是咁的，我嘅職業係幫人瞓覺: 二百四十四、不安

「咳咳。」老豆清喉嚨，示意要講正經野。

「哦！係呀，你問咗佢有無私樓未？幾時擺酒？」

「都話朋友咯，你死都唔信。」

「你啲朋友我個個都識架啦，無啦啦彈個新嘅靚女朋友出嚟，大家知咩事啦。」

「咳咳！」老豆再次清喉嚨。





阿媽面上有啲尷尬，最後好唔願意咁開口：「唉。仔呀，你認真答我，你話盡快做手術就無事，係呃住我地先想我地安心，定醫生真係咁樣診斷？」

我聽到依句先知，其實阿媽心入面一直好擔心，只係盡量唔表現出嚟。佢表現到好似平時一樣，咁我就察覺唔到佢嘅不安。

佢向來都唔擅長靠把口嚟表達自己嘅關心，可能因慣咗賤嘴啦，關心同問候嘅說話向來都好少講出口。

我有腦癌大件事，佢更加唔知點樣開口，由邊度問起。

所以一入門口，佢先閒話家常咁抽我同miki水。





如果有個外人睇到我一入屋嗰幕，一定會以為我帶女朋友見家長，完全唔會覺得我係啱啱確診有腦癌。

但其實佢心入面，早就已經累積咗不安。

無表達出嚟嘅不安，我感受唔到，但唔代表唔存在。

如果唔係老豆夾硬逼佢講，我諗阿媽都唔會主動問我情形，即使佢心中幾想問。

「係真嘅，我無呃你地。醫生話個瘤嘅位置適合做手術，只要盡快切除，配合復健活動就好快可以正常咁生活。」





我見到阿媽老豆不約而同鬆咗口氣。