在IG上重遇你: 34

第三十四章

我：「哈，你有玩O camp咩？點解我好似冇見過你？」

Queenie：「你唔記得好正常，我嗰時又唔係好靚女，你地班男仔緊係唔留意我」

我笑而不語，由得Queenie繼續講：「你有冇印象你同我講過如果我唔帶眼鏡，化返個妝，肯定好多男仔追？」

等我諗下先，我好似真係同人講過呢句説話，不過我冇記錯係我同阿輝佢地賭輸左，懲罰係要同十個女仔講同一番説話。估唔到我嘅玩笑，竟然改變Queenie咁多。





我唔知應唔應該將真相講俾佢聽，我諗左陣，都係決定同佢講出事實：「Queenie，其實呢…其實嗰時……」

我都未講完，佢就打斷左我，跟住話：「我知你想講咩，嗰番説話係你賭輸左，要同十個女仔講。」

我即刻笑左出黎：「原來你知道真相，我仲以為你咩都唔知！」

Queenie：「我係咁啱聽到你個組啲女仔係到講起先知，不過我始終第一次聽男仔咁同我講，所以我就諗如果我改變下，可能…可能你會再一次注意我呢！」

我聽到佢咁講，竟然有個衝動想攬住佢，但理性控制我嘅慾望，我知道呢一刻已經太遲。





Queenie轉身望住個海，突然間問左我一句：「Steven，如果我早啲同你表白，你會唔會揀我，而唔揀Bobo？」

我好自然咁擰頭：「就算我冇遇返Bobo，我都唔會揀你。因為我知道我冇可能擁有你，你係我心目中只係一個女神，而我只係你身邊嘅一個愛慕者！」

我知道我咁講肯定好傷Queenie，但我知道如果我唔咁做，係冇可能令Queenie死心，我唔想俾個假希望佢！

我：「時候唔早，我送你返屋企啦！」

Queenie同我就好似啱啱嗌完交嘅情侶，成程路都冇再講過嘢，直到我送佢返到屋企，佢先同我講左句「再見」。其實我啱啱咁講係咪太冷血，我真係有啲後悔！





因為送埋Queenie返屋企，搞到我七點幾先返到旺角，而我個手機已經俾我個妹炸到差啲死機，我唯有狂奔返去，中途順便買件佢最鐘意食嘅朱古力泡芙，當做補償啦！