是咁的，我嘅職業係幫人瞓覺: 四十七、記錄
「咁你想我同阿婷講咩呀？」
婷婷好幾次擘大口，但一粒字都講唔出。
「太多野想講，反而唔知點開口同埋由邊度開始好⋯⋯」
「咁不如你話我知點解你會咁憎阿婷吖？」
八卦多事向來係我缺點，但有時又係優點，睇下用喺邊方面啦。
「一匹布咁長，我都唔知點開始好喇⋯⋯」
婷婷望一望心房嘅其中一道門，然後拉我過去：「或者你自己睇下就會知點解。」
房入面有另一個婷婷，佢睇緊螢幕上嘅阿婷。
「全部都記錄哂喺度。」我地睇返當阿婷經歷緊一啲事嗰陣，佢心入面嘅婷婷又經歷緊啲乜。
旁邊嘅婷婷耷低頭，輕輕抱住我隻手。