在IG上重遇你: 39

第三十九章

「哥，哥，起身食飯啦！你同我食完飯返黎之后，就一直匿埋係間房入面，你搞咩呀？」

我冇心機理佢，所以我選擇繼續扮睡覺。點知呀妹見我唔認，就起勢咁搖我。我心情已經唔好，仲不停搞我，結果我忍唔住好大聲咁話：「你好煩呀！我冇胃口食飯，你地食啦！」

冇幾耐我就聽到「嘭」一聲，我都知自己唔應該咁大聲呼喝呀妹。不過個刻心情太影響我，唯有聽日去道個歉，希望佢快點下左啖氣。

頹左成晚嘅我，因為要返大學整嘢，逼於無奈要一早起身返去。臨出門口個時，呀媽問我琴晚做咩激嬲呀妹，又叫我快點哄返呀妹。我知我再唔出去，就會俾佢煩死，所以我求其應下就走左。





忙左成個朝早，都搞唔掂啲手尾。本來諗住繼續整埋先去食晏，點知個肚唔爭氣，發出「鼓鼓」聲。鬼叫自己琴日又唔食晚飯，今朝又冇食早餐，唯有依家走落去canteen食個飯先，返黎先再做。

因為仲放緊假，所以canteen都冇咩人。我隨便叫左份烏冬，等緊嘅時候，突然間有人拍我膊頭，我擰轉頭一望，竟然係Queenie。

Queenie：「Steven，咁啱嘅！仲放緊假，你會返學校，搞咩先？」

我：「冇，今日返黎執之前嘅手尾姐。你又做咩返黎學校？」

Queenie：「我報左summer sem，啱啱先上完堂，見肚餓咪過黎食嘢。你自己一個，唔介意一齊坐？」





其實我有少少尷尬，因為上次不歡而散，跟住一直都冇勇氣揾佢。諗住等開學先算，點知今日又撞到正一正，個天真係鍾意將問題一次過逼埋黎！

Queenie：「Steven，你依家同Bobo點呀？追到佢未？」

真係好提唔提，就提最大嘅問題，連我自己都唔知點回應佢好，所以我選擇轉移話題，問：「個次我咁樣同你講嘢，你又靜晒咁，其實我係咪太直接？」

點知Queenie反我白眼，仲話：「你唔會以為我會因為咁少嘅事而唔開心，我知道感情冇得強求，你同我講清楚，反而我仲舒服啦！」

我：「原來你係咁豁達，我仲諗緊點去開解你添！」





當我諗住成功轉移話題之際，佢又提返起個問題：「你仲未答我問題喎，你同Bobo表左白未，定係你俾人捷足先登？」

我都未答佢，佢又話：「好心你有勇氣同我講清楚，就攞啲勇氣去問Bobo啦？你估人地好多時間等你咩。唔同你傾住，我夠鐘上堂，希望下次見到你會有好消息啦！」

聽完Queenie講呢返説話，我都立定決心去問清楚，無論成功定失敗，都想有個答案！