是咁的，我嘅職業係幫人瞓覺: 一百八十二、現實，唔係夢

「佢都鍾意至尊寶，所以你先好似以前咁整個手製公仔送畀佢。你問心，依個新對象係咪好多方面都同阿婷好相似？」

余生沉默。

「如果你因為依個女仔似阿婷而同佢一齊，你最後只會覺得佢唔夠阿婷好而分手。」

幾似都好，兩個獨立嘅存在無可能一樣。

仿製品同真貨，高下立見。





正因為每個人都咁獨特，所以每一次分手都係永遠失去一個人。

有啲人喺失去嗰一刻就明白，「啊，我永遠無可能放下」，只要真係好愛好愛一個人，身體內嘅某部分就會隨佢離開而消失。

肉體上嘅傷口會癒合，但斷咗嘅手係唔會生得返出嚟。

心靈嘅創傷有啲可以癒合，有啲唔可以，依個都係一個殘酷嘅現實。

除咗接受自己依個新嘅形態，別無他法。





因為意外而失去身體某部分嘅人，見到自己變成咁，會對將自己搞成咁嘅原凶產生憤怒同憎恨，亦係無可厚非。

余生就係咁樣，將矛頭指向阿婷同阿邦。

但對阿婷，喺憤怒之下，仍然有愛。

「因為你一直接受唔到阿婷唔再愛你依個事實，所以心入面先會繼續保留對佢嘅愛。」

以至於當出現一個類似阿婷嘅異性，余生就將保留咗嘅愛意拎返出嚟。





只係依種愛意雖然可以促使兩個人「拍拖」，但無辦法成為「幸福」。

「你啲說話，好似刀咁插哂入我個心⋯⋯」余生忍唔住流咗眼淚：「點解你要咁殘忍⋯⋯」

因為現實，唔係夢。