《香港傭兵》: [Day 03－活在當下] PART 05
「你一個人，拎唔拎得到㗎？」阿叔放箱咖啡豆上檯。
嘩…真係好鬼重咁喎…
『我諗…得掛…』我初初仲諗住係一包包嘅咖啡豆…
「唔得都要得㗎喇～呢度得返我一個…想幫都幫你唔到…唔係嘅話都唔使叫你哋親自過嚟拎啦～」阿叔拍一拍箱咖啡豆。
“啪啪”聲咁…好硬咁喎！
「個箱打咗印，沿途遇到西貢獻命都唔會為難你㗎喇～如果佢哋真係信守承諾…跟規矩嘅話…」阿叔行咗去貨架點貨。
我望望個木箱…前面真係有個藍色…唔似賈唔似頁嘅印記…
『哦哦…唔該晒…拜拜…』我嘗試拎起箱咖啡豆…
嘩！真係好撚重！
「慢行喇。」
拎住箱鬼咁重嘅咖啡豆行出去搭𨋢，入到𨋢已經頂唔順要放一放低先！
仆你個街，咁撚重會唔會困𨋢…都好啲！
最怕係加速直落到地獄！
不過都好彩，只係震吓震吓有驚無險又平安著地！
拎住箱咖啡豆搵路走…又喺工廠大廈入面迷路…兜咗幾個圈先逃出迷宮！
『我屌！點撚解啲工廠大廈咁多通道㗎？！』我放箱咖啡豆上欄杆，抖抖氣！
淨係行出迷宮都咁鬼攰！點拎箱咖啡豆返去？！
我挨喺欄杆，諗一諗…突然俾我諗到…
『係喎！我仲有4 Sil㗎嘛！』差點都唔記得咗！
咁咪夠錢買VPN囉！
冇錯冇錯！快啲搵搵呢個年代嘅阿月先！
我急不可耐咁拎部電話出嚟！開返SPIRIT App！再喺工具買個價值3 Sil嘅VPN！（真係好貴囉！）
交易完成！得返1 Sil！
然後呢？點用呢？
就咁開個瀏覽器上Facebook？
Try Try Not Die啦！
我就快快手手打開瀏覽器！再喺搜尋輸入…“Facebook”！
畫面一轉，好快就開咗Facebook出嚟！
雖然個介面唔同咗…但過咗咁多年都屹立不到真係估佢唔到！
好！快啲登入！
『whi…』我就喺用戶輸入自己個Email！
『密碼係…19…』再輸入阿月嘅生日日期！
登入！
畫面好快就出現…
『並無此賬戶？！』我望住個Facebook頁面…
冇理由㗎…唔會有錯㗎喎…係呢個Email…自從阿月幫我開…我就一直用…冇開過其他！
再試多次！
『whir…』我再試多次…『並無此賬戶…再試過！whirl…』
就算我再試多幾多次…
『並無此賬戶…』都係出現呢句…
點解會…唔通…係我太耐冇Login過嘅關係？
已經有廿年冇Login過，所以就自動刪除？
會㗎咩？
我就試吓…喺電話裡面登入自己嘅Email…
但結果都係一樣…並無此賬戶…
就好似…從來都冇出現過咁…從未存在過…
點解會咁㗎呢？
我穿越時空，一夜之間嚟到廿年後嘅香港…我嘅過去…冇晒？
唔通…微軟終於收皮？！
我撳返個瀏覽器出嚟，搵一搵Outlook…畫面好快就出現微軟首頁！
『屌！微軟咪又係屹立不倒！』
點解呢？咁究竟係點解呢？
我再試其他方法搵自己個Email Account！
但我用盡我識嘅方法，都係搵唔到…
咁…阿月嘅Email呢？
都係一樣…
阿月嘅Email同我個Email一樣，都係消失得無影無蹤…
點解連阿月都…
Email搵唔到…
『仲可以靠咩方法去搵呀？！』
唉…真係唔知呢個世界發生過咩事！
我又應該點去查探…又應該由邊度入手？
望住手中部電話…SPIRIT嘅產物…
唔知…會唔會幫我搵到答案？
我左望望，右望望，見仲係冇人就打返開SPIRIT App…情報庫…
應該點搵好呢？香港？屯門？
我諗都係縮窄啲範圍，由屯門搵起。
喺搜尋空格輸入屯門之後，好快就有好多個Posts出現喺畫面之中。
望住一個個黑底白字嘅Posts…個個都要俾Sil先睇到內文！
而且仲要唔係平？最少都要10 Sil！
睇嚟SPIRIT真係冇免費嘅午餐！
內文就睇唔到，但可以由Topic名嘗試推測…
我一路碌，一路留意住啲Topic名…
『反抗軍屯門常開成立經過…屯門區戰況…警察正式撤離屯門…』有好多好多關於屯門嘅Topic，當中唔少都透露咗屯門真係有反抗軍起過革命…
照推斷…喺屯門區組成咗名為屯門常開嘅反抗軍…仲成功奪取咗屯門嘅控制權…
之後…
『香港政府處理屯門及天水圍區方針…』應該就係天水圍都被天水圍城奪取控制權…
仲有就係…
『西貢獻命餘黨逃到屯門…屯門常開與天水圍城合併為天門…屯門常開進駐元朗…』有關西貢獻命同天門嘅情報…
所有嘅資料都同阿叔講嘅差唔多…
歸納各點，而家可以肯定嘅係，屯門、元朗同天水圍呢三個地方嘅警察都撤離，被反抗軍控制…
乜真係可以起到革命㗎咩？！
啲武器喺邊度嚟？人數又真係夠警察多咩？
喺情報庫裡面，的確係有兩個Post分別講出天門同西貢獻命嘅資源從何而來。
當然…我都係唔夠Sil俾，睇唔到內文！
究竟香港政府會點做？幾時郁手？反抗軍又捱得幾耐？
精準嘅我就計算唔到～但粗糙估計…反抗軍好快收皮囉…
想反抗？起革命？我從來都唔覺得香港係起到革命。
地方又細又冇天然資源…學咩人講革命？
一個燃燒彈Dom落嚟，都唔見咗半個香港啦～
真係唔明…點解會形成而家嘅局面。
我就繼續碌…睇吓可唔可以喺啲有限嘅Topic名之中，得到更多…推測到更多。
碌吖碌～好似睇連登咁碌吖碌～
碌碌吓突然…
『喂搞咩呀？彈App？！』我望住個黑色桌面…
唔撚係吖化？！
碌幾碌都彈App？！
咩系統嚟㗎？有冇得再Cheap啲呀？！
廿年後嘅科技喎～SPIRIT喎～屌～
我再撳返開SPIRIT App！
但畫面一開…就開咗一板…有關…
『原核？！』
Topic係寫住…“原核：ADAM”嘅內文…
點解會…無啦啦有內文睇…
嗱！又唔好理咁多～有嘢睇就梗係睇咗先講～
我就睇睇內文…
『ADAM…係一種最原始…孕育生命嘅物質…』嘩屌！講經咁講喎！
由盤古初開咁講，講到幾時呀？
我好撚怕睇字㗎！有冇啲精要啲㗎？！
我繼續睇…
『潛藏喺世界某一處…』
唔耐煩咁睇…
『難以偵測…』
睇多幾行…睇多幾段…睇到有一段係寫…其功能之一...
『穿越時…』我立即撳住自己個嘴！
好似講得有啲大聲…
我左望望，右望望…好彩仲係冇人！
係…穿越時空？！
ADAM…有扭曲空間…產生出時光隧道…穿越時空…
呢度的確係咁寫！
咁即係話…假如俾我搵到呢個潛藏喺世界某處嘅ADAM…我就可以返翻去…
唔係…應該話我已經遇過！
我就係遇過ADAM呢種物質，先會由我本身身處嘅時空…嚟到未來嘅呢度！
一定係咁！ADAM就潛藏喺香港！
咁我應該喺邊度先可以再遇到ADAM…應該喺邊度搵？
“時光隧道”都已經倒塌…應該就唔會再喺嗰度…
我就再繼續碌！睇吓仲有乜資料！
但當我再向下碌之時…
『又彈App？！』我望住黑色嘅桌面…
呢個爛鳩系統真係好唔穩定！
我再快快手手咁撳返入SPIRIT App！
『冇…冇咗…』畫面只係顯示返我頭先搜尋有關屯門嘅資料！
屌！真係冇咁好死！
不過而家俾我知道…世上有一種物質叫ADAM…有可能可以帶我回到過去…
只要繼續喺SPIRIT做委託…收集情報…話唔定可以再得到更多有關ADAM嘅資料…話唔定會俾我再遇到ADAM！
到時…我就可以再見返阿月！
冇錯！做好一個行者…找尋ADAM…呢個就係我嘅目標！
做好行者…做好行者…係喎…我好似仲有啲嘢未做完㗎喎…
我望望手上部電話…望住個工具…
係喎！我仲有半個工廠區未掃㗎喎！
我撳返開個掃描工具睇一睇：『仲運行緊！』
好！係時候掃埋另一半！
我就袋好部電話，拎起箱咖啡豆…
好撚重！
好啦好啦！快啲行啦！
我一邊行…一邊諗…
假如真係俾我返翻去，我會做啲乜呢？
梗係努力搵錢然後同阿月一齊移民喇！
都已經體會過未來嘅香港有如地獄一樣，仲留喺度受苦受難咩？
有得走好走喇！
咁走去邊好呢？
移民去日本？
日本都好吖～阿月咁鍾意日本～
要賺幾多先夠移民去日本呢？
一邊行，一邊諗，沿途都遇到唔少上落貨嘅工人同埋…西貢獻命…
兩個西貢獻命嘅光頭佬迎面行過嚟，望一望我手上箱咖啡豆，擦身而過…
其實唔止呢兩個…
其實之前已經遇過好幾個…
一路上，遇到好幾個西貢獻命。佢哋都係望望我手上箱咖啡豆就擦身而過。
冇攔住我，冇難為我。
唔通真係個印？
唔通…真係國有國法…幫有幫規？
可能啦～可能地獄都有規矩要守～
我就唔理得咁多～反正平平安安就繼續掃！
繼續行吓又抖吓…抖仲多過行…
幾經辛苦，終於行晒成個工廠區！
『嗚呀！真係攰撚死人！』我放箱咖啡豆上張爛鐵凳上！自己再坐埋落去！
睇睇先！睇睇掃成點先！
我拎部電話出嚟，開返個SPIRIT App睇睇。
『紅晒…成個工廠區紅晒！』掂喇掂喇！今次真係掂喇！
Send埋去委託…任務…記得撳埋完成！
搞掂晒！仲有冇嘢要做？
冇喇嘛？冇彈新任務啦嘛？
好喇好喇…可以抖吓…
唔係唔係…抖吓好喇…抖吓好喇…仲要拎箱咖啡豆返去咖啡店㗎！
打兩份工真係辛撚苦呀！！！
坐喺張爛鐵凳上抖多一陣，我就頂硬上！拎箱咖啡豆返咖啡店！
今次我揀咗條最直接嘅路行返去咖啡店！
當我行到返嚟咖啡店門前，我對手都痺晒！
Owner一見到我企喺門外手震震又腳震震…全身不停震，就出嚟幫我開門：「你返嚟喇？辛苦你喇～」
『唔辛…苦…唔…辛苦…』就假嘅！
要拎箱咁重嘅咖啡豆又唔早啲講…
「嚟嚟嚟～呢邊～放喺度～放喺度得㗎喇～」Owner帶我入到去櫃檯前…
『嗚呀！』我一放低箱咖啡豆後，成個人散晒咁！
終於都…完成工作！
「辛苦晒喇～你嘅酬勞～」Owner喺部收銀機拎咗張五十蚊紙出嚟，遞到我面前。
『多…多謝…』五十蚊…呢五十蚊真係唔易賺…
拎住咁重嘅嘢…行咗咁多路…
“咕咕”個肚仲打晒鼓！
「肚餓？」Owner帶住微笑問一問。
『呃…嗯嗯…』我點點頭…
係喎…講起上嚟…我好似成日都…冇食過嘢落肚…
「食件餅～」Owner喺個餅櫃入面拎咗件…魔鬼蛋糕仔出嚟俾我。
『哦哦…』我接過Owner手上件魔鬼蛋糕仔…
「盛為五十蚊～」Owner向我攤出手。
『吓？要錢㗎？』仲要五十蚊添？！
「梗係要收錢啦！呢個世界冇免費午餐㗎嘛。」Owner認真咁點點頭！
嘩我屌吖！呢頭幫你打完工賺你五十，轉頭食你件餅又收返我五十…
我行到仆街先得五十，你件餅仔嚟咋喎…值唔值五十呀？
「你要唔要㗎？」Owner冷眼咁望住我，「最多我送杯咖啡俾你喇…」
『哦…要囉…』你講到皇恩浩蕩咁，『係呢…得返你一個嘅？輝哥呢？』
望一望…都唔見輝哥嘅身影。
「輝哥…舊患復發…」Owner拎返我手上張五十蚊，放返入機，就行去咖啡機前沖咖啡，「雨姐送咗佢返屋企～放心喎～我一個人都搞得掂～你出去坐吓等吓～好快有咖啡飲～」
『哦哦…』我就拎住件魔鬼蛋糕仔，行返出去。
望一望店面，真係唔見雨姐…
仲有梓翹同埋…坐喺窗邊嘅白髮少女都已經走咗…
取而代之嘅係…學生妹…