在IG上重遇你: 38

第三十八章

話咁快就星期六，本來我好期待今日同Bobo去街，不過依家俾呀輝講嘅嘢影響，搞到我今日咩心情都冇晒，甚至唔知今日點面對佢！

其實今日除左約Bobo食飯之外，我仲想送份禮物俾佢，係一條印左佢名嘅手鏈。我見我地嘅關係越黎越好，所以想借送手鏈去表達下愛意，順便睇下佢有咩反應。依家望住條鏈，都唔知今日應唔應該送俾佢，最後我都係放返入櫃裡面，等有機會先送。

正當我諗住出門口嘅時候，Bobo突然間whatsapp我

Bobo：「Sorry呀！今日我有事，黎唔到😣😣」
我：「冇所謂，你有事就忙左先，手信幾時攞都得」




Bobo：「下次請返你食嘢」

唔知點解我好似鬆左啖氣，今日唔洗見佢反而冇晒壓力。不過依家我應該做啲咩好，去打下機定出去行下呢？

呢個時候，呀妹係房到行出黎，佢用好奇嘅目光望住我，跟住問：「你今日唔係約左Bobo姐出街咩，點解你仲坐左係到？」

我：「佢臨時有事，所以我咪仲係到。係喎，反正你未食晏，我地兩兄妹一齊去食嘢啦！」

妹：「咁等我一陣，我好快換件衫」





結果本來計劃好要帶Bobo試嘅餐廳，變成左我同呀妹去試。我原本諗住係間有情調嘅餐廳入間，連埋今日想送嘅手鏈，打算俾Bobo一個驚喜，睇下可唔可以打動到佢。可惜依家咩都做唔成，仲要唔知Bobo係咪已經有新男友，呢刻心情真係有少少唔上唔落！

突然間呀妹問：「哥，你有冇事呀？你好似好唔開心咁，係咪你同Bobo姐之間發生咩事？」

我擰頭示意冇，不過呀妹繼續講：「哥，你唔好收埋自己呀，你記住有事一定要出聲，我永遠支持你」

我：「我真係冇嘢，你唔洗咁擔心！」

妹：「你係冇事先好。我地食完嘢，不如去行下街囉？」





我：「冇所謂，咁我埋單先，你係出面等我」

有時候唔知話世界好細定好大，明明唔想見某啲嘢，個天仲係俾你見到。我一行出餐廳門外，望左望對面街，竟然俾我望到Bobo同個男仔行緊，佢地仲有講有笑。個刻我個心真係同被人打碎冇分別，但我冇太大反應，因為我唔想呀妹知道，費事佢擔心。