在IG上重遇你: 33

第三十三章

Queenie介紹嘅餐廳係食日式料理，餐廳佈置到同日本居酒屋一樣，所以啲座位唔多。我地叫左份天婦羅，炸雞同燒三文魚骨，我怕唔夠飽，所以再叫左個叉燒拉麵。等嘅過程中，Queenie好似唔開心，唔知係咪因為我啱啱太大聲，搞到佢驚左我。

我：「Queenie，頭先唔好意思，咁大聲喝你」

Queenie：「唔關你事，係我自己太蠢，明知自己係路痴，又唔一早搵定路」

我：「路痴咪路痴囉！反正我會做指南針，帶你行返啱咪得。你唔好再扁嘴，唔係啲人會以為我蝦你」





Queenie：「咁我真係俾你嚇親，突然間咁大聲，你第一次咁大聲同我講嘢」

我：「下次唔會！啲嘢食黎啦，快啲試下先」

好在發生左件咁嘅事，我先唔洗諗點應付可能出現嘅尷尬事。望到啲食物，我地好自然就手機食先，跟住開始邊食邊傾計，不過我地好有默契冇提起嗰日嘅事，好似唔想咁快面對問題。食到最後一件炸雞，我望一望Queenie，佢個表情話俾我知佢想食埋件炸雞。

不過我想玩下佢先，我問：「我諗你已經好飽，等我幫你食埋佢」

我攞起筷子，諗住夾起嘅時候，佢就話：「我…我想食…食埋件炸雞」





我夾起左件炸雞，再望住Queenie失望嘅眼神，我放左件炸雞係佢個碗到，然後話：「你個樣成個小朋友爭輸左咁，我唔同你爭，俾埋你食！」

Queenie：「你真係唔食，你唔洗讓我」

我：「我費事等間又見到人扁晒嘴，又要道歉呀！」

Queenie：「我先冇咁小氣。係喎，等間不如搭車去海旁嗰邊行下？」

我：「我冇所謂，反正今日冇咩嘢做」





我地坐多陣，就出發去荃灣海濱公園。今日天氣好好，而且公園冇咩人，我同Queenie沿著海旁一路行，一路食住雪糕。

Queenie：「Steven，今日好多謝你陪我行街、食飯。我本身以為你會驚左我添！」

我：「點會呢！不過如果冇發生嗰件事，我諗我今日唔洗咁煩」

Queenie：「嗰日我係衝動左，不過…不過呢…其實…你…有冇鐘意過我？」

我又一次俾佢嚇親，不過今次我可以俾個答案佢：「我…我曾經有鐘意過你，不過當我見返Bobo之後，我先知道我對你嗰種感覺唔係愛情，只係純綷傾慕，或者似鐘意一個明星」

Queenie：「原來我係你心目中，只係同明星一樣，而你只係我嘅fans」

我：「其實我想問，你幾時開始鐘意左我？不過如果你唔想講，你可以唔講㗎，我唔會逼你」

Queenie：「你仲記得我地咪一齊玩過O camp？係O camp發生左一件事，我就開始留意你」