《純愛》平安夜的天使 (完): 第九十二章(曉桐章十一)

第九十二章(曉桐章十一)

「Lavina呀⋯」

嗰刻血淋淋嘅畫面依然喺我腦海裡面不斷重演，鮮紅嘅血漿彷佛帶住無可遏止嘅顫抖喺我腦海入面炸開一陣悶雷，我突然開始覺得腳軟無力⋯點解我會點解我會懷疑阿遊？如果我唔懷疑佢，佢就唔會為咗安慰我而去買花，就唔會出事⋯我好憎自己⋯點解⋯點解⋯

Priscilla：「妳無嘢吖嘛？」

我：「一日都係我唔好⋯如果唔係我，阿遊唔會出事⋯」





Priscilla輕輕歎咗一口氣，搭住我膊頭安慰我：「唔好怪自己啦⋯無人預計到會有意外⋯Marcus都唔會怪妳㗎⋯佢⋯」

呢個時候，一陣急促嘅腳步聲傳黎，醫生一邊戴手套，一邊快步行到我哋呢邊⋯

醫生：「傷者腦部有大量瘀血殘留係腦神經部分。手術有一定嘅風險，所以請你哋最好有定心理準備」講完就轉身行咗入手術室，手術室嘅大門「呯」一聲咁喺我面前閂埋，我望住手術室盞給紅燈，對手不自覺咁握緊，個心亦都越黎越沉重，我唔敢想像，如果佢真係有事⋯

我：「阿遊⋯」

Priscilla：「到底發生咗咩事呀？我見到你哋出咗去食飯，過咗一陣就收到電話話你哋入咗院⋯」





我：「一日都係我唔好⋯」我將意外發生嘅經過一五一十講晒俾佢知

Priscilla：「點解妳兩個可以一模一樣，對方一出事就喺到自責⋯當年阿遊又係咁，現加妳又咁⋯」

我：「講下，又好似係喎⋯」當年阿遊跳海嘅原因就係因為Kelsey⋯當年我就係安慰阿遊嗰個，而今次，佢都係想我開心返，先會想去買花俾我⋯所以，只要我開心返，係咪就會等到你岀黎？我等咗咁耐先同你一齊到，我哋仲有好多嘢未做過，好多地方未去過⋯你一定要無事岀返黎呀⋯

過咗七個鐘之後

手術燈熄滅，醫生亦走咗出黎同我哋講返個情況⋯





醫生：「請問妳哋係咪病人嘅家屬或親戚？」

我：「我係！」

醫生：「傷者嘅傷勢唔太樂觀，要睇佢頂唔頂到今晚⋯」醫生面無表情咁走咗，我望住佢遠去嘅背影，心裡面知道，阿遊只係佢千百個病人嘅其中一個，但係對我黎講，阿遊幾乎係我嘅全部，醫生可以毫無感覺，但係我做唔到⋯

阿遊俾護士推咗去病房，我即刻跟咗上前，Priscilla要返去睇鋪所以走先⋯

我好心痛⋯我慢慢坐喺床邊，捉住佢隻手，但係佢一啲反應都無⋯病房裡面，只有平穩咁響緊嘅維生指數機同起霧嘅氧氣罩可以證明，佢仲生存緊⋯但係我好怕唔知幾時，我哋嘅距離唔再係觸手可及，而係生與死嘅界線⋯

我握緊佢微冷嘅手，用盡全身嘅體溫俾溫暖佢：「阿遊⋯我哋咁難得先喺埋一齊，一切經歷咗咁多嘢，你話走就走⋯講好咗一齊照顧對方，一齊保護、呵護對方⋯」呢一刻嘅我已經淚流滿面，雖然應承咗你我會開心返，但係一諗到以後可能無得再同你一齊返工、一齊跑步、一齊食西多、一齊唱歌⋯我已經唔敢再諗落去，亦都講唔岀口，我心裡難以忍受嘅痛，只能用眼淚宣洩⋯

「阿遊，起身呀！」

「起身呀，唔好瞓呀！」





「阿遊⋯阿遊⋯」



「前生嘅思念，可否為今世寫下美滿嘅結局？」