是咁的，我嘅職業係幫人瞓覺: 九十七、未知之數
「你係咪覺得唔夠？」
「唔係，我唔係嗰啲扮清高再坐地起價嘅人嚟。只係今次嘅工作內容太多未知之數喇。」
恆仔面有難色，閂返埋個皮箱，坐喺梳化上，彎身，雙手頂住額頭。
佢本身請我嚟，係叫我幫佢瞓覺，咁佢就可以守喺病床旁邊直到恆媽走為止。
都係嗰句，唔知佢幾時走。
恆仔買通咗醫院方容許佢過咗探病時間仲可以留守喺病房，不過佢並唔想就咁坐喺度白白等到恆媽死為止，所以先希望我出手。
「我已經太耐⋯⋯無同媽咪好好講過一句說話。」
唔使愁喎，好多人就算老豆老母健健康康都未必會同佢地講一句野架啦。