我是一名SEN的中學生: 番外篇2-李sir,行為治療班(3)

「經過咁多堂之後，終於黎到最後一個測驗啦！第五個測驗就係做一個行程表。」

李sir臉上顯現了他釋懷的表情，一來他大概是對於我們可以在限期內完成課堂表示安慰，二來他也樂見於我們的成長。

雖然只是僅僅五堂，每堂一個半小時，但他仍然珍惜跟我們相處的每一刻，不像以前的社工只視這個課程為一種苦差，敷衍了事。

「上四次嘅測驗都要用腦玩㗎喎，點解今次咁簡單嘅？」我好奇地問李sir。

「完成左呢個Task再話俾你聽啦！你哋有一個鐘嘅時間。」





接着，我們開始預備這一個行程表，大家也開始理性討論和分配好工作，循序漸進的完成眼前的目標。

1小時後，我們的任務完成了，李sir 叫我圍坐在一起，讓我們分享一下剛才的習作。

「大家有咩感受呀？發仔講先啦！」

「太容易啦，同其他人合作冇難度!」

「Peter?」





「有發揮空間去背價錢同計數。」

「May May?」

「終於感受到俾人尊重係咩感覺。」

「Alex?」

「巴士咪竟然會有成名嘅一日。。。」





「係有價值。」盲亨補充。「我冇咩特別，平時基本同其他人合作冇咩問題，但都好樂見其他人有進步，大家要繼續加油。」

「悠悠？」

「我。。。都係，好高興認識大家。」

「霖？」

「首先我好抱歉一開始睇唔起大家，其實自己都唔係好醒目，自己真係好自大，經過呢五堂之後，自己真係好多嘢做唔識，好多謝呢五堂大家陪伴我。」

聽完呢一番說話後，大家也鼓起掌來，即使有一些學員可能不知道為何要鼓掌。

「大家都講咗自己嘅感受同得着，我好高興大家都有明顯嘅進步，不過記住呢五堂只係一個起步點去重新建立自己嘅社交圈子，以後嘅路都要靠你哋啦！同埋你哋冇發覺今次合作好順利咩?因為你哋進步左，唔係個測驗簡單左，如果係參加呢一個course之前你哋同其他人做同一類嘅工作，你哋都會照樣嘈交。」

原來李sir 在我們不知不覺間灌輸了不少技巧和價值觀，讓我們可以順利完成訓練，助我們適應正常的社交圈子。





「我哋下次聚會見啦！」李sir說。

「拜拜！大家下次見啦！」所有的學員各自跟大家道別。

房間只剩下我，悠悠，盲亨和李sir。

「點解你會各自PM我哋三個留喺房嘅？」我好奇問。

「我想聽吓你哋對於我呢個課程嘅建議，畢竟呢一個課程係我主動向學校請求開既，我想知道有咩改善嘅地方？」李sir 回答。

「點解唔叫埋佢哋講有咩改善？佢哋唔會覺得奇怪嘅咩？」

「因為你問黎都冇咩用，佢哋唔會實質俾返個有價值嘅建議俾返李sir，同埋佢地唔會，甚至未有呢一個能力feel到係有問題，至於May May可能feel到，但唔會care 。」





盲亨回應了我的問題，我好像從來沒有聽見他說這麼冷酷無情的說話。

「唔使咁講佢哋嗎？」

「雖然你同佢地一齊相處左五堂，表面上大家係容易相處左，但你會唔會承認係心入邊依然有少少唔想同佢地相處？」

「其實。。都係嘅。。」我回答。

「除左May May，其他人我相信唔會因為呢五堂而有好大嘅變化，好現實咁講，佢哋天生嘅缺陷已經限制左佢哋嘅成長發展，佢哋唔會有正常人嘅生活，學校呢一類嘅短course可以短暫咁幫一幫佢哋，但冇其他長期嘅貼身照料，同埋社會上面一系列資源，佢哋會被淘汰得咁快。」

「李sir，佢哋真係會面對呢一啲野？」

「我已經可以做嘅已經做晒，你知學校不嬲都唔重視呢一啲問題學生。」

「咁點得㗎？」





「呢個。。。就係現實，你冇可能幫晒所有人，有時候。。。真係要顧掂自己先可以再幫人。。。」悠悠說。

「我只係想冇咁多人受呢啲苦。。。」

「其實你又知佢哋辛苦？你又知道佢哋需要人哋幫？反而覺得佢哋好沉醉係自己嘅世界，佢哋都feel唔到人哋點憎佢，唔好比佢哋知道現實世界嘅醜惡係咪仲好？」盲亨說。

「同埋點解會夠學生開呢啲course？求先既學員其實都係夾硬抝返嚟，加上撞正教育局推融合教育，咁啱有一筆錢落左學校手，校方先肯開course，仲要有一定既參加人數先至稍為考慮搞下一次。呢間學校係教育界出名冇好着數嘅唔會做，一般情況都唔會有呢一啲訓練班，李sir都係食中左呢一條水先至開到班，要想冇咁多人受你呢啲苦唔係一件咁容易嘅事。」

我沉默了。

現實的世界是這麼殘酷和醜惡嗎？

以為會改好自己的陋習，我的世界就會變好。。。





不，不是每一個人都是這樣現實的！一定會有人，為了自己的理想而不斷奮鬥，同時也不會忘掉初衷。現實真是這麼大的威力？

「你雖然係有咗少少基本社交技巧，但仍然要經過一啲實戰嘅經驗，撞下板先會真正成長到，俾啲心理準備自己啦！」盲亨補充。

「既然你咁了解社交技巧同埋呢啲現實，咁點解又會上呢一個course，呢一個課程你應該都唔需要啦，做咩霸住個位唔俾其他有需要嘅同學？」

「一來，我係黎做helper賺時數既，悠悠都係。」

悠悠立刻反應過來，回答：「係呀！」

「二來，我頭先都講咗，我係嚟湊人數嘅，唔係你以為點解呢一個course會成功開到？我都知道有其他嘅人更需要去上呢個course，但上得呢一個course就代表佢哋將自己嘅缺陷公開出嚟，咁咪仲容易成為係呢間學校嘅欺凌目標？三來，雖然我眼盲，但內心唔係盲得晒，我同其他表面上正正常常，但個心同埋就同盲左冇咩分別嘅人相處唔到，所以選擇嚟呢度靜下。」

做人真的要這麼多concern咩？

李sir這時拿了一張表格給我，是義工隊的報名表。

「由義工隊開始好好運用我教既技巧啦，盲亨講嘅嘢唔係冇道理，應該吸取多啲經驗，放心啦義工隊嘅人好好㗎，我相信你可以應付到。」李sir鼓勵我說。

「加油！」悠悠搭了我的膊頭，輕輕一笑說。

「睇車呀！」盲亨淡淡地說。

「多謝你哋，尤其係李sir，希望下一次嘅課堂可以成功叫到Titus黎啦！」

然而大家也寂靜了，過了一陣才輕輕的說一聲「好」。

Titus的品格雖然有點低賤，又有點不可一世，但真的是那麼的恐怖和沒有救嗎？