是咁的，我嘅職業係幫人瞓覺: 二十四、自信

「唔肉酸吖，你驚之嘛，無乜野架。」

真相肉酸，所以唔想面對，係人之常情。始終人都係比較喜歡謊言嘅動物。

「我⋯⋯驚？」

雖然阿俊毫無自覺，但佢面試會出現唔好嘅預感就係因為佢對未來嘅恐懼。

見阿俊百思不解個樣，我靠前，將雙手枕喺枱上。





「係呀，源於自卑嘅恐懼。」

佢搖搖頭：「我唔明呀大師。」

「你覺得自己未夠料做老師，能力不足，好驚自己真係做到但名不符實。所以潛意識嘅你抗拒你達到依個目標。」

潛意識影響嘅結果，就係令佢喺面試嘅時候突然咩都諗唔到。

一個人嘅自信心會受自己嘅內在信念同客觀評價影響。





內在信念太強大，客觀評價完全影響唔到宿主，信念同評價失衡的話，嗰條友就係自大。

即係就算全世界都覺得你醜樣，但你仍然覺得自己好靚仔，就係自大。

內在信念唔夠強，客觀評價正面的話，會慢慢增強信念，當信念同評價達到平衡點，就會形成自信。

即係你覺得自己醜樣，但當聚集足夠嘅外人（假設佢地唔係夾埋呃尻你）評價你幾靚仔的話，「我係靚仔」嘅信念就會喺心中加強。

而內在信念又弱，客觀評價又負面的話，唔使問都知係自卑。





但有趣嘅係第二種情況，有種人就算累積咗好多外界嘅正面評價都好，內在信念仍然幾乎無跟住加強，維持喺自卑狀態。

阿俊就係依種人。