是咁的，我嘅職業係幫人瞓覺: 二百四十、吻下去

miki往後嘅人生，注定喺放棄同再次企起身之間徘徊。

某啲日子捱唔落去，想放棄嘅時候，又再諗返金仔為佢做過嘅一切，重新注入力量去生存，直到力量又被完全消耗，想放棄⋯⋯

就好似沉咗喺池底，幾經辛苦游上池水面，但只係勉強先捉得住池邊，都雙無力又沉返落池底。

好似不停推巨石上山嘅西西弗斯一樣。

咁嘅人生，同身處無間地獄有咩分別？





我皺起眉頭望住miki，我唔知心入面係同情佢定係點，但我想摸下佢個頭。

不過我無做到，因為我好清楚我嘅安慰無辦法驅散miki嘅黑暗。

我唯一做得到嘅係⋯⋯如果要解開依個女仔嘅心結，我只能夠⋯⋯幫佢瞓覺。

當我浮起依個念頭嘅時候，miki突然煞車，我成個頭撞咗去前面。

車內播緊一首歌嘅前奏。





架車咁樣急煞法，好彩後面架車離得遠，唔係已經炒咗。

我地停咗喺路中心。

「嗶——！！！！」後面嘅車開始響安。

吻下去
便確定我共你
能同生
能同死





miki本身濕濕地嘅眼角，湧咗粒淚珠出嚟。

趁渡假
覓勝地我共你
能從此
一起

「嗶——嗶嗶——！！！」

我已經意識到佢無啦啦唔郁係同首歌有關，見情況咁緊急，即刻幫佢㩒制轉歌。