在IG上重遇你: 23

第二十三章

阿輝同我整好晒所有嘢，就開始透爐，我地好快就搞掂。阿輝就開始化身成大廚，好多人一開始會誤會阿輝唔識煮嘢食，但其實阿輝嘅廚藝可以同外面啲餐廳比，個個食完都讚不絕口。所以今日我地所有人都超級有口福。

當阿輝不停燒嘢食嘅時候，我就坐定定係隔離等食。啲食物嘅香味開始散發出黎，遠在沙灘嘅女孩們好快就跑返黎，眼甘甘望住啲肉汁噴發出黎。好快阿輝就燒好幾塊肉，仲幫我地分好晒，簡直係五星級享受。

Bobo：「塊肉好juicy，估唔到阿輝煮嘢食係咁好」

Queenie：「識左你咁耐，都唔知你有呢種技能」





芷穎：「堂哥，你今次請啱人黎，唔洗自己燒嘢食」

穎詩：「又識煮嘢食，樣又唔差，估計家庭富裕，真係完美嘅人！」

我：「你地唔好讚佢咁多，佢會失晒控」

芷欣：「堂哥，你唔會係妒忌阿輝哥又靚仔，又識煮嘢食？」

我：「我洗鬼妒忌佢，佢要妒忌我就差唔多！」





輝：「你地再講，啲肉同海鮮都會凍晒，就唔好食㗎！」

我地又一次狼吞虎咽咁食晒阿輝煮嘅嘢食，食到個肚都脹卜卜。佢地幾個抖左陣就話準備換泳衣去游水，而Bobo同Queenie話想行下沙灘，散下步，我同阿輝就執埋啲嘢先搵佢地。

阿輝：「阿威，大好時機呀！可以增進大家嘅感情，唔知Bobo鐘意講咩話題呢？」

我：「快啲執埋啲嘢先啦！」

阿輝同我慢慢行去搵佢地，跟住我地撞到堂妹同Jessica準備落水，佢地三個嘅發育真係好，同岸上嘅比堅尼女郎有得比，我提佢地要小心，先繼續沿著沙灘行。好快我地就追到Bobo佢地，我地四個人平排咁行，配埋個太陽光，搞到勁有日劇嘅feel。





輝：「好耐冇試過咁輕鬆，好似去左度假咁」

我：「去唔到旅行，唯有去沙灘扮自己去緊旅行」

Bobo：「你地成個阿伯咁，係到想當年呀！」

Queenie：「唔好黐佢地咁埋，一陣比佢地感染我地」

我：「如果我地係呀伯，你地咪係呀婆囉！」

Bobo同Queenie即刻用雙眼發出強裂嘅不滿，仲轉身走左，掉低左我同阿輝。阿輝對住我舉中指，仲叫我自己去面壁思過。我地行左半個幾鐘，就行返去燒烤爐，準備燒多一轉。

點知我地見到有幾個男仔圍住我堂妹佢地，我同阿輝即刻扮晒好惡咁行過去。跟住我地仲要除埋件衫，阿輝身上有幾個紋身，加埋個八嚿腹肌，我諗仲唔嚇死班仆街。

我：「你地幾個，做咩搞我地啲女，係咪嫌命長！」





輝：「你班仆街仔，係咪想撩我隻抽！夠膽搞我啲女女！」

班仔一見到我同阿輝咁大隻，加上啲語氣咁恐怖，即刻走都走唔切，有個仲要仆左落地，笑到我地幾個見牙唔見眼。

芷穎：「堂哥，你地好衰呀！咁樣蝦人地」

Queenie：「你地平時係咪咁樣蝦班新人㗎！你地件衫呀」

我：「唔該晒，要兩位可愛嘅女士幫我地執衫，真係過意唔去」

Bobo：「咁我諗你地要報答我地咁辛苦去執件臭衫」

輝：「我會用廚藝黎報答你地。阿威，你要點報答呢？」





我：「既然係咁，我唯有以身相許俾兩位女士，希望你地接受」

芷欣：「堂哥，咁樣好似佢地蝕底俾你多過你報答人」

我見我地啲飲品差唔多飲晒，就諗住行去士多買，而Queenie話想去廁所，於是我同佢一齊行過去。

Queenie：「阿威，你同Bobo係咪識左好耐？」

我：「我地係小學同學，不過係上個月先見返面，做咩咁問？」

Queenie：「冇，我諗緊上次你話個fd飲醉左，係咪Bobo？」

我：「係，上次的確係佢，佢同男朋友散左」

Queenie：「睇黎你好關心佢，佢飲醉你就即刻衝出去，你係咪…鐘意佢？」





我：「我自己都唔係好清楚，我對佢究竟係點？不過我可以講自己真係好想保護佢！」

Queenie：「咁如果佢同我比呢？你會鐘意邊個多啲？」