《長夜無光》 一覺瞓醒，我再冇見過太陽升起嘅一日: 4 異界
「一個月？！咪玩啦！我醒個陣部手機都顯示係3月13……」
我看着阿Rex和其他人，笑着等待他們給我一個我渴望的回答。然而阿Rex只是輕輕點頭，輕聲道：
「我地每個人最後一次見到陽光個日，都係3月12號。」
媽的…
收起笑容，看着面前這幾個人無奈的嘴臉，我癱坐在地上，直盯着地下。
「痴撚線…」
「我都明一時間係幾難接受，但係事實上我地的確係呢個冇陽光嘅世界生活咗一個月。」
游岳拍拍我的肩膀，似想安撫我地說：
「不過，你係我地呢幾個禮拜以嚟唯一遇到嘅外人。」
看來這真的是事實，但是我手機上的日期卻只經過了一日，況且這樣的話，我是睡了一個月不然？抱住疑惑的我環視一下其他人，問道：
「大家都係一個月之前醒嘅？」
「我係一個月前醒嘅，其他人都係相差一兩日。」
游岳真誠的看着我，苦笑着對我說：
「所以我地真係估唔到仲有機會見到其他人。」
對我來說，這一切都不過是醒來後幾小時內的事，而現在我眼前的這班人卻已在這黑暗的世界裏生存了將近一個月，實在想像不到他們到底經歷過甚麼。
不過撇開這些不說，這個世界究竟是出了甚麼事？不單止無盡的幽暗和那恐怖的怪物，連時間…都像以詭異的方式行進着…
他們所經歷了的一個月，我是一直睡着，還是……
「喂！接住。」
阿Rex突然向我喊道，然後將不知從哪拿出來的一個裝在透明膠袋內的麵包拋向我。
意料不及的我差點就接不住他拋來的麵包，是個牛角包。隨手摸了一下手上的牛角包，出乎意料地還像新鮮出爐一樣外皮鬆脆之餘內裏鬆軟，還稍為帶些香氣。
奇怪，這個麵包並不正常…
「呢啲麵包應該都出左爐有一個月，我諗你睇得出有咩奇怪。」
阿Rex手中舉起另一個麵包，向我示意說。
一個月前出爐的麵包，到現在卻依然沒有發硬發霉，這並不合常理。不過在這還有甚麼常不可言。我看了看手中的牛角包，反問他說：
「其他野係咪都係咁？野食，野飲都冇過期？」
「你真係幾聰明，望幾眼就知我想表達咩。」
那討厭的嘴臉又再出現在阿Rex的面上，他開始用那嘲諷的語氣對我說：
「呢一個月以嚟，我地知嘅唔係好多，但係其中一樣野就係係呢到嘅時間好奇怪。」
「時間…好奇怪？你咁講即係咩意思？」
我疑惑的反問他，一旁的嘉銘突然插嘴的說：
「我地嘅意思係除咗我地嘅身體感覺之外，所有野嘅時間都停滯咗。」
嘉銘可能看到我還是一臉不解，繼續向我解釋：
「簡單啲咁講，隨住時間推移我地會肚餓，會口渴，會攰，會眼瞓；但係除此之外其他野嘅時間都停咗，麵包唔會發mold變硬，野食唔會過期發臭，個天都永遠保持係夜晚，你以前所知嘅常識係呢到已經用唔着。」
看着手中這超乎常理的牛角包，我還能明白他說的話，但當然，還有一樣東西始終讓我很在意。
「Okay…咁…個隻怪物，即係你地話個隻「黑影」又係咩嚟？」
「個隻怪物……我地都唔係知道好多。我地醒咗一兩日佢就已經出現咗，成日會突然出現係我地眼前，毫無先兆咁攻擊我地然後又突然間消失，完全冇辦法理解佢嘅用意；我地試過反抗但係無論點攻擊佢，甚至攞刀劈落去，對佢一啲傷害都冇，見到佢除咗掉頭走之外我地已經冇辦法應付佢。可以係佢手上走甩已經好好彩，我諗你一定明白，特別係親身經歷過…」
嘉銘一邊說着，右手卻不自覺的撫摸着自己的頸項，從他手指間的間隙中我隱約看到幾個泛紅色的指印。他察覺到我看到他的小動作，速速的放下手繼續說:
「不過遇到佢咁多次，我地至少都知道一樣野，呢隻「黑影」一日入面只會出現幾個鐘。照我地咁多次嘅經驗嚟睇，佢每日只會出現三次。你應該有聽過唔知邊到嚟嘅鐘聲？」
的確。若非嘉銘提起，我都快忘記那怪物消失之前不知從何處響起的鐘聲。在那怪物的面前，那憑空出現，不可能出現在藍田的鐘樓鐘聲也變得毫不出奇。看來那怪物和這鐘聲是脫不了關係，應是和它的出現消失有關。
「有，係佢就嚟殺死我個陣就響咗一下鐘聲，佢一聽到就停低哂動作，然後就突然間消失咗。」
「冇錯。個一下鐘聲就代表佢出現嘅時間已經完咗，所以佢先會突然消失。同消失個時純粹一下鐘聲唔同，佢出現個時會有好似鐘樓報時一樣，一段五六秒嘅鐘聲。手機同電子錶都唔可以正常運作，不過都照常睇到時間。對照翻時間，「黑影」會係每日六點，十二點同下晝六點出現，兩個鐘頭之後消失。我地所知嘅就係得咁多。」
說罷，嘉銘聳聳肩，沒有再多說。看來這男生挺細心和聰明，這些事應該是他觀察所得，正常人在這異世界早就沒有耐心去留意這些細節，更何況困在這整整一個月。環觀其他人，似乎也異常的冷靜，阿Rex也就話說語氣和嘴臉反感，游岳也不過些許過分熱情，沒有插話的兩個女生也沒甚麼怪異，他們真的在這鬼地方生活了一個月……？
「好……明白……不過我仲有一個問題，你地一直以嚟都留係藍田？有冇試過去其他地方？」
「你當我地咁撚蠢冇諗過咩，一早試過啦。」
阿Rex突然放話，看來有點不滿我的問題。
「我地試過想行去觀塘，不過成個藍田嘅邊緣都起哂濃霧。信我，你去過就知我地冇可能離開到藍田。」
我忍不住嘆了口氣，沒有再多說一句獨自走到一角，靜靜消化剛才聽到的一切。詭異的時間行進，常識不適用的世界，脫離理解的怪物，在這種世界我還能生存下來嗎？而且…我還能回歸那正常的世界嗎？
稍微理清了思緒，我轉頭再看向他們，輕聲的問了一句：
「你地跟住落嚟有咩計畫？」
阿Rex聽到我的問題後，不知何解的考慮了一下，然後才對我說：
「咁心急呀。其實我地都冇咩計畫，不過點都好至少要搵翻其他人先再算。」
「你地仲有其他人？我仲以為呢到已經係全部人……」
他的回答確實令我意想不到，談了這麼長時間也未想到這事，還一直覺得眼前的五人已是這團體的全貌。在阿Rex那討人厭的嘴臉下，剛才我被告知的一切究竟有幾多屬實，又還有幾多事實隱藏在後面？
「係，除咗呢到你見到嘅我地仲有兩個人。兩日之前佢兩個過嚟諗住睇下呢邊嘅情況，本身係噚日要同我地會合，不過到今日朝早都冇出現。我地由啟田過嚟呢邊就係想搵到佢地。」
一旁的游岳說。他們的表情一臉凝重，看來是真話。為了失蹤的兩人就全員離開據點找尋，他們似乎很重視同伴這概念，不過在這環境下，相信對於一個團體而言，任何一個人都非常「重要」。
「我幫你地搵佢地，你地應該需要人手。」
作為一個剛到埗這異世界的新人，儘管我更想單獨行動，跟隨這班認識不到一小時，不過比我更熟悉這世界規則的陌生人行動是更合理的選擇，而且適當給他們幫助才能更快的跟他們熟絡吧。的確我不好與人交際，尤其是陌生人，不過我還懂得如何跟人交流。
剛說完這句話，一直在一旁低頭默不作聲的Enid抬頭看着我，低聲對我說：
「Thank you…」
說罷，她又轉開了視線，走出店門外。
「Sorry呀，唔好介意Enid咁樣。佢份人係有啲拘謹。」
看到Enid的行為，一旁的Emily似乎有點擔心我會介懷，連忙向我解釋道：
「佢平時冇咁靜咖，可能佢唔係好鍾意陌生人啦，的地都過咗一排先開始熟絡。」
「唔緊要。」
我說，伴着一個微笑的表情。原來她跟我還挺相似。
「不這點解佢咁嘅反應，佢同個兩個人好熟？」
Emily聽罷，帶些苦笑的說：
「唔係熟咁簡單，其中一個人係佢個妹…」
「唔好講咗多啦，快啲去搵翻佢地好過。」
打斷了我們的對話，阿Rex向我走近，拍了拍我的肩膀，神情認真的說：
「不過真係多謝哂。」
「唔使…」
「依家已經兩點九。」
阿Rex從褲袋中拿出了一隻電子錶，看了看然後說：
「好啦，係時候出發搵佢地。」