隔離屋懷疑住左個痴線佬，我裝左個監視器發現佢竟然...: 10. 金鍾巴打
由於事態緊急，當日我就已經即刻約左佢岀黎去金鐘一間m記傾。
好快我就去到m記門口，一入到去就見到有個男人我招手。個男人目測160左右，下下樣，毒毒地咁，有啲似那年十八果個男仔，仲束腰加皮帶，望落都算同我想像既巴打一樣既...
我一坐埋去，佢已經好熱情咁自我介紹，行為完全同佢個毒外表不符。
「我叫刀仔，絲打點稱呼？」
「林美玉。刀仔，我真係好急，不如我地開門見山啦，你係咪知道惡魔飲左聖水會有咩後果？」
刀仔佢見到我個驚青樣，就慌忙係
佢個kzone書包入面拎左本筆記岀黎。
「我家族好多代之前，受過惡魔既幫助，之後就開始着手研究關於惡魔既資料。到我呢一代呢個傳統依然維持落去，所以呢本筆記可以話係經歷幾代人傳落黎，非常珍貴。」
我打開筆記，發現入面真係有幾手唔同既字跡，而且仲符有好多剪報同好詳細既解釋，例如佢地既生活習慣，落人間既目的，身體特徵咁。
不過...感覺上好似有好大岀入喎...本野話惡魔有住獠牙，雙眼通紅，又咩強姦豬乸，又推呀婆落海，可信度似乎有待確認..
「你睇緊呢part係我寫嫁...現世通常都咁咁記載，我都係圖書館research抄翻黎...我諗應該我上幾代寫既會準啲既..」佢苦笑左下，揭翻前啲比我睇。
「惡魔最忌: 經過祝福既聖水
只要輕灑係佢地既身上，惡魔能力將會被壓止，而且變得虛弱。」
唔係掛...咁啪哂成支會點....
刀仔望見我睇緊呢頁之後，佢過黎望下再向我講:「之前我家族曾經救過惡魔，所以先得翻佢地報恩幫我地屋企渡過難關。聽講果陣隻魔鬼比聖水灑到....係我屋企人肯比血佢救翻佢..」之後佢又揭後兩頁比我睇。
「惡魔原來有強大靈力，如被聖水稍為沾到，只會喪失能力一會便回復正常。
如被大量聖水沾到，或誤飲聖水，請必須留意以下數項:
1. 確保惡魔有足夠力量復原，否則後患無窮
2. 注意手上血管顏色，如全身血管變綠，代表惡魔將永久失去能力
3. 如14天內無法救醒惡魔，惡魔將會死亡
唔係掛.....搞到死咁大劑......
而家既佢，擺明冇足夠力量去令自己復原...
解救方法:
需令惡魔服下以下藥方:
人血
惡魔復原果實
惡魔鮮血
必需齊集三個配方，缺一不可
分量呢？！邊度揾果實比佢呀？
我發左狂咁問刀仔，點知佢話係上一代傳落黎，都唔係太清楚。
死啦...呢啲配方除左人血之外，其他都唔知點拎翻黎...我淨一諗到既人....
淨翻佢阿哥。
呢個....睇怕係唯一辦法。
今次...係我第二次到lucius屋企。同上次一樣，佢一樣開左支82年既紅酒，風度翩翩咁邀請我坐低。
佢行過黎輕輕搭左我膊頭一下，然後笑笑口同我講,
「原來係lucifer岀左事...你過黎係想問我拎翻佢雙眼，姐係佢力量來源係咪？」
「重有惡魔復原果實....同...你既血.....你有咩條件？我會盡我一切應承你。」我咬咬呀，同佢坦白今日黎既目的。
lucius慢慢坐翻底，微笑咁望住我:「想要齊呢三樣野...你要付出好大代價，值得？」
「值唔值得由我決定。你講啦，係咪簽翻上次份約就得？」我屏住呼吸..等待佢既回應。
「are you crazy？你今次要咁多野，上次份約邊夠換？呢三樣野我比你唔係問題，不過我有個條件...
1. 我要你個靈魂作交換
2. 我要你對眼交換lucifer對眼
3. 將lucifer之前簽左既所有合約全部拎比我
無我既幫助，佢必死無疑。」
.......
要用我雙眼，我既靈魂.....去換翻lucy條命？
呢個代價會唔會太大......
「唔緊要，你自己慢慢諗下。到最後，你都係要揾翻我。」
我一路翻去既路上..都諗緊lucius既說話。
究竟....值唔值得......
又應該點衡量.....
翻到屋企，已經就凌晨一點。
我都係第一時間就去望下lucy，發現佢血管又多左一部分變左色，而且呼吸比琴日又微弱左小小..
我一邊輕撫佢額頭，一邊望住佢痛苦既表情.....lucy佢雖然係魔鬼，但於我而言，佢絕對係我生命中既天使。係佢將我係過往痛苦既回憶裏面拉岀.....係佢用弱小既身軀將我係安泰入面救岀...佢曾經話過..我係佢雙眼，我地兩個人，缺一不可。
係呢段日子，我可以感受到，lucy只係外表冷漠，但其實心底裏藏住一份柔情。
唉....我應該點揀...
「叮！」望一望電話，係刀仔。佢問我件事搞成點。
睇黎，我諗我要揾刀仔幫手，商量下應該點做好。
第二朝，我向公司請左大假，johnny呢個上司算係好友，畢竟佢老婆高ling都係我幫佢追翻黎。而且平事做野我都落力爽手，佢知我有事，都冇再多問就批左我假。
我一大早就約左刀仔係茶記等，佢都非常準時岀現。真係好好彩比我係人生咁無助既時刻遇見佢，件事搞得掂我一定會捐廿蚊比連尼住支持下佢。
「唔該哂你呀刀仔...成日要你哂時間黎煩我件事...」
刀仔反而安慰翻我，話佢放緊sem break唔洗擔心佢。佢都算係我而家唯一可以商量呢件事既人....
我將琴日談判既事同條件一五一十同刀仔講翻，點知佢越聽越火滾,
「屌！根本獅子開大口，咁撚苛刻既條件比得岀，你應承佢就真係中伏啦！」佢一路講一路嬲到拍枱，搞到我都有啲唔好意思。
「我都知...但我真係冇哂辦法...」
「講真，lucifer如果知道條命係咁樣換翻黎既話，到時佢重要冇哂啲合約，分分鍾重痛苦過而家呀。我唔信我地咩辦法都冇...我同你兩個合而為一水乳交融既話，一定搞得掂！」
咩撚野水乳交融？！條友中文u嫁？
隔離兩枱聽到重都係度陰陰嘴笑..屌...
「你唔介意既話，我地可以試下係lucifer屋企着手，睇下有冇咩線索救到佢。」
我點頭表示認同，無論如何，我都希望盡力揾到其他辦法救到佢..