是咁的，我嘅職業係幫人瞓覺: 二百六十七、接吻

係喎，啱啱全世界可以暫停，點解我會咁都唔發現？現實世界無可能暫停，即係話我依家喺夢入面啦？

但係邊個嘅夢？我又係幾時入嚟嘅呢？

唔通嗰個男仔先係我嘅客人？但客人又有乜可能可以自由穿梭夢境呢？

輕柔嘅手拍拍我膊頭，男仔再次出現：「放心，你好快就會記返哂所有野。」

「我依家可以肯定自己喺夢入面。你到底⋯⋯喺度做緊咩？仲有，你係咪至少應該話我聽，你到底係咩人？」





「我根本唔重要，重要嘅人係你呀。」

喺我同男仔講野嘅時候，我地不知不覺間已經企咗喺美都餐室入面。

我嘅客人美美喺度等緊我，佢對大眼喺枱上嘅西多士同紅豆冰之間游移。

我嘅大腦話畀我聽依個女仔又係要幫佢瞓覺嘅客人，但我已經好清楚自己發緊夢，佢地根本唔係我客人。

冷靜啲⋯⋯佢地之間一定有關聯嘅⋯⋯





雖然喺夢中會記唔起現實世界嘅記憶，但我隱約有印象，好似試過遇上三個客人嘅名可以連埋一齊嘅情況⋯⋯

梁、me、美？梁美美？唔係⋯⋯仲差少少，我仲差一塊拼圖。梁美乜？梁乜美？

「如果你想知我係邊個，就過去錫佢一啖啦。」

「吓？」

男仔表情認真，完全唔似講笑。





我望住佢，揪住佢衫領：「有咩就依家講，咪再玩我喇！」

「阿金，你係咪⋯⋯」我被聲音吸引，轉頭望向美美，同時我揪住嘅衫領已經連同個男仔消失得無影無蹤。

我無辦法之下唯有行過去美美對面坐低。

美美起身，行到我旁邊，彎腰望住我問：「好辛苦？」

佢額頭貼上我額頭幫我量體溫。

「唔，無發燒喎！」

我同美美塊面好近，近到感覺到大家嘅氣息。

依個只係夢，但又非常真實。美美額頭軟屬而溫暖，佢嘅吐息有牛油同糖漿嘅甜香。





我真係搞唔清楚依家嘅狀況，但睇嚟個男仔知道，佢先係掌握情報嘅人。

為咗要知道佢係邊個⋯⋯

死就死啦！

我輕輕抬高下巴，同美美嘅嘴互相結合。

我眨咗一吓眼，美美同美都餐室就喺眨眼嘅瞬間消失咗。