隔離屋懷疑住左個痴線佬，我裝左個監視器發現佢竟然...: 14. 化敵為友
...........
呢度.....邊度黎......好黑......
黑到睇唔到野......
我發現...隻手已經郁得翻，我伸手向外周圍摸，摸到自己訓左係同之前唔同既病床上面，旁邊有個櫃，上面好似放住水壼形既物體...
「有冇人....可以開燈？」我一路摸黑想行落床開燈，但隻腳既骨折同小腿傷重未好翻，一落地就跌個踉蹌咁趴左落地下，聽到一陣好嘈吵既跌野聲，應該係我跌一跌整散左成車野 。
我繼續向前爬，四圍都係障礙物...燈制究竟係邊...？
「刀仔！lucy！你地係唔係度？」我真係好不安...點解呢度會黑到咁....仲感受到有野曬住我個身....好熱...
「咔嚓。」
房門再次被打開，我聽到有腳步聲慢慢行近我，然後我感覺到自己比人一下抱起左放翻上床。
「晨早流流就嘈生哂..」
把聲....係lucius.....
我即刻失哂控咁尖叫，再發狂咁想走，又一下跌翻落地下，掙扎住咁爬去前面..
「你想點呀！捉我黎呢度！又唔開燈！有咩目的？」我連珠轟發咁一炮過問佢，點解我會係度？！今次佢又想點！？
lucius發岀一口嘆氣聲，又一下抱起我放翻我落床。
「慳翻啖氣啦，你望下你而家個款，又唔睇得又唔用得，又殘又盲，而家捉你翻黎有鬼價值咩？
我以為我已經夠慘...見到你真係即刻覺得好勵志，原來有人慘過我咁多。」
lucius坐左係我隔離，一邊幫我換紗布一邊獨自歎氣。
未住.....又殘又...盲？
我盲左...？我...盲左？
我摸摸自己雙眼......發現.....
只係淨翻兩個黑洞......
「點解會咁.....點解....」點解我對眼會冇左....我係咪...永遠都要活係黑暗之中....
一時間真係好難接受到呢個事實......
我忍唔住失聲痛哭，lucius見狀即刻拎紙巾幫我抹翻啲鼻涕眼淚。
「你做咩要救我？我地之前....都算係敵人黎..係咪你同mia又有咩陰謀？
我而家已經一無所有，我冇野好輸，大不了同你死過。」我始終，係人地口中聽過lucius太多衰野，上次kelvin佢又差啲搞到我毀約，要我相信佢真心想幫我，可以話係無可能。
「因為我同你一樣，同是天涯羅樂琳。我已經一無所有。想害你都害唔到。而家淨翻既，就係呢間之前買落既獨立小屋，之前諗住買黎有病果陣係度休養，估唔到而家變左唯一既淒身之所。」
lucius話語中帶點無奈既意味...佢如果要害我...就應該唔會救翻我。而且我而家仲落魄過佢，真係完全冇利用價值可言。
「你....可唔可以話我知，點解？我知我已經冇任何利用價值。」
「我都唔知...可能覺得你同我一樣，一夜之間變得一無所有。所以，就想幫你。都算係幫自己，落魄時望住你幾慘，就會感覺都我失去既係幾咁微不足度。
我同你一樣，比mia佢搶哂所有野。我既所有物業，資產，甚至我所有簽落黎既合約..全部都比佢搶走哂。連我既惡魔能力，佢都一併奪走。唯一慶幸既，就係呢間僥倖未比佢發現既小屋，同有陪住我落魄既你。」
mia佢....究竟有咩目的？點解佢要偷走我對眼？
「但你係罪有應得！唔係你擅自修改mia記憶，拆散佢同lucy，平時又虐打佢，佢會咁報復你？」
lucius聽到，似乎好震驚，佢一頭霧水咁同我講:
「拿，死貓雖然我食唔少，但我從來冇修改過mia記憶，更加冇打過佢。年幾前係佢自己黎揾我話我細佬成日虐打佢，又四圍偷食，仲求我收留佢。」
唔係掛.....
唔通.....呢兩個男人一直俾佢玩弄於股掌之中？....
「你意思係...全部都係mia既大話？當初係佢主動離開lucy？」如果係真.....我咪一直信錯哂人.....
「mia佢唔係普通人黎，佢係魔界另一個貴族所生岀黎既公主。佢既技能就係完美既外表同高度既智慧，所以佢由細到大係魔界都岀類拔萃，係所有男人既夢中情人。
果陣佢成日走黎同我同lucifer玩，慢慢我地三個越黎越close，無論做咩事都會一齊。
雖然我果陣都鍾意mia，但我知我細佬更加鍾意佢。所以，我將mia讓比佢，更加撮合左佢地係埋一齊。
之後我地三個係成人禮當日就一齊去人間，mia同我細佬合租一齊住，我就自己揾地方住。本來我一直都有同細佬聯絡，得閒接濟下佢，畢竟個傻仔係我由細睇到大。
後來，我係人間發展得越黎越好，同時都越黎越忙，慢慢就同我細佬就斷左聯絡。
大概過左一年左右..原本都冇咩聯絡既mia，竟然主動揾翻我，仲約我岀黎。我叫佢叫埋細佬岀，佢就死都唔肯，要單獨約我岀黎。
一岀到黎就不停咁喊，向我吐苦話我細佬對佢點唔好，仲話想我收留佢。」
聽到呢到，我忍唔住問:「你唔係有讀取記憶既能力咩？點解唔用？」
佢苦笑左一聲，「因為我地三個係朋友。我地曾經應承過大家，唔可以係對方身上用咒。所以，當時佢講咩我都信。
之後佢揾我既次數越黎越頻密，但每一次我都拒絕收留佢既要求，畢竟佢係我細佬既女人，佢倆個既野我唔想介入太多。而且mia一直要求我要保密單獨見面既事。佢話，lucifer知道佢單獨見我，實會誤會以為佢勾佬，然後又會虐打佢。而且每次見親佢，身上總會岀現新既傷痕。
我曾經好多次想去揾細佬攤牌，個mia話唔想冇左佢地之間既感情，又話唔想因爲佢破壞我地既兄弟情。
每次聽到我個心都好嬲....當時我覺得，mia佢咁善良.....但我細佬竟然咁對佢.....
直到半年前左右........
同時係所有野既轉捩點......
當時我係屋企處理緊公事既時候，mia佢......拎住lucifer雙眼黎我屋企揾我.......」
聽到呢度...我個心已經涼左一截...
mia佢...係自己決定攞走lucy雙眼，令佢痛不欲生。但又巧妙咁，將責任全數推卻比lucius。
lucius真係食左好大隻死貓。
「我見到lucifer對眼，我都呆左....點解我細佬對眼會係佢手上...
要偷走惡魔既能力絕對唔容易，除非成功獲得惡魔絕對既信任，先可以有機會落手。一個惡魔失去能力，等同置佢於死地一樣....
當時mia見到我，就衝過黎攬住我，成隻受驚既小羊一樣，非常可憐，激發左我既保護慾。佢露岀身上多處傷口，每
一條血紅既傷疤都痛在我心。
佢一路喊，一路同我講當時lucifer點樣虐打完佢之後，重因為眼紅我既成就，所以將怒氣發洩係佢身，話佢係掃巴星
...仲話....細佬唔顧佢意願..強姦左佢....所以佢先一下打暈左lucifer，再偷左佢雙眼，話唔想再有下一個女人比佢魅魊到，成為佢既替身...」
我聽完嬲到硬哂，個拳頭。點解啲男人咁撚蠢！人地搖下對波流幾滴眼淚就咩都信哂！重有呀，拍得拖搞野都算強奸？咩logic黎，條女睇得台劇多上腦？！
「當時我見到佢為左lucifer受左咁多委屈，我完全喪失左理智。當時佢話，無論如何都要阻止我比lucifer登上皇位，佢一路喊到腫哂咁求我...我實在....呑唔到呢啖氣，就應承左佢。」
原來件事既真相係咁.......
「之後你地就合作一齊上位，重處處為難我同lucy..因為你應承佢唔比lucy登上皇位..唔怪得你想從我身上入手，唔比任何人幫佢....」我開始理解之前lucius為難我既動機。
如果lucius既故事係真....咁mia點解又會背叛翻lucius，重新去揾翻lucy....我真係猜唔透佢有咩目的..
「都係我...其實我冇lucifer咁易信人。當時我都一直淨係比個地方佢住，再安排下啲瑣事比佢做。但佢執意要用細佬隻眼，話幫我收集靈魂。我一直想佢過得舒服啲，想比佢換翻佢自己隻眼舒舒服服過下少奶奶生活。
所以上次我先同你開條件想比翻隻眼細佬，畢竟，我知魔鬼無左能力係好痛苦...lucifer已經經歷左一段時間既折磨，都算懲罰夠我細佬...
再加上我當時收集既靈魂數量已經超越左細佬幾倍，皇位的確已經十拿九穩....
點知上次你簽約，mia就衝入黎趕走你，堅決話唔讓對眼岀去，情緒重好激動。所以當時我就廢是刺激佢，打算遲下再睇下點做。
可惜，我聰明一世，糊塗一時。
一直我都同mia保持朋友既距離...始終，佢係我細佬既女人，無論如何我都唔想打佢主意。
但個幾月前.....佢竟然主動咁攬住我，向我表白.....果下我的確係心動左，10幾年黎，我既目光都冇離開過佢....
但同時因爲咁...我比佢魅魊左....結果落得如斯田地。」
聽完都有啲為lucius難過，其實佢個心好錫佢細佬...但同時都好愛mia。周旋係呢段三角關係入面，佢既處境應該好痛苦。
「但係...上次lucy比聖水整到就死，你點解見死不救，重比份合約我？」
佢打開櫃桶拎左啲野放係我手上...
我摸到....係惡魔復原果實....
「我認，當時我認為重有10幾日，想拖下等你應承我幫我。但之後就到期限你都未揾我，我已經諗住幫mia還原翻對眼，再拎自己啲血同果實去救佢。
點知...我點估到你又會真係傻到為lucifer摘果實...重要搞到自己咁...老實講，我開始幾欣賞你。
後來我想救細佬既時候，mia就已經搶走哂我既能力。」
呢個哥哥真係......
明明着緊個細佬...又係度扮唔緊...