是咁的，我嘅職業係幫人瞓覺: 一百、夢同現實
好簡單嘅原理，普通人瞓覺係進入第一層夢境，同時失去自覺，唔知自己發緊夢，亦控制唔到自己嘅行動。
而我幫人瞓，進入其他人嘅第一層夢境係會保持清醒，知自己發緊夢。
不過進入第二層夢境，或者係夢之迷宮之中，我就會好似普通人進入第一層夢境咁，有機會唔知自己喺夢入面。
所以我話喺夢入面瞓著或者誤闖迷宮好危險，因為我會唔知自己發緊夢。
而夢中夢同迷宮都處於更深層嘅潛意識，如果契約時間到，本來喺夢嘅我會醒，返去現實。
但若果我喺夢中夢或者迷宮，時間到，我醒返只會浮上第一層夢，即係我會永遠被困喺客人嘅意識入面。
記憶依舊錯亂無章，我只係記得現實嘅我決定進入客人嘅夢之迷宮，好似仲特登為自己設立咗錨點，令我唔會喺夢中迷失。
唔好問我點確定醒返之後嘅世界係真實，依啲哲學問題要問莊子。
現實可能都只係一場夢，無人可以真正確認到自己身處嘅世界係唔係現實。