是咁的，我嘅職業係幫人瞓覺: 二百四十三、回家

我帶miki上到屋企，阿媽同老豆都已經早過我地返咗嚟。

佢兩個夾手夾腳煮緊飯。

「伯母伯父你地好呀！」miki一入門口已經帶動個氣氛，同兩老打招呼。

「啊，嚟咗喇？隨便坐吖。」

miki除鞋走咗去梳化坐低，對腳揈下揈下，好輕鬆。





我正想埋去嗰陣就被阿媽拉住衫領扯咗入廚房。

「喂叻仔喎，個樣唔差吖。係就係矮咗啲，但啱你個矮仔喎。」

好難想像有阿媽會知道個仔生腦腫瘤之後，竟然唔係問我咩情況，而係抽我水。

「我矮都係你生出嚟架咋。」我都不甘示弱。

「唔好瀨得就瀨，要瀨都瀨佢啦。」阿媽指住洗緊菜嘅老豆，真係躺著也中槍。





我已經係全家最高嗰個，分別高過我阿媽一個頭，高我老豆半個頭。

兩公婆都矮，唔通我會高得過姚明咩？