【痴線佬FF故】媽呀！我隻貓變左個人呀！: 1

有一日，我發左個好奇怪既夢，訓醒我竟然揸住一包雞肉貓零食。 

依一個夢好奇怪亦都好真實，但夢入面既內容我已經唔太記得，咁係吖嘛，有邊個會記得晒自己每日發咩夢，有既話我就唔洗睇電視啦，日日等訓教睇自己既夢真係仲好睇過愛回家啦。 

不過講返轉頭，我手依包零食係咩一回事？點解我會揸住包咁既野訓教？ 

係我拎起左包野研究既時候，轉個頭已經有隻白色毛茸茸既物體走左上我張床，如果佢唔係識瞬間轉移就肯定跑得快過保特，佢既路徑快到聽唔到睇唔到，特別係平時行入廚房轉個身已經有隻貓係背後出現，心血少啲都會比佢嚇死，好彩我已經被訓練到比人嚇親都會即刻冷靜落黎。 

唉，依隻野又扭零食，佢依個身型如果對返做人既身型冇欣宜咁大隻都應該有細細粒咁肥。 





「食啦，肥死你呀死肥臭，一日到黑掛住食，又冇建樹日日係屋企做大懶蟲。」 

我每日都會鬧我隻貓，不過與其話鬧倒不如話係愛的問候，我比左一粒佢食之後我就收返埋落密實盒，事關依隻野為左食真係能人所不能，收埋係櫃筒依啲簡直係侮辱佢既智慧，三兩下就成包拎返出黎食。 

餵完佢我就起身刷牙洗面換衫去買早餐。 星期日既大家樂總係特別多人，又話快餐店我買個外賣足足搞左成半個鐘，咁搞法不如改改market做法國菜啦，一食就食幾個鐘夠晒生活態度。 

吖，我唔記得介紹下添，我係邊個就唔重要因為依篇文既主角都唔係我，而係我果兩隻貓，一隻白雪雪肥嘟嘟但個鼻有粒墨既就叫臭妹，另一隻啡色但開始瘦到似山區兒童既就叫豆苗，

有人養貓既原因佢地好可愛望住佢地好減壓，而我就養左貓之後開始思考，到底我養緊既係啲咩生物？ 





貓既可愛呢？冇。 

貓既優雅體態？更加冇。 

每一日就好似睇住兩個潑婦鬧交扯頭髮打交，如果當係MMA（綜合格鬥）黎睇既話，我諗都相當精采。 

作為一個貓奴（雖然我唔認同）返屋企既第一時間就緊係搵貓，每次都要摷勻屋企既窿窿罅罅先搵到佢地，今日亦都一樣，一返到屋企放低我份早餐就第一時間去搵貓。

 一入到我間房，我眼前出現既野嚇到我反應唔黎，呆左係原地。