在IG上重遇你: 03

第三章

望住眼前個女仔，好難想像係十年前嘅箍牙孖辮妹，不過佢嘅言行舉止就同十年前完全冇分別。

我：「真係好耐冇見，孖辮妹」

Bobo：「你同以前一樣，冇變過，小霸王」

杰：「唔好傾住啦，快啲上去先」





一入到會場，我見到好多又熟悉又陌生嘅面孔，感覺好似返到小學個時。日日嘻嘻哈哈，同大家上堂、玩小遊戲，生活無憂無慮。我見到有幾個人同我地揮手，望真啲係我地班嘅班長同科長。

我：「班長，好耐冇見」

班長：「你咪係威少，靚仔左。後面咪係羅穎妍、方子婷同埋杰仔，大家都唔同晒。」

班長個身型比起以前又大左一個碼，其他人就冇咩大改變，只係個個著到去飲宴，我拍埋去好似去錯地方。而個聚會都順利進行，大家由小學傾到大學，以前嘅柒事都比人攞返出黎講。眨下眼就已經去到十點，我地要還返個場比酒店，大家都交換返聯絡方法，等遲啲再約出黎玩。之後，班長行過黎我地個枱。

班長：「你地夜啲有冇嘢做？我地幾個諗住去附近飲杯嘢，繼續吹水，有冇興趣？」





婷：「我同阿杰聽日有早堂，唔想搞到咁夜，下次先。」

班長：「咁阿威同bobo呢？」

我：「我冇所謂，反正聽日day off。」

Bobo：「我都可以呀！」

子婷同杰仔先我地一步走左，我地等埋班長搞埋小小手尾就一齊落Bar到飲下酒，吹下水。我同Bobo行得比較後，因為同前面個幾個唔係好熟，我就同Bobo傾計。





我：「估唔到你都會落Bar，你都唔似會去泡。」

Bobo：「其實我好少落Bar，今次見咁大班人，咪一齊去囉！」

我地隨便入左一間Bar，開頭大家都幾拘謹，不過飲左一兩杯酒後，就開始講唔停。我同Bobo都講返起好多以前小學嘅事，講講下，班長突然將話題轉向我同Bobo。

班長：「阿威同Bobo以前小學經常一齊玩，個個都話你兩個鐘意對方。」

我：「認真咩？我係同佢成日坐埋一齊先熟姐。係唔係呀，Bobo？」

唔知係咪Bobo有少少飲醉，佢竟然話：「其實我有鐘意過你，我臨畢業前有寫情書比你，但你好似唔知咁。」