要生存，就要殺死自己: 第八話
【第八話】
" 我依家企係新填地街285變電站門口! " 10/27/2012 02:40 AM
『咩黎架? 咩285變電站!? 有啲咁既野咩?』雖然我知道邊到係搭去元朗既小巴總站，但都未聽過有285變電站依樣野。
芷君諗左一諗，於是說:『你再問下佢附近有啲咩!』
"你附近有啲咩鋪頭呀? " 10/27/2012 02:41 AM
" 對面有間亨利公司!寫住專營消防產品! 其他鋪頭都係五金鋪! " 10/27/2012 02:43 AM
『哦.....佢一講五金鋪我就知邊到!』 於是我即刻再留言:
" 你離個小巴站仲好遠! 但你條路岩架啦! 你直行上去就得! " 10/27/2012 02:44 AM
" 好! 我依家行! 唔該哂巴打! " 10/27/2012 02:45 AM
睇黎樓主無視左其他巴打既留言，專心一意咁聽我講，我都唔希望樓主會發生啲咩意外。
" 個男人仲跟住我呀! 我企係到 佢又跟我企係到! 我走 佢又走!" 10/27/2012 02:47 AM
當我見到樓主咁講既時侯，我更加肯定對方目標就係樓主，我即刻留言:
" 快跑! 有咁快得咁快! 唔好比佢埋你身邊! " 10/27/2012 02:48 AM
我不斷重覆咁按個F5制，不斷更新個Post，好想知道樓主既最新情況，我幻想到樓主依家夜晚晚係一條無人既街上面比人跟蹤，個種感覺仲恐怖過我當日係島上面比中年男人追殺，因為至少我知道有人係後面追殺我。
但係樓主個種心情應該完全唔知發生咩事，比一個樣貌同自己好似既人跟左八，九日，而且來者不善，完全唔知道對方動機係咩，又唔知道幾時先對樓主不利，係心理方面幾乎係精神虐待，如果唔係樓主都唔會怕到唔敢自己留係屋企而搬去同學到住，我諗依一刻樓主一定處於一個極度慌張同不安既情緒之中，咁唔冷靜既話，好易比對方有機可乘。
芷君見我咁緊張咁係咁按粒F5制，加上個Post又真係有啲心寒，於是忍唔住問:『跟佢個男人係邊個黎架?』
我都唔知點答佢，因為我對整件事都充滿問號，但我相信樓主可以比到唔少線索我。我望一望部電腦顯示時間，顯示為 02:52 27/10/2012，樓主咁耐都未更新既? 會唔會發生左咩問題? 定係對方己經落左重手? 激氣呀.....樓主快啲應我啦! 究竟發生咩事呀!
" 我跑左好耐啦!! 都搵唔到有小巴總站! " 10/27/2012 02:54 AM
見到樓主留言，我都鬆一口氣，姐係佢仲生存緊，同時我亦都好快為佢擔心，照計佢條路係岩，直行既話好快就會見到小巴總站，點解仲係搵唔到個小巴總站?
『佢會唔會夜晚晚撞鬼呀? 話唔定入左啲咩異度空間!』芷君都覺得好唔尋常，加上我開頭講左依個Post係靈異Post，令佢先入為主覺得係關啲牛鬼蛇神既事。雖然我唔否定係咪靈異事件，但我相信唔係，因為我今日見到許雯既時侯都係日光日白，而且樓主都講過果個人平日都有出現，所以我幾肯定唔關撞鬼事，除非『佢地』真係咁猛，惡到可以平日都可以出現!
於是我再留言:
" 你附近有啲咩呀? " 10/27/2012 02:56 AM
" 我企係新填地街234-236變電站門口呀 " 10/27/2012 02:58 AM
屌! 又講咩鬼野變電站呀! 我完全唔知咩黎! 講其他店鋪名唔得咩!
『阿哥! 你不如Google下睇下咩黎!』芷君說。
於是我聽芷君講，將"新填地街234-236變電站" 打上Google睇下，發現有一個咩 "新填地街234-236變電站 - 堅毅忍者- 無障礙環境調查大廈報告" 。於是我按入去睇下，格離有張Google 地圖，當我一望，即時忍唔住爆左一句粗口:『屌! 條白痴!』
我即刻留言:
" 打比我，我電話係94340634! 快! " 10/27/2012 03:01 AM
『嘩! 阿哥你做咩留低個電話係到? 有成班人睇緊架喎!』
『......』我無回應，因為我知道事態嚴重，已經顧唔到自爆起底既問題，我依一刻只想樓主無事! 同埋問到我最想問到既問題。
一路望住其他巴打留言，一路等緊樓主打電話黎。
" 嘩!樓上做咩鳩留電話? " 10/27/2012 03:01 AM
" 有冇人打去玩下? " 10/27/2012 03:01 AM
"屌 sosad !咁都有自爆睇!" 10/27/2012 03:02 AM
『鈴鈴.......鈴鈴......』
一段舊式既電話鈴聲響起，雖然預左部電話響，但係依個咁緊張既氣氛下，始終都係嚇左一嚇，一日之內嚇左兩次，頂佢個肺! 我決定以後轉鬼左個鈴聲佢。
望望電話顯示 " 未有來電顯示 "，似乎樓主好小心，用133打黎。
『喂! 係咪巴打呀? 你依家停低係到先!』我要求樓主依家停係到，因為佢行既方向係唔岩。
『係....咻咻.....咻咻.....咁......我應該點行?』樓主不斷喘氣，睇黎佢跑左一段路。
『你冷靜啲先! 你個條街係岩既! 但你行既方向錯左! 你應該行返轉頭!』
過左幾秒，樓主似乎有點埋怨:『唉......又要跑返過去! 好好好!』
我似乎意識到對方想收線，我即刻叫停佢:『巴打唔好收線住! 既然打左黎就等埋你上車先收線! 廢事你又行錯路!』
『OKOK.....唔該哂!』
電話又傳來一陣陣既喘氣聲音，同隱約聽到衣服同袋既碰撞聲音，大概樓主揹住個袋跑。
突然，我醒起我要佢打黎既目的，於是即刻問:『巴打! 我有條問題想問你! 你有冇發現跟你果個人隻手腕到有冇一條配帶?』
『下? 咩配帶?』
『跟你果個人隻手腕到丫!』
『你等等!』似乎樓主轉身望一望跟佢果個人。
『仆街喇! 條友唔見左!』 樓主即時說。
『幾時唔見?』
『我都唔知! 佢會唔會走左?』
『都係唔好理住! 你依家快啲跑去小巴總站先啦!』
『OKOK!』
電話再一次傳來一陣陣既喘氣聲音，聽到我心都寒埋。
我忍唔住再問:『跑到去邊?』
『咻咻.....依家.....依家係宏業工業設備間鋪到!』
『嗯.....應該岩架啦!快啲!』其實我都唔知岩唔岩，果到成條街都係五金鋪，我鬼記得有咩鋪頭係果到。
『咻咻......OKOK!』
電話再一次傳來一陣陣既喘氣聲音，我都開始著急了，左腳不自然地狂震，好想樓主佢快啲到車站，因為車站果到好多人，咁對方就無機會落手。
『啪!』芷君一野拍落我隻大脾到，然後說:『停! 人搖福薄樹搖葉落呀!』
我真係好心急，我再問:『點? 到未?』
『咻咻......咻咻...我跑緊.....丫......跟我果個人係我前面呀! 點算呀! 我仲行唔行過去?!』樓主驚見對方係前面，阻住佢去路。
『你附近有冇人係到?』我即刻問。
『我睇睇先.....無呀! 周圍都無人呀! 條友跑緊埋黎呀! 佢拎住把刀呀! 佢要殺我呀! 救命呀!』接著聽到樓主轉身跑既聲音。
我心諗:『果然係想殺樓主!』
我即刻大叫:『快啲跑!一見到有人就跑埋去! 唔好比佢亂黎!』
『咻咻......救命呀! 救命呀!』
『點呀? 佢仲追緊你呀?』
『咻咻......咻咻!』
『喂! 巴打! 點呀! 不如報警啦!』
『咻咻......咻咻!』
『喂?! 巴打! 喂! 聽唔聽到! 你報警先啦!』
『咻咻......救命呀......咻咻!』
電話只係傳來一連串既喘氣聲音，樓主驚到無時間應我。
『等等.....我見到前面有人!』突然樓主說。
『好!即刻跑過去! 有人就得! 條友仲有冇跟!?』
『有呀! 我依家跑去先!』樓主放低電話，我只係隱約聽到樓主大叫:『唔該! 唔該! 救命呀!』似乎係叫緊佢眼前果個人。
我緊緊地握緊電話係耳邊，發覺自己手心出哂汗，我都緊張埋一份，而芷君都用一對不安疑惑既眼神望住我。
我細細聲對芷君說:『佢見到有人，應該無事!』
『嗯! 咁就好!』
我再行埋一邊，握緊電話係耳邊，聽聽樓主情況如何。只聽到幾下快腳步既聲音。
突然隱約聽到樓主一副疑惑既口吻講左一句:『老豆?』
" 嗯!? "
接著聽到電話跌落地既聲音，樓主發生咩事?
"呀.....唔好......呀......呀....."
電話裡傳來一把垂死既呻吟聲音，我意識到樓主已經出事，我激動地對住電話大叫:『巴打!! 巴打!! 發生咩事呀!! 巴打!! 應我呀!!』
芷君被我突如其來既反應嚇親，係咁問我:『做咩事?』
"呀...........呀......呀....."
『喂!!!應我呀!!! 喂!!!』
" ...... "
數秒後，一片死寂。
耳邊只係聽到電話傳來的微弱既風聲，接著聽到一把陌生既聲音:
" 攪咁耐都未落手!做咩呀你? 下? 你睇下時間! 唔係我黎幫你! 你遲早消失! "
" 對唔住......爸! "
" 執好佢既野，我地返屋企! 我地個面攪好哂! "
" 嗯! "
接著聽到有人執起樓主部電話既聲音，傳來陣陣摩擦聲音，然後對方發現部電話係通話中，不禁問:『喂?』
聽到把聲好似巴打本人，但把聲又好似"老牛"左好多咁，但我都唔理咁多，即刻追問:『巴打!? 你發生咩事! 我以為你.....』我話未說完，已經有人係背後大叫:『收線啦!』
『嘟。』
對方收左線。
我拎住部手機，呆哂咁望住芷君。芷君見到我咁樣，唔知點解好想喊，嗚咽地說:『阿哥點呀......唔好嚇我呀，我好驚呀。』
而我依一刻，我腦海只係一片空白。
【第八話完】