要生存，就要殺死自己: 第九話
【第九話】
我關上手機，輕輕掉落張床到。我慢慢坐係床邊，岩岩件事黎得太快，一時之間消化唔到，個腦仍然一片空白，房間內只剩下芷君既嗚咽聲。
『咚咚咚咚!咚咚咚咚!』
突然數下敲門聲嚇到我同芷君個心離左一離，我地不約而同地望住道房門，經歷過岩岩咁緊張心寒既氣氛，加上時間已經去到凌晨三點幾，依家任何聲音任何動作都嚇到我地唔知點算咁，面對有人敲門更加唔知比咩反應。
『你地咁夜係到嘈咩呀? 仲唔訓?』門外傳黎阿媽把聲。
芷君聽到阿媽把聲之後即刻放鬆哂，正想開門比阿媽入黎個陣，我腦海突然靈光一閃，即刻捉住芷君隻手，唔比佢開門。芷君又一次比我突如其來既動作嚇親，即刻想喊。我將佢拉埋我身邊，然後細細說:『等我去開，企我後面。』
芷君帶住嗚咽既聲音，想喊又未喊既語氣問我:『阿哥呀......你做咩呀......出面個個係阿媽黎架!』
『咚咚咚咚!咚咚咚咚!』
又傳來數下敲門聲，接著門外阿媽又叫著:『開門啦! 做咩事呀!』
我不斷係房到搵一樣野，但搵既時間愈長，門外既敲門聲次數就愈多，我急得推倒哂桌上既文件同拉開所有抽屜出黎搵。
而芷君見到我好似癲左咁樣，依一刻終於忍唔住喊起上黎，不斷重覆叫住同一句:『阿哥呀......你做咩呀.....』
究竟個樣野去左邊呀!我明明記得放左係房到!
『咚咚咚咚!咚咚咚咚!』，『咚咚咚咚!咚咚咚咚!』
門外既敲門聲愈黎愈激烈，除左阿媽把聲之外，今次連阿爸把聲都出現。
『阿峰! 開門呀! 老豆呀! 開門先啦!』
搵到啦!
芷君發現原來我一直搵既野就係一把界刀。
我右手拎住把界刀，然後放係背後，再慢慢走去道房門前，吞一吞口水，定一定神，暗地對自己說:『無事既.....無事既.....』
『咔嚓』
我慢慢將門打開，眼前既兩個人正正就係我阿爸阿媽。阿媽見到芷君係到喊，即刻跑去佢身邊，然後係咁問:『發生咩事呀! 下?!』
阿爸見到咁樣，即刻對我大叫:『你攪咩黎呀!攪到個妹喊到咁!』
依一刻，佢地兩個一路講野，我一路都聽唔入耳。我在意既係，佢地隻手腕有冇一條奇怪既配帶。
『阿峰!』阿爸忍唔住再一次大叫。
嚇到我震左一震，開始回過神黎，同樣地，我都發現佢地隻手腕無任何野，個刻我先放鬆一口氣。
『下? 咩?』我呆呆地說。
『我問你呀! 你攪咩黎呀!攪到個妹喊到咁!』
我望一望芷君，再望一望阿爸阿媽既反應，即時苦笑著說:『喂喂喂.......咪住先! 你地唔係以為我攪細妹呀!? 痴線啦! 我地係到睇緊鬼故呀! 佢自己又細膽嚇到唔知點咁!』
芷君見我話佢細膽，即時反擊:『係你無啦啦係到大叫，又唔比我開門! 係人都比你嚇親啦!』
阿爸阿媽見到我地咁樣都放鬆一口氣，起碼無亂倫事件，唔洗要社工出動。之後阿媽無好氣地說:『兩兄妹咁大個人仲咁無里正經! 你做阿哥既又嚇個細妹! 芷君! 返房訓! 依家幾點呀! 』
阿爸都無好氣咁放低一句:『我聽日仲要返早架!』說罷，就返返自己房到，阿媽又拉左芷君走左。
突然間，間房既人全部離開哂，我慢慢關上房門，房內又回復一片寂靜。我呆呆咁望住把界刀，我係咪太過敏感呢? 定係我岩岩隱約聽到果位巴打講左一句:『老豆!?』而起左疑心呢? 因為我聯想到一樣野，如果真係有另一個自己出現，照道理，果位巴打既父母都會有另一個自己，唉，好亂......件事愈黎愈複雜。
我將把界刀放返係張電腦檯上面後，就攤左落張床到，呆呆望住天花板，個腦再一次高速運作，將岩岩成件事好似播影片咁，不斷係我腦海入面播放。
首先，果位巴打肯定同許雯件事有關連! 許雯成件事最恐佈既位就係比人殺左之後消失埋，繼而有另一個『許雯』出現，但依個『許雯』又唔係同許雯真係一模一樣既樣，感覺係好多年後既許雯。而果位曾經形容過對方係似佢，但又唔係一模一樣，咁樣同許雯既情況係一模一樣，加上我岩岩聽到對方執起部電話"喂"左一聲，雖然把聲"老牛"左少少，但離不開果位巴打把聲，令我更加肯定有另一個『巴打』。
雖然唔知道對方動機係咩，目的又係咩，但都幾肯定既係，對方一定要置『自己』於死地，正正就係當日中年男人同我講果個一句 "橫掂你遲早都比自己殺!" 依番說話不謀而合，同樣地，都代表左有另一個『我』既存在。而頭先佢地話如果再唔落手既話，就會消失!? 依句我諗唔明係咩......唔通唔殺死自己就會消失返? 佢地係咩人黎? 假設佢係未來人，如果殺左以前既自己，咪唔係代表佢地係未來都會消失既咩? 雖然我唔係咩大科學家，但我睇戲都睇得多，都知道無以前既自己，又點會有將來既自己!?
同埋我諗極都諗唔明點解我會牽涉其中，除左飄流到荒島以致殺左中年男人之外，我真係諗唔到我有其他地方係得罪左人。而且我同許雯只係同學關係，又唔係佢男朋友，何必將我拖埋落水!?
咪住! 男朋友! 會唔會果位巴打係許雯既男朋友呢? 但又唔係喎......我印象中既許雯係無拍拖架喎! 定係佢地收收埋埋玩地下情呢? 唔係.....唔應該咁諗，除左男朋友之外，果位巴打可能係識得許雯，當中既關係可能牽涉到一啲恐怖事件!
冷靜啲諗，
丫......救命呀! 我諗到頭都爆埋! 完全估唔到件事究竟係點! 究竟依家發生咩事呀!
我起身摸一摸額頭，拍一拍塊臉，望望前面個鐘，顯示時間為 03:34 AM。已經三點幾，自從流落荒島開始，我精神狀況愈黎愈差，主要原因都係無覺好訓，激氣，究竟依個情況仲要持續幾耐! 我仲要攪到自己愈黎愈神經質，離譜到拎把界刀出黎防我既父母......睇黎我真係要好好休息。
正當我再次想訓既時侯，我隻手摸到我部手機，我拎起再諗左一陣，可能果位巴打會無事呢!? 雖然依個諗法都幾天真，但不妨一試，於是即刻起身睇下個Post，睇下果位巴打有冇回應。
最後只剩低一班巴打係到吹水，罵樓主假膠扮消失，又話我留電話夾埋做戲。於是我熜左個螢幕，嘆左一口氣，除左好似其他巴打留言一句:『R.I.P』之外，我都唔知可以講啲咩比已經死左既巴打，又或者我都好希望果位巴打真係假膠黎，係到做戲呃我地，如果佢留言話玩我地，我會好開心，但係我內心深處相信，果位巴打已經死左。
關左房燈，訓落張床到，腦海雖然唔想再諗依件事，但仍然浮出四個字 - "新填地街"。
我決定聽日去依條街到睇下有冇發現......順便搵多次許雯......睇下佢隻手腕有冇配帶.....再搵下....
諗下諗下，就訓著左。
【第九話完】