今年暑假，我去咗“機場”打工: 四十七

我硬直的手，溫柔的掃掃Jessie背。

「冇事喇。。。唔駛驚。」



Jessie這才稍為冷靜。





「阿邦。。。多謝你。。。」

「唔駛。我。。。um。。。」

「咩呀？做乜。。。口窒窒嘅？」

「我。。。我唔會畀你有事。」





好啦，依句曖昧嘅說話講咗出口喇。。。



「嗯。。。但係我知道，你唔會永遠保護我。」

「um。。。」





Jessie佢稍為鬆開抱住我的雙手。



當我倆快要對望時。

佢又突然攬返住我。



「阿邦。」

「係！咩事？」

「你有冇紙巾呀？」



「吓？！」

「我而家。。。一定喊得好樣衰。。。」



原來Jessie，係驚畀我見到佢喊完個樣。

我從褲袋拎出一包Tempo，畀Jessie。



「唔該。。。」





Jessie一直抱住我，用紙巾抹臉。


抹咗一輪，Jessie鬆開攬住我的雙手。

我望住佢。



Jessie眼都哭紅了，仍在啜泣。





「Jessie。。。冇事喇。」

「嗯。。。」

「你。。。想去邊呀？」

「我唔想返屋企住，你可唔可以陪下我呀？」

「吓。。。但係。。。」



Jessie低下頭。

我再道。





「我打畀表哥，同佢講聲。」

Jessie望著我，令人疼惜的笑笑。




「喂。表哥，Jessie想我陪佢一陣。。。」

「吓。。。好呀，你陪下佢啦，我同John哥講聲。」

「嗯。。。唔該晒。」

「唔駛，你睇實Jessie喇。」

「嗯。」



我對Jessie說。

「搞掂。你想去邊？」

「我想去。。。」

「海旁？」



Jessie有點驚訝的望著我。

「你點知架？」

「哈哈。。。估下咋。。。咁行喇。」

「嗯。。。行喇。」



我走前，Jessie佢順勢咁，拖住我隻手。。。

我望望佢，她道。



「阿邦。。。我想你，做我一晚嘅男朋友，得唔得呀？」



Jessie淚眼未乾，楚楚的看著我。

我支吾以對。



「嗯。。。好呀。。。」



Jessie這才放心的笑。

見到佢笑返，我都放心啲。


我同Jessie拖住手行。

我發覺Jessie的手，比較寒冷。

令人想更加緊握，給她多一些溫暖。



「Jessie。。。點樣行去好？」

「嗯。。。你想呢？邦豬。。。」



突然間咁叫我，我愣住了的望住佢。

Jessie掩住口笑。



「哈哈。。。好核突呀，算啦，都係叫返你做阿邦啦。」

「哈。。。你冇啦啦咁叫我，我都有點嚇親。哈哈。。。」

「咁呀。。。你想我點叫你？？」

「um。。。你鍾意啦。。。」

「嘻嘻。。。我呀？我。。。鍾意你。。。」



Jessie向我笑笑。

我尷尬的另過頭。

我倆一會無話。



我隻手，不自覺的緊握住佢。

Jessie將另一隻手，撓埋我手臂。



「阿邦。」

「嗯？！」

「難得早收工，我地睇戲加食飯吖。」

「好。。。最緊要你鍾。。。意。」



我不好意思咁望佢。



只見Jessie莞爾一笑，然後撥撥髮陰，點頭。

「嗯嗯。。。行咯。」

「好。。。」


我倆拖住手，行去百老匯。

沿路條街好逼，好多人。

因此，Jessie將身體緊貼住我旁。

我都有點不好意思。。。



一直行，我發現有好多男人，不論年紀，都會將目光投放在Jessie身上。

而Jessie只係著簡單tee同牛仔7分褲，就已經畀人望得咁狼。

但老實講，如果我唔識Jessie，喺街我都會望佢。



行行下，有個阿叔突登走得好近，不懷好意的，徘徊在Jessie旁邊。

我見況，即刻用手搭住Jessie的肩，將她稍稍收擁入懷。

個阿叔瞄一瞄過來，再走開。



我同Jessie走到燈位。



「嘻嘻。。。阿邦。。。你好man！」

「吓。。。係咩？」



Jessie將頭，倒入我懷中。

我心頭一暖，暗暗的笑了出來。



Jessie突然向上望望我。

我即刻收起笑容。




Jessie將手，貼住我胸，道。

「傻傻地。。。」


去到百老匯，Jessie話想睇鬼片。


本身，我對依啲妖言惑眾，又增加心臟負擔嘅電影冇乜興趣。

但為咗唔好喺Jessie面前失威，我決定頂硬上。



場次在一個鐘頭後，時間正好夠我倆到附近食下野。




我同Jessie，拖住手行咗去附近一間，唔太貴嘅日本餐廳。

我倆對住坐。




Jessie點野食嘅時候，我望住佢。

原來，咁樣同Jessie出街，感覺好幸福。




「阿邦，你想食咩呀？」

「我。。。想食三文魚。」

「好。。。」



Jessie喺點餐紙上挑選一輪，再畀我簡單點選下。




交咗紙後，Jessie開心的擦掌。

見到佢冇晒事，我都安樂晒。


壽司黎到後，Jessie用筷子，將件三文魚壽司掉轉，用魚身面沾醬油。

我不其然問。


「咦，Jessie呀，你鍾意咁食壽司嘅咩？」

「哦。。。冇呀，我之前聽人講係咁食，咪試下囉，跟住就慣咗係咁食喇。」



Jessie把壽司放進口中，滿足的嘴嚼。

我有點不解，道。



「其實就咁夾咪得囉。」

嘴嚼中的Jessie道。



「唔。。。但聽人講呢，就咁夾，啲飯沾醬油嘅話，會易啲散。」

「我就唔會啦！」

「係咪架。。。」



唔知點解，一畀Jessie看輕。。。

我嘅好勝心，就會突然爆發！



「哼！如果我夾依件壽司！啲飯冇散，咁點先？！」

「哈哈。。。傻仔，咁你咪叻囉！」

「唔得，如果我夾到，你要畀一個願望我！敢唔敢賭吖？！」



Jessie望住我笑笑，感覺好似望住個細佬咁。




「哈哈。。。好呀好呀。。。」

「嗯！係架喇！」

「嗯！應承你！」

「好！！！」

「阿邦呀，如果你真係夾到，我應承多你一樣野。。。」

「應承我咩呀？」

「嘻嘻。。。等你夾到先話你知！」




Jessie講得出嘅，應該係個大Bonus！更加要夾到！

我要加油！！！！！！！


我拎起筷子。

此刻我猶如，面臨敵人嘅士兵咁，聚精會神！

一步一步，向住件三文魚壽司進發。



一雙筷子，完美的降落到，壽司兩邊的中部。

小心翼翼的將壽司夾起之後，慢慢移向醬油。



我將壽司底部，輕點在醬油之上。

若果，滲入過多醬油，會破壞飯團的結構，導致崩解潰散！

所以一定要好好掌握，沾醬油的火侯！



好！夠鐘！！起！！！



黎到最重要的時間！

勝負就睇依一刻！！！



我眼角瞄到，Jessie都緊張的，握起雙拳，細細聲為我加油。

這次絕對只可成功！不許失敗！！！


壽司在醬油碟上的空中。

我憑藉筷子夾住壽司的握感，感受到。。。



這次醬油滲入飯團的速度，比我想像中快。。。

唉。。。



壽司的飯團，有一半墜落醬油碟。




Jessie著緊的。

「哎呀。。。」

「唉。。。」



我死死氣，將那不完整的壽司，往嘴裡送，再用力的嘴嚼。

Jessie都洩氣的道。



「哎呀。。。差少少咋。」

「我覺得依度啲壽司，個飯握得唔夠實，先會咁。」

「嘻嘻。。。唔好賴啦你！」

「真架，平時明明冇事！」

「係喇係喇！我信你喇！」


Jessie笑住咁，夾另一件壽司。

我醒起啱先Jessie講嘅說話。



「係呢，Jessie呀，你啱啱話，如果我夾到，你就應承我咩？」

「你都夾唔到！唔話你知！」

「吓。。。講啦。」

「唔講呀。你呀，食埋啲飯先啦。」

「吓。。。啲飯好咸。。。」



Jessie用筷子，夾起我醬油碟內的飯粒吃。

「嗯。。。唔會呀，都好食呀。」

「係咩。。。」



我亦用筷子夾。



我倆夾夾下，互相打趣的，爭脫著碟中的飯粒。。。

哈哈。。。成餐飯，食得好開心。


食完飯後，我同Jessie去咗7仔買野飲。

再用我背包，“走私”啲野飲入場。



入場之後。

套戲一開始，講一班角色入去棄置學校。

嘩，一黎就咁得人驚。。。



好彩！睇鬼片黎講，我都略有心得！

明明好淆底，但又唔想彎到成隻蝦米咁，畀身邊嘅人取笑？



可以挺起胸膛，坐得直一直咁，對住個螢幕！

然後。。。合埋對眼！



咁樣最多，都係畀聲嚇啫！

傷害起碼減少7成！





成套戲，我有4分之3嘅時間，係合埋對眼！

而Jessie佢幾驚，不停挨向我，又撓住我手。

哈哈。。。佢得閒驚，都唔得閒望我有冇睇到啦！

我簡直係天才！




當套戲去到尾聲。。。

多數都會臨尾嚇多野！

我再次合埋眼咁睇。。。



點知，我一直合埋眼，直到聽到音樂，先知套戲原來已經完咗。



我張開眼，Jessie佢瞇住眼望我，問。

「點解你冇打開眼嘅？你成套戲都合埋眼架？」

「哈哈。。。冇呀。」



我伸個賴腰，再道。

「咁套戲一啲都唔得人驚，鬼咁悶，我咪合埋眼養下神囉。」

「哦！實係咁啦！」

「嘻嘻。。。走喇走喇。唔好阻人清潔。」

「哼！」



離場時，Jessie撓住我手臂。


出到戲院。

撓住我手的Jessie，道。



「嘻嘻。。。啱啱睇戲你養神，而家夠晒精神啦，我地去行下海旁咯。」

Jessie得戚咁笑。



哎呀。。。咁寸？！

有仇不報非君子，整古下佢先！



我突發，湊到Jessie耳邊嚇佢。



「喂呀！」

Jessie即刻係咁用手掌拍打我。



「唔準嚇我呀！！！」

「哈哈。。。唔好意思，玩下咋玩下咋。」




我拖返住Jessie隻手，fing fing下咁，氹返佢。

Jessie這才消下氣，笑瞇瞇咁，側過臉去。



我望住拖Jessie的手。

發覺。。。我拖佢嘅動作，非常自然。



我才醒起，我係小嵐男朋友黎架！

我究竟喺度做緊乜。。。

唉。。。




Jessie見我冇晒聲氣，望向我問。




「做乜唔出聲呀？我冇嬲你喇！傻仔！」

「吓。。。哈哈。。。」

「做咩事呀？」

「冇。。。冇事。」





我同Jessie行到去，好長嘅扶手電梯。

Jessie在前，企落我一級。




我望望隔籬條電梯。

我見到。。。。。


我竟然見返，之前我同小嵐，搭電梯時見到嗰對情侶。

嗰對纏綿嘅情侶，又再旁若無人咁，攬住打車輪。


點解次次都撞到佢地，我不禁懷疑。

佢兩個。。。係駐場嘅行為藝術家。




Jessie向上望我，然後循我目光，望向嗰對情侶。



Jessie細聲的對我說。

「喂。。。做乜望得咁實嘅？你都想試下？」

「唔。。。不了，咁樣錫法。。。簡直係世風日下，道德淪。。。」



Jessie突然攬住咗我。

由於Jessie企落我一級。她攬住我，她側耳剛好貼住我胸膛。

Jessie突然的攻勢，令我一時間，唔知點算。



然後，她仰望我。



「嘻嘻。。。我地都試下吖。」

「吓。。。好似。。。唔係咁好。。。」




Jessie有如小惡魔般，望著我笑一笑。

然後，她用手按著我後腦勺，將我按向她。




還未來得及反應。

我與Jessie的嘴唇，已印在一起。。。


我近距離的。。。

感受到Jessie的鼻息，和嘴唇綿綿的觸感。



雖然很吸引，但理想告訴我，要快些抽離！


我試圖想縮開。。。

但Jessie按在我後腦勺的手，用力不肯讓我離去。



雙唇仍印在一起。

她的雙眼，微彎成一雙笑眼。



「唔唔。。。唔好啦。。。」

我鳴鳴聲的求饒。



怎料Jessie她，竟趁機將舌頭，伸進我嘴裡面。



始料未及的暖流，闖進了，我敏感的口腔。




我皺起眉頭。



然後。。。

我不能自控的，用舌頭回應她的邀舞。


舌頭，與口腔的觸感，使我和Jessie愈漸陶醉。

我倆都微閉起眼。

一手攬住對方的腰，一手按著對方的後腦勺。



很快，我倆就吻得愈發激烈，呼吸都快跟不上節奏。



幸好我要微微彎身，親吻Jessie。

不然，早就梆起的巨龍，難免會頂到Jessie吧。




電梯快將到達地面。

我和Jessie好不容易，抽離開舌尖上的纏綿。

我倆相望面而笑。



腳踏回地面後，Jessie望向電梯上方，我亦望去。

原來Jessie正望住，那對情侶。



他們向我和Jessie，點頭拍掌。

對我和Jessie的投入度，表示敬佩。



而Jessie就向他們微微彎身，擺出一個致謝的敬禮。


臨離去時，我們還互相揮手告別。


Jessie拖住我手，道。



「哈哈。。。好搞笑呀。。。」

「嗯！係囉。。。唔知點解呢，我有種嬴咗比賽嘅感覺。哈哈。。。」




Jessie聽到後，皺著眉笑笑。

「哈哈。。。聽你咁講，我都好似有依種感覺！哈哈。。。啱先條電梯咁長，應該搞返個情侶錫錫比賽！」


我對這個奇想，有些不敢苟同。

「咩呀。。。」



Jessie笑著續道。

「哈哈，你唔覺得好得意咩，兩邊電梯都企滿情侶，喺度攬住錫。個畫面呀，一定好震撼啫！」

「唔。。。我幾鍾意你嘅zero。。。」

「到時唔知有冇人參加呢。。。」



Jessie將手指，點著下巴想，彷彿真的有這比賽的可能。

我再道。



「如果個活動搞得成，實會畀人告！」

「吓？點解呀？錫咋嘛，唔算行為不檢啩。。。」

「唔係告行為不檢，係告虐畜呀。。。」

「吓？點會關虐畜事？」

「依個活動，咁樣虐待啲單身狗，仲唔駛畀人告咩？」

「吓？單身。。。狗？哈哈。。。又係喎。」

Jessie畀我逗得，笑嘻嘻的。





我倆再次走到電梯。

Jessie同樣企落我一級。

然後轉過身來，望向我。



Jessie瞇起笑眼，等待著我。。。

我望望四周，向她彎下身。




我倆對視笑笑。

然後，嘴唇再次對上。。。