出面...
“飃！飃！”風更加大！吹到人都郁！幾危險！
探頭望落樓下...都有成八九層樓高...跌落去真係死硬！
不過呢...呢個位置又幾好景嘅～
可以望到頭先同綽姿拍拖...行過嘅沙灘～一望無際嘅大海～仲睇到日落！真係唔錯！
假如唔係遇上屯門常開起革命，呢度又算唔算好住呢？
係就係隔涉咗啲...之但係有咁靚嘅景觀...都抵啦～
係喎...唔知呢度打算賣幾錢㗎呢？
如果平平地...供得起...我諗阿月都應該幾鍾意呢度～
不過就算幾平都好...阿月幾鍾意都好...就算俾我返到去過去都好...呢度始終都唔會起得到...
除非...可以改變歷史...改變未來...
被良辰美景吸引之下，不知不覺就到日落。
太陽就睇唔到，但就睇到厚厚嘅灰雲慢慢被染紅...然後變藍...深藍...黑...
冬天嘅日落真係好快...話咁快又天黑...
街燈都開始著，好彩嘅係燈光都總算照到呢邊，都未去到陰暗到睇唔到路。
『好啦～我諗都係時候落返去～』
繼續小心翼翼咁行返落樓梯，落返兩層。
落到嚟我就見到仁慈坐喺樓邊。
綽姿呢？綽姿仲未返上嚟？
我仲諗會唔會俾佢話我巡咁耐巡鬼咗去邊！
咁我而家又係唔係應該行去仁慈度？
綽姿唔喺度，會唔會唔係咁好？
會唔會有啲唐突？
有乜咁唐突呢？同Team㗎嘛！
嗯嗯！同Team係應該多啲交流～
我就行近仁慈身邊：『係呢？瓦解仲未返上嚟？』
「未吖。」仁慈帶住憂鬱嘅微笑望望我，「我諗佢應該想再去遠少少嘅地方巡巡。」
『哦...哦...』去遠少少嘅地方巡？
一個人...會唔會有危險㗎？會唔會遇到...逆行者㗎？！
「坐吓。」仁慈拍拍佢身邊嘅位置。
『哦？哦哦...好...』我就坐喺仁慈身邊...
當然就唔係坐得好近！
保持一定距離好啲嘅...始終都唔係咁熟吖嘛...
「你擔心瓦解？」仁慈打量我一眼。
『嗯？嗯...少少...』咁都俾仁慈察覺到？
我係唔係真係咁易俾人睇穿吖？！
「你...唔多似由修行者上嚟...你係瓦解親自搵返嚟？」仁慈一面疑惑咁打量住我。
『我？我...』俾仁慈咁樣問一問，我應該點答好呢？
好唔好老實回答呢？
喺呢一個禮拜裡面，遇到嘅行者唔係爾虞我詐勾心鬥角，就係見死不救坐享其成...
總之個個都信唔過！個個都係仆街！
我又係唔係...要有所防範...要有所隱瞞？
之但係...
『我唔係瓦解搵返嚟...我係嚟自廿年前嘅香港...唔知點解一睜大眼就嚟咗呢個時空。仲要話係咩SPIRIT咩咩傭兵咩咩咩由總部嗰邊派嚟！』反正講咗出嚟都冇人信～
「係...穿越時空...」仁慈帶住疑惑嘅眼神打量住我...
『唔信？我都預咗㗎喇～你就當我吹水啦～』都話㗎啦～
「行者都唔鍾意講自己嘅過去...我明嘅。」仁慈帶住微笑點點頭。
又係呢句...綽姿都係咁講～
『呃...係呢...其實...點解會有SPIRIT嘅？』唔知仁慈又肯唔肯答呢？
「點解會有SPIRIT？」仁慈諗咗諗，「詳細我都唔清楚，只係曾經睇過一啲有關我哋SPIRIT嘅情報。情報顯示SPIRIT喺好耐好耐之前已經存在...主要潛伏喺宗教組織裡面。最成名嘅係...十字軍。」
十字軍？！原來SPIRIT係咁...源遠流長...
『咁...咁正常途徑係點加入SPIRIT㗎？』係唔係要信主受洗入教？
「正常途徑...」仁慈諗咗諗，「你好似真係乜都唔知喎...」
『呃...係吖係吖...因為我真係嚟自過去㗎嘛...』你都唔係第一個咁講㗎喇...
「哈～好～」仁慈帶住微笑點點頭，「正常途徑...有兩種方法...」
有...兩種方法？
「一種係執行者自己親自喺世界各地搵合適嘅人做自己嘅隨行者...」仁慈再諗諗，「另一種就係由基地裡面訓練出嚟。」
自己搵...同埋基地裡面訓練...
東叔都有問過綽姿係唔係佢自己搵我返嚟...
仁慈繼續講解：「前者就要睇吓執行者本身想搵隨行者返嚟做乜。」
搵返嚟做乜？
「有啲執行者真係想搵個隨行者返嚟教好佢，幫自己手。」仁慈再諗諗，「有啲呢...用嚟出賣。」
用嚟出賣...
我記得毒辣都有提過，會搵啲隨行者返嚟送死！
「始終執行委託都好危險...有咩事推個人上前幫自己擋，全身而退嘅機會都大啲。更何況...死人係唔會同你爭報酬。」仁慈望住一望無際嘅大海，點點頭。
死人唔會爭報酬...
都啱嘅...SPIRIT都係一班唯利是圖嘅傭兵。
『咁...由基地裡面訓練出嚟呢？』呢種我比較有興趣！
因為...好似好神秘...
「基地...」仁慈諗咗諗，「喺世界各地，都設有SPIRIT嘅基地。冇乜人知道各基地嘅正確位置喺邊。聽聞就只有先行者以上嘅行者先會知道。」
『先行者...片翼？』
「嗯...」仁慈帶住疑惑嘅眼神打量住我，「你又會知有片翼呢個先行者？」
『我...我喺緊急委託見過佢...』就喺尋晚...
「嗯...片翼係其中一個先行者，亦係眾先行者能力排第二。」仁慈又望住個海點點頭。
『第一係一尾！』我記得綽姿尋晚有講過！
「嗯...你又有見過？」仁慈皺晒眉咁望住我。
『咁...咁又冇...係瓦解講我知...』嗱！我真係有留心聽書，好好記住㗎！
「係瓦解...咁佢對你都唔錯。」仁慈帶住微笑點點頭。
吓？咁就唔錯㗎喇？
佢對我仆街嗰陣你唔知姐...
「先行者嘅人數係幾多冇人清楚...不過好似話唔少。」仁慈擰擰頭。
『你都唔知？』我又好奇喇...
我總係覺得仁慈知嘅嘢同綽姿差唔多...
綽姿就話要我自己查，唔肯講...
仁慈又好似...唔願講得咁詳細？
「我只係一個執行者，又點會知？」仁慈又帶住微笑打量住我，「相反...你好似乜都唔知...但又好似知道啲唔應該會知嘅嘢...」
『我？我冇吖...我真係乜都唔知㗎喎...』我有啲乜唔應該知而我又知㗎？
冇吖嘛！
「你話冇就冇啦～」仁慈又好似唔係好信我，「先行者主要都係駐守喺各地基地裡面，等到有特別或者重要嘅委託先會出現。」
『特別或者重要嘅委託？』會係啲乜呢？
「你有見過片翼㗎，嗰啲咪係特別或者重要嘅委託囉。」仁慈冷眼望住我。
『哦...哦...』好特別好重要咩？我又真係唔係好覺喎...『咁...咁基地裡面有啲乜㗎？』
「基地裡面...」仁慈又諗咗諗，「其實我都唔係好清楚...我只係知道...有好多訓練場。」
『訓練場？』
「嗯...」仁慈點點頭，「訓練場係用嚟訓練修行者。」
『咁...咁啲修行者係喺邊度嚟㗎？』係唔係每年都有招聘日？
「修行者...」仁慈又望住個海諗咗諗，「係各地嘅孤兒。」
各地嘅...孤兒？！
仁慈繼續講解：「各地戰亂當中，有好多失去親人嘅孤兒...SPIRIT就喺戰地之中帶孤兒返去基地訓練。」
原來係...
之前睇YouTube都有睇過，喺戰亂嘅地區都有童兵。
而童兵大多數都係因戰火失去親人嘅孤兒！
仁慈繼續講：「除咗孤兒，仲有好多好多唔同原因被遺棄...被販賣嘅兒童，被帶到去基地作修行者訓練。」
原來...原來行者係...無辜兒童！
SPIRIT就係利用無辜兒童做戰爭機器幫自己賺錢！
『咁你呢？你都係由基地訓練出嚟？』
「我？」仁慈帶住微笑打量住我，「你想唔想聽故事？」
故事？