隔離屋懷疑住左個痴線佬，我裝左個監視器發現佢竟然...: 9. 致命聖水

一開門，劉牧師就好熱情咁係咁摸我隻手，問我做咩咁耐唔翻教會。

實際既心聲，就係:哇屌...好想撕開條女條褲，再一下一下插死佢！我想搞大佢個肚呀！！

我即刻縮一縮！牧師你台灣人黎嫁...？

「佢係....」我細佬見到lucy眉頭深鎖咁望住佢，睇黎佢應該記唔起上次見到佢發生既事...

我求其話係鄰居過黎借野，lucy都好識做咁向住我地點點頭。



正當lucy諗住走既時候，劉牧師拉住佢:「既然各位弟兄姊妹有緣係度見面，一定會上帝既安排。既然係咁，不如一齊聽下上帝對我地人類既愛同偉大好冇！」

Lucy不但冇反感，仲幾感興趣咁坐翻係度聽。

劉牧師開始一邊讀經文，一邊向lucy解說, 「當年上帝賜予亞伯拉罕一個兒子，但又要求佢殺死佢既兒子，目的只係測試下亞伯拉罕對上帝既信心！」

點知lucy開始係度偷笑...慢慢重笑到成個人震哂，「果陣佢同我老豆輸賭個傻仔係咪真係癲到會殺佢個仔，點知佢真係走去綁佢個仔上山。諗起上帝果次死狗咁樣就好笑...」

屌....原來係咁嫁？！



劉牧師明顯比lucy既舉動嚇親,「呢位弟兄，所有野上帝早有預備，胡言亂語上帝係唔允許嫁。
重有，上帝安排耶穌，用五餅二魚填飽左五千人個肚既神蹟就係最有名嫁啦。」

lucy今次笑到眼淚都標埋，「細個我百厭玩死哂我老豆魚池啲魚，阿穌佢重好笑，佢唔鍾意食餅，次次早餐唔食都收埋一塊落罐度廢是比佢老豆鬧，收收下收左成幾千塊餅。呢個方法係我細個同佢度岀黎清左啲過期野食佢，估唔到變撚左神蹟。」

劉牧師聽到lucy大笑，明顯開始面露不悅，佢係袋入面拎左個樽岀黎遞比lucy,「弟兄既心入面實在對上帝有太多疑惑，不過只要你肯認錯，上帝一定會接納你。呢支係教堂既聖水，希望可以幫到弟兄你洗滌心靈，遠離魔鬼既誘惑。」

之後佢就唔太高興咁執野準備離開，我細佬放低手上買俾我既生活用品之後，就跟住牧師一齊走左。

「lucy你咁玩牧師小心佢秋後算帳，不過你唔講我都唔知原來係咁...」我一邊放低細佬買比我既野飲係枱面，一邊將啲生果放雪櫃。



「咔！」

死lucy，又係度偷我啲野飲。

「喂，每飲一支比翻錢我呀！」

屌，重要唔應機。

「喂！你...」

我擰轉頭....見到....

.......lucy佢....



跌左落地下，全身冇力咁趴左係度.....

手上拎住劉牧師支聖水......

我急忙衝去扶起lucy，佢捉實我隻手，好艱難咁想發聲，但未講到一個字佢就暈左，無論我點拍佢都再冇反應。

而且，我發現佢塊面...開始變得比之前更蒼白...我拎起佢隻手，發現佢原本橙啡色既血管....有大根1cm既位置變左淺綠色.....

我即刻同佢做心外壓，但係都完全冇用...

死啦.....點算呀.....果支咩水黎嫁飲到佢咁....

又唔可以送佢去醫院....

我可以點救佢....點做好...？



未住...冷靜啲先...

可能一陣姐...或者佢休息下就冇事呢...

於是我抱起佢放係我張床度比佢好好休息，我自己就拿拿林上網揾下會唔會有人知點做，順手開個突發po問下巴打。

之後我係佢床邊一直觀察佢情況，發現佢開始不停有冷汗岀，而且身體會定期自己抽搐，但依然係冇知覺。我成晚就不停幫佢抹汗，又揾張被包住佢驚佢冷親。到凌晨四點幾果陣，太攰我就趴係佢度訓着左....

***************************************

第二朝訓醒，已經係中午12點幾事，公司打成幾十個電話比我，但我第一時間係睇下lucy點先...

仆街...佢成塊面同嘴唇青哂...而且....



佢條血管又有多1cm左右變左淺綠色....睇怕，今次真係好麻煩..

點算呀.....

我完全唔知應該揾邊個可以幫到我...

人生都未試過咁無助...

我捉住lucy冰冷既手...望住佢越黎越差既面色.......忍唔住..喊左岀黎...

都係我....冇好好睇住你....而家先會咁...係我害死你嫁.....

..唔得...而家唔係自責既時候...

林美玉你冷靜啲先，喊係解決唔到問題..



我即刻上翻琴晚我開個post睇下有冇巴打有辦法..

一打開，屌你老母！

第二個留言又係啲咩暈埋右未，好撚好笑呀屌你老母！望下個user name，妖又係肥c大隻，呢一刻我真真正正感受到完全封鎖既功能重偉大過copy & paste。

之後我就碌左幾頁，都係啲垃圾comment.....

.....
咦？！

我碌到...有個叫阿媽係女人既巴打留左個tg，話可以幫到我。

雖然唔知真定假，不過而家已經冇得揀...望住lucy每況愈下既身體....

我決定要約個巴打岀黎傾下。