是咁的，我嘅職業係幫人瞓覺: 二百零九、平行世界
我拎起嚟睇，驟眼睇落好似係一個異想天開、天馬行空嘅隨筆。但miki同嘉儀唔一樣，佢唔係作家，只係記者。
所以筆記入面嘅記錄，都係真人真事。
「唔知幾時開始，坊間就開始出現識得用超能力嘅人。直到依家，連埋你在內一共有三個人。」
筆記上係超能力者嘅記錄，有人可以睇到平行世界嘅過去，有人可以聽到另一個世界嘅人講說話。
「點解新聞無報？超能力喎，咁大件事，到依家都會無人討論？」
miki指尖掃過兩個人嘅能力：「因為佢地嘅超能力都係無辦法客觀證實，唔係隔空取物呀、瞬間起火依啲外人可以睇得到嘅能力。」
我大致上明白。因為人唔會咁容易相信有超能力存在，每當有人聲稱自己有，其他人就會叫佢證明。
但睇到平行世界，聽到另一個世界有人講野，唔係可以證明到畀人睇嘅能力。